Sodomako kontsula
Amatiño
2010/01/12 23:37
Beldur naiz “El cónsul de Sodoma” fikzioa balitz eta agiriko sexurik ez balu ez ote litzatekeen film zeharo aspergarria izango. Baina fikzioa gainditzen duen biopica da eta ohi baino gizon-biluzi gehiago azaltzen du. Errealitateari eskandalua datxekio eta biluziari erakarpena. Txartel-lehiatila ez da umezurtz geratuko.
Erantzunik ez
Ez nion sinetsi
Amatiño
2010/01/11 23:30
Orain hamabi urte, 1998an, Lizarrako Ituna zela eta, ETAkoa izateagatik hamar urte inguru espetxean egondakoak esan zidan: “Oker diharduzue. Horiek ez dira benetan ari. Ez diote sekula burruka armatuari utziko. Honez gero ez dira erabaki hori hartzeko gauza”. Ez nion sinetsi.
Tinajera vacuando carpeta
Amatiño
2010/01/10 23:11
“Globalizazioa” eta “jasangarria”, hona hitz bi hegoaldean gero eta sarriago entzun arren iparraldeko euskaldunek nekez erabiliko dituztenak. Segurutik guk ere ez genuke erabiliko frantsesak bagina. Baina, frantsesak ez garena badakigun arren, zer arraio ote garen ez gara gero igande iluntzean eztabaidatzen hasiko.
Etorkizuna elektrikoa da
Amatiño
2010/01/09 23:55
Iberdrolak munduko haize-errota parkerik handienetakoa eraikiko du Erresuma Batuan eta otsailaren lehen asteburuan Europako Batasunaren Industria eta Zientzia ministroak Donostian bilduko dira auto elektrikoaren etorkizuna eztabaidatzeko. Energia sektorea iraultzen ari da hegaztadaren letxe.
Erridikulua egitearen beldur
Amatiño
2010/01/08 19:53
Jendeak sumatzen du eskanerrean agertzen den gorputz lausoa mugitu egiten dela, ez dela irudi hutsa, bizirik dagoela, norberaren arima daramala alegia, eta beldur da nonbait. Ez intimitatea galtzearen beldur, erridikulua egitearena baino. Eta erridikulua norberaren baitan dago, ez inoren begietan.
Munduratzearenak egin du
Amatiño
2010/01/07 14:31
Egungo hegazkin batek 1975an baino %45 erregai gutxiago kontsumitzen du kilometroko. Baina oraingo hegaldi guztien kontsumoa ordukoa baino %150 handiago da. Hau da, teknologia berriek energia-eraginkortasuna hobetu dute eta, ondorioz, prezioak merketu. Hegaldiak merketzearekin batera bidaiari-kopurua hazi egin da eta baita, jakina, hegaldiena ere. Beraz, kontsumoa gehitu. Gurpil zoro hau zelan konpontzen da? Gaur gaurkoz modu bakar batez: hegazkinik ez erabiltzen. Baina gertu al gaude hegazkinik ez erabiltzeko?
Guztiz gomendagarria
Amatiño
2010/01/05 23:53
Zinea artea omen da, zazpigarrena alegia, eta pelikula guztien aurrean horrelakorik esaterik ez badago ere, Juan José Campanella zuzendariaren “El secreto de sus ojos” filma harribitxi horietako bat dugu. Film serioa, atsegina, egituratua, dialogo esanguratsuak, kamera-lan ederra eta izugarri ondo interpretatua. Film klasikoa batetik, thriller komertziala bestetik, ondo amaitzen da… zer gehiago eskatu ote daiteke?
Poesiarik gabeko ikuspegi poetikoa
Amatiño
2010/01/03 22:26
Eguberri giroan, mahai-inguruan, semeak SMSa jasotzen du, irakurri eta dio: “Zelako horteradak idazten dituen gero jendeak”. Alabak, ostera, “poeta frustraturen bat…”. Eta aitak, Harkaitz Canoren txalapartaren oihartzunez, “poesiabako ikuspegi poetikoa behar bada...”
Ahitzen ari diren zibilizazioen konponezina
Amatiño
2010/01/02 23:49
Adin Maalouf idazlea ez da segurutik arrazoi guztiaren jabe baina, sikeran, Ekialde Ertaineko zein Mendebaldeko ikuspegiak bertatik bertara bizi izan eta ezagutzen ditu. Libanoarra jaiotzez, Barack Obamak benetan asmatu dezan nahi du. Behar bada, ez alde batean (Ekialde Ertainean) eta ez bestean (Ipar Ameriketan) ez gaudenontzat benetan interesgarria da bi zibilizazio kontrajarrien arteko zubigintza eta elkar ulertu beharra defenditzen dituenaren iritzia baina, daitekeena ere, “hango” zein “hemengo” hainbatek traidoretzat jotzea.
Jaiotza ala Parke Jurasikoa ote?
Amatiño
2009/12/31 17:47
Gure ama zenak ez luke gaur egungo Jaiotzarik ulertuko. Batetik, jaiotzaren ordez Olentzaro dagoelako; bestetik jolasteko erabiltzen delako eta, jolasteko denez gero, ardiekin, txerriekin eta behiekin batera, Haginzorrotz, Buztanoker eta bestelako dino-senideak tarteko direlako. Auskalo Jaiotza ala Parke Jurasikoa ote den, baina ez gure txikiei kontrakorik esan. Sinkretismo berria ote?