Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / e-gorblog

e-gorren blog pertsonala (komikiak, informatika eta beste)

Kunsthal-en II. Animazio Jardunaldietako komiki-ekitaldiak

e-gor 2016/11/09 22:45
Ostiral eta larunbat honetan izango dira, azaroaren 11 eta 12an alegia

Irungo Kunsthal Goi Mailako Arte Plastiko eta Diseinu Zentroak II. Animazio eta Ilustrazio Jardunaldiak antolatu ditu Tabakaleran ostiral eta larunbat honetarako, hau da, azaroaren 11 eta 12rako, Komikilabea programaren barruan. Aurtengo gaia "Emakumea animazioan, komikian eta ilustrazioan" da, eta ekitaldietako batzuk komikiaren inguruan izango dira, zehazki hauek:

Programa osoa eta zehaztasun gehiago beraien webgunean duzue. Ez dute zehazten, baina webguneari, programari eta ekitaldien izenburuei kasu eginda (dena gaztelania hutsean dago), pentsatzekoa da dena gaztelaniaz izango dela...

9. Ibarra Galtzakomik komiki-lehiaketa abian!

e-gor 2016/11/07 18:55
Lanak bidaltzeko epea azaroaren 21era arte dago zabalik
9. Ibarra Galtzakomik komiki-lehiaketa abian!

Irudia: Galtzakomik

Tolosako Galtzaundi Euskara Taldeak 9. Ibarra-Galtzakomik komiki-lehiaketa antolatu du. Euskarazko lanak soilik aurkez daitezke bertara (komiki muturik ezin da), gaia librea da (baina eduki sexista edo arrazista edo intolerantea ez da onartuko), lanek jatorrizkoak eta argitaragabekoak izan behar dute, ez dira onartuko programa informatikoen aurrediseinatutako irudiekin egindakoak, eta sari eta kategoria ugari daude (oinarri zehatzak beraien webgunean dituzue, http://galtzakomik.blogspot.com.). Azaroaren 21era arte dago lanak bidaltzeko denbora. Zeren zain zaude?

Komikilabea, aste honetan Donostian

e-gor 2016/11/05 10:10
Hainbat erakusketa, tailer eta solasaldi izango dira Donostia 2016k eta Gipuzkoako Foru Aldundiko Kultura, Turismo, Gazteria eta Kirol sailak antolatutako jardunaldiotan

Donostia 2016k eta Gipuzkoako Foru Aldundiko Kultura, Turismo, Gazteria eta Kirol sailak antolatuta, Komikilabea jardunaldiak izango dira aste honetan zehar Donostian. Antolatzaileez gain, Donostia Kultura, Tabakalera, Kutxa Kultur, Kunsthal eta Kaxilda liburutegia ere aritu dira laguntzaile. Komikian zentratuta badago ere, bere inguruko bestelako formatu edo arte-espresioak ere lantzen ditu, hala nola argazkigintza, marrazkigintza, zinema eta animazioa. Egia esan, aurreko astean ere izan dira jardunaldietako hainbat ekitaldi, baina komikizko ia denak aste honetan izango dira. Programazio osoa beraien webgunean dago, baina komikiekin lotuta eta hurrengo astean izango diren ekitaldiak hauek dira:

  • Euskadi Fantastikoa XII: Julen Ribas erakusketa (Udal Liburutegi Nagusia, urriaren 29tik azaroaren 19ra): Besteren artean Azken garaipena komikia marraztu duen Julen Ribas artista arrasatearraren lanari buruzko erakusketa hau Fantasiazko eta Beldurrezko Zinemaren Astearen barruan egiten den Euskadi Fantastikoa erakusketaren hamabigarren edizioaren barruan kokatzen da.

Julen Ribas - Euskadi Fantastikoa
Euskadi Fantastikoa XII - Julen Ribas erakusketaren kartela
  • Nina Bunjevac: Fatherland erakusketa (Komikigunea, azaroaren 5etik abenduaren 3ra): Nina Bunjevac marrazkilari kanadarraren Fatherland (2015) komikian oinarritutako erakusketa.
  • Storyline: komiki kolektiboa egiten tailerra (euskaraz eta gaztelaniaz, Tabakalera, azaroaren 6tik 12ra): Astebetez, Ibai Aizpurua, Luis Doviso, Mai Egurza, Paula Estevez, Joseba Larratxe Josevisky eta Aritz Trueba komikigileen eta animatzen den beste edozeinen artean komiki bat egingo da.
  • Susanna Martín-ekin komiki-tailerra (gaztelaniaz, Intxaurrondo Kultur Etxea, azaroaren 7tik 8ra, 18:00etatik 21:00etara): UNRWA Euskadi (Ekialde Hurbilean dauden Palestinako Errefuxiatuentzako Nazio Batuen Agentziaren Euskadiko atala) erakundearen laguntzarekin Susanna Martín (Bartzelona) marrazkilariak zuzenduko duen tailerrean komiki  soziala eta bere rola hezkuntza-tresna gisa, komikiaren lengoaia, gidoia eta storyboard-a bezalako gaiak landuko dira.
  • Javier de Isusi: Asylum erakusketa (Kaxilda liburudenda, azaroaren 7tik abenduaren 3ra): Javier de Isusik CEAR-Euskadi erakundearentzat errefuxiatuen dramaren inguruan egindako Asylum komiki bikainaren inguruko erakusketa.
  • Iñaki Martiarena Mattin: Zarrakamalda solasaldia (euskaraz, Intxaurrondo Kultur Etxea, azaroaren 8an, 19:00etan): Intxaurrondoko Kultur Etxeko komikien inguruko solasaldien barruan kokatzen den ekitaldi honetan, Iñaki Martiarena Mattin (Donostia) komikigilearen Zarrakamalda (2016) lan argitaratu berriari buruz hitz egingo dugu egilearekin berarekin, nik gidatutako solasaldian.
  • Komikiz, ezinbestean! solasaldia (euskaraz, Tabakalera, azaroaren 9an, 18:00etan): Konfliktoak, gudak, mugimendu sozialak, gutxietsien gatazkak... Komikiak ere badira gaur egungo egoera ezagutzeko leiho paregabea. David Zapirainek (Pasaia) Tabakalerako Ubiken ikusgai egongo diren komiki sozialen aukeraketa egin du eta bertan aurkeztuko dizkigu.
  • Susanna Martín: Gaza Amal komikiaren aurkezpena (gaztelaniaz, Udal Liburutegi Nagusia, azaroaren 9an, 19:30ean): UNRWA Euskadirekin lankidetzan argitaratutako Gaza Amal: Gazako zerrendan emakume ausarten istoriotxoak (2016) komikia aurkeztuko du Susanna Martínek. Lan honetan ilustratzaileak Gazako emakumeen errealitatera hurbildu nahi gaitu eta baita emakume palestinarrei buruzko genero eta kultur estereotipoak hautsi.
  • Superwomen: ohiko ikuspuntuari begirada berria tailerra (euskaraz, Tabakalera, azaroaren 10ean, 18:00etan): Idazleak, irakurleak, marrazkilariak, pertsonaiak, protagonistak... Zein leku okupatzen dute emakumeek komikian? Bechdel testa abiapuntu hartuta, lantegi honetan komiki eta komikigintzan emakumeek duten trataera, presentzia eta funtzioak aztertuko ditugu Ainara Azpiazu Axpi (Igeldo), ilustratzailearekin batera.
  • Antonio Altarriba eta Kim: El arte de volar eta El ala rota komikien aurkezpena (gaztelaniaz, Udal Liburutegi Nagusia, azaroaren 10ean, 19:30ean): Antonio Altarriba (Zaragoza) gidoilariak eta Joaquim Aubert Puigarnau Kim (Bartzelona) marrazkilariek XX. mendeko Espainiako historia politikoaren errepasoa egiten duen El arte de volar (2009) eta argitaratu berri den El ala rota (2016) komikiez osatutako duologiaren aurkezpena Juanma Díaz de Guereñu eta Luis Gascarekin.
  • Splendor in the grass: Come Prima ikuskizuna (Tabakalera, azaroaren 12an, 21:00etan): Komikia eta musika uztartzen dituen ikuskizun honetan Splendor in the Grass taldeak soinu banda jartzen dio 2014ko Angulemako Nazioarteko Komiki Jaialdian Fauve d'Or (lan onenari saria) irabazi zuen Lionel Papagalli Alfred marrazkilariaren Come Prima lanari. Oholtza gainean, komikiaren irudi eta testuak jasotzen dituen diaporama dinamiko bat proiektatzen duen pantaila eta ilunpean, Frantziako taldea, 60 hamarkada hasierako Italiara eramaten gaituen istorio hunkigarriaren erritmora.

Iñaki Martiarena Mattin: “Lokatzak bere burua zaindu nahi du, eta 'zaindu' hitza 'zaina' hitzetik dator”

e-gor 2016/11/04 19:05
"Zarrakamalda" komiki-liburu mardula atera berri du Txalaparta argitaletxearekin
Iñaki Martiarena Mattin: “Lokatzak bere burua zaindu nahi du, eta 'zaindu' hitza 'zaina' hitzetik dator”

Irudia: Mattin

(Elkar argitaletxearen aldizkariko 2016ko udazkeneko zenbakian argitaratutako artikuluaren jatorrizko extended bertsioa)

Ibilbide luzea du Iñaki Martiarena Mattin donostiarrak euskal komunikabide eta argitaletxeetan, marrazkilari bezala. Berak ilustratutako liburu kopurua kontaezina da, eta komiki ugari ere egin du: hainbat komunikabidetarako umore grafikoa landu du (Egunkaria, Berria, Argia, Aizu!, Gaztezulo, Irutxulo...), komikiak argitaratu ditu Ipurbeltz edo Napartheid bezalako komiki-aldizkarietan, Donostia sutan 1813-2013 elkartearentzat Sua itzali, hiria piztu komikia egin zuen duela hiru urte... Orain Zarrakamalda komiki-liburu pertsonala argitaratu du Txalaparta argitaletxearekin. Ia 300 orriko komiki mardul honetan, Lokatza ezizeneko pertsonaiaren barne-arazoak eta baratze bat aurrera ateratzeko abenturak kontatzen dizkigu Mattinek.

Kontaiguzu, Mattin, zeri buruz da Zarrakamalda komikia?

Lokatza izeneko gizon bati buruzko komikia da. Lokatzak badauka barruko borroka bat, ez du bere burua kokatzen, bere lekua egin nahi duen gizon bat da. Eta ezinegon horrek eramaten du baratze bat egitera.

Baratzeak badirudi ere gai nagusia, gauza gehiago dago komikian.

Nire helburua ez da izan baratzeen inguruko doktorego-tesi bat idaztea, edo nik baratzeei eta naturari buruz dakidana plasmatzea. Alderantziz, kontzeptu horietan ez dut ito izan nahi. Lokatzaren barne borrokak dira gai nagusia. Krisi ekonomikoak dakarkio krisi existentzial bat, edo alderantziz, badago bien arteko elkarlotura bat. Bere barruko bakea bilatu nahian dabil. Irtenbide bat bilatu nahi dio bere arazoari, eta ikusita kaleak eta hiriak ez diola deus eskaintzen irtenbide bat bilatzen saiatzen da, baratzearen bidez. Lokatzak maitatzeko eta maitatua izateko behar ikaragarria dauka, eta horrek eraman du baratze bat egitera. Bere burua zaintzen du beste norbait edo zerbait zaintzearen bidez. Eta “zaindu” hitza “zaina” hitzetik dator gainera.

Zergatik Zarrakamalda izenburua?

Nafarroan birao gisa erabiltzen omen da, norbaiti ergela edo mozoloa deitzeko, baina liburuko zentzuan zarrakamalda bat da sasia mozteko tresna zahar bat, igitai baten antzekoa baina kirten luzea daukana. Gipuzkoa aldean “aihotza” esaten zaio, baina nik liburu batean irakurri nuen “zarrakamalda” hitza eta gustatu zitzaidan. Tresnak eraman ninduen komikia idaztera eta marraztera. Zarrakamalda irudi bat da: bere bizitza sasiz beteta dago eta baratzearekin eta zarrakamaldarekin sasi horiek mozten doa, pixka bat argitasuna sartzeko bere bizitzan.

"Lokatzaren bizitza sasiz beteta dago eta zarrakamaldarekin sasi horiek mozten doa"

Beraz, egungo bizitzak sor ditzakeen arazo existentzialak kontatu nahi izan dituzu.

Beno, komikiaren sortze prozesua katarsikoa izan da. Hasieratik ere ez nuen oso garbi zehazki zein bilakaera izango zuen. Gero, nik erdia jartzen dut eta beste erdia irakurleak, bakoitzak bere interpretazioa egingo du hor kontatzen denaz. Azken batean horrelako proiektu bat egitea baratze bat aurrera ateratzea bezalakoa da: lursaila ondo kokatzen duzu ez galtzeko, gero zuk landatu egiten duzu, eta azkenean ateratzen da ateratzen dena.

Apur bat autobiografikoa da? Zenbat du Mattinek Lokatzaz, protagonistaz?

Komikian pertsonaiek egiten eta esaten duten guztiak ez du zertan nire iritzia edo bizipena izan behar. Baina jakina, horko hainbat pasarte eta erreferentzia nire hurbilekoak dira.

"Komikiaren sortze prozesua katarsikoa izan da"

Zein generotan kokatuko zenuke komikia?

Tonu egokia asmatu nahian hor ibili nintzen tentuz, ez sobera dramatikoa eta ez sobera umoristikoa egin nahian, entsalada horretan osagai denak ongi nahasten.

Irudiak zuri beltzean dira eta itxuraz sinpleak, baina nahita bilatutako sinpletasuna da.

Gustuko grafismo bat aukeratzen saiatu naiz, istorioari egokitzen zaiona. Nire helburua izan da istorio bat kontatzea hitzaren eta marrazkiaren bitartez. Hitza eta marrazkia kiribiltzen saiatu naiz, leka arban bezala. Hor tentsio bat sortzen da hitza eta marrazkiaren artean, ahalegin handia izan da, baina pozik geratu naiz emaitzarekin.

Hitzekin estilo propio bat duzu, hitz gutxi erabiltzen duzu. Ez da testu luzerik, elkarrizketak laburrak dira.

Ez dut nire burua ito kontu literariotan, hizkuntza jantzia ote den edo ez. Hitzekin jolastea maite dut. Jolasaren kontzeptua oso inportantea izan da niretzat, ez hitzekin bakarrik. Proiektu osoan jolastea izan da helburua, gustura izatea eta eroso aritzea baratze honetan.

"Horrelako proiektu bat egitea baratze bat aurrera ateratzea bezalakoa da"

Hitz joko asko daude komikian, Belardon ere asko erabiltzen dituzu.

Bai, gaztetako nire joera bat da. Nire jatorria umore grafikoa da, beraz ezinbesteko osagaia da niretzat umorea eta hitzekin jolastea.

Alde horretatik, Olariaga eta Zakilixuten eskolakoa zara.

Hemen ez dago isolatzerik, dena apur bat korala da. Denok txalupa berean gaude eta elkarri lagundu, kutsatu eta eragiten diogu, halabeharrez.

"Hitza eta marrazkia kiribiltzen saiatu naiz, leka arban bezala"

Lan erabat pertsonala da.

Lan guztiz pertsonala izan da, bai, enkargurik atzean egon gabe. Alde horretatik, Zarrakamaldaren dohain onenetako bat da zintzoa dela, inoiz baino zintzoagoa izan naiz nire buruarekin. Libre izan naiz nahi nuena egiteko.

Euskadin rokanrolak ez badu inoiz dirurik emanen, komikiak gutxiago. Nola animatzen da bat euskarazko komiki bat proiektu pertsonal gisa egitera?

Komikiarekiko maitasuna dago atzean. Heldu nintzen puntu batera non horrelako zerbait egitea falta zitzaidan. Zinta formatuan lan egin dut, ilustrazioan, diseinuan, zuzeneko emanaldian... Nire buruari esan nion: zuhaitzak landatu ditut, baina libururik ez dut. Formatu honetan lanik egin gabea nintzen, istorio ahaltsu bat ikusi nuen nire barruan eta iruditu zitzaidan forma hau eman ahal zitzaiola. Egia da kemen handia behar dela, zure buruarengan ikaragarri sinistu behar duzula eta lan asko egin behar dela, baina orain pozik egoteko moduan nago. Azken hitza irakurleak izango du, baina ni behintzat pozik nago. Apaltasunez baina harrotasunez ere.

Gainera lan hain mardula, ia 300 orri...

Aurretik egiteko lan modua epe motzekoa izan da. Hau mugarri bat da nire lanean, nire bilakaera profesionalean zein sortzailean. Nire buruari galdetu nion: badut barruan istorio bat kontatu nahi dudana, luzea izan daitekeela uste dudana. Ez nuen luzeegia ezta laburregia izatea nahi, eta azkenean asmatu dudala uste dut.

"Proiektu osoan jolastea izan da helburua, gustura izatea eta eroso aritzea baratze honetan"

Urte askotako lana izango zen, ezta?.

Hori da. Aspaldiko proiektua da hau, badira jada urte batzuk idazten hasi nintzela, baina beste zereginetan ere ibili naizenez gero, ez dut denborarik izan nik nahi nuen epeetan eta erritmoan lan egiteko.

Denbora gutxian baratzeei buruzko bi komiki atera dira euskaraz, Altza porru eta hau.

Altza porrun ere parte hartu dut. Baina proiektua jaso nuenean, harrez gero bukatuta nuen Zarrakamalda. Kasualitatea izan da.

"Zarrakamaldaren dohain onenetako bat da zintzoa dela, libre izan naiz nahi nuena egiteko"

Kasualitatea izateko gehiegi ez? Euskal Herrian kezka bat egongo da gai horren inguran edo modan dagen gaia da agian, natura eta baratzea...

Bai, baliteke Lurrarekin daukagun harremanaren isla bat izatea.

Zein publikorentzako modukoa da Zarrakamalda?

Nik uste dut komiki honek ase dezakeela bai komikizalea eta baita ere naturazalea. Eta ez horiek bakarrik, esan bezala natura eta baratzeaz haratagoko gauzak ere kontatzen dira. Eta formatuagatik (zuri-beltzean), euskara jantzian izateagatik, atsegina izateagatik... iruditzen zait ase dezakeela komikia sobera ezagutzen ez duen eta naturazalea ez den pertsona ere.

Lan hau nobela grafiko bat dela esango zenuke?

Ez nintzateke horrelakoetan sartuko, zer den nobela grafikoa eta zer ez, zerk egiten duen lan bat nobela grafiko... Konplexuen ondorio da askotan komiki bati nobela grafiko deitu nahi izatea. Nik komiki-liburua deitzen diot, arazorik gabe.

Parrapean III. Komiki Egunak hemen dira!

e-gor 2016/10/24 21:05
Martxan dira nagusiki euskal komikiaren inguruan Bilbon egiten diren jardunaldiok
Parrapean III. Komiki Egunak hemen dira!

Irudia: Adur Larrea

  • Xabiroi aldizkaria: 11 urte (Santutxuko Udaltegia)
  • Cavall Fort: 50 anys (Santutxuko Udaltegia)
  • Wanne-Eickel Maturtene, Irkus M. Zeberio eta Marlene Kraus-en komikiak (Begoñako Udaltegia)
  • Antton Olariaga: marra eta hitza (Begoñako Udal Liburutegia)
  • 10:00etatik 13:30era (Begoñako Udaltegiko Liburutegia): Danbalahara! Euskal onomatopeiekin lanean komikiaren sormen eta edizioari buruzko tailerra Irkus M. Zeberio eta Marlene Kraus-ekin.
  • 13:30ean (Begoñako Udaltegia): Wanne-Eickel Maturtene erakusketan bisita gidatua Irkus M. Zeberio eta Marlene Kraus egileekin.

Ostirala 28

  • 10:00etatik 13:30era (Begoñako Udaltegiko Liburutegia): Danbalahara! Euskal onomatopeiekin lanean komikiaren sormen eta edizioari buruzko tailerra Irkus M. Zeberio eta Marlene Kraus-ekin.
  • 19:00etan (Santutxuko Udaltegia): Cavall Fort y Xabiroi: trayectoria de dos publicaciones mahai-ingurua. Nik aurkeztuta, Merçe Canela (Cavall Fort-eko zuzendaria), Cristina Losantos (marrazkigilea), Oriol García (marrazkigilea) eta Dani Fano (Xabiroi-ko koordinatzailea) izango dira parte-hartzaileak. Amaitutakoan, bisita gidatua egingo da bi aldizkariei buruzko erakusketetan zehar.

Larunbata 29

  • Goizean eta arratsaldean (Karmelo plaza): Euskal komikiaren azoka.
  • 10:00etan (Santutxuko Udaltegia): Irakurle gaztetxoentzako komikien sotze- lana: gidoia, zirriborroak, tinta eta kolorea helduentzako tailer irekia, Cristina Losantos marrazkigilearen eskutik.
  • 11:00etatik 14:00etara (Karmelo Plaza): Komiki-tailerrak ume eta gazteentzat, Amaia Ballesterosek emanak.
  • 12:00etan (Karmelo Plaza): Antton Olariagari “Joseph Camino” sariaren emate-ekitaldia eta Antton Olariaga eta Asisko Urmenetaren arteko elkarrizketa.
  • 12:30ean (Karmelo Plaza): Harkaitz Cano eta Iñaki Holgadoren Museo Bilduma komikiaren aurkezpena, Dani Fanok aurkeztuta eta egileak bertan direla.
  • 16:00etatik 19:00etara (Karmelo Plaza): Komiki-tailerrak ume eta gazteentzat, Amaia Ballesterosek emanak.
  • 17:30ean (Karmelo Plaza): Gregorio Muro Harriet eta Daniel Redondoren Jon eta Mirka komikiaren aurkezpena, Ion Iñaki Artetxek aurkeztuta eta egileak bertan direla.
  • 18:00etan (Karmelo Plaza): Patrick Cothias, Patrice Ordas eta Jack Maniniren S.O.S. Lusitania komikiaren aurkezpena, Ion Iñaki Artetxek aurkeztuta eta Patrice Ordas eta Gregorio Muro argitaratzailea bertan direla.
  • 18:00 (Karmelo Plaza): Bilboko Casal de Bilbao katalanen etxearen eskutik Castanyada (musika eta gaztainak banatzea).
  • 19:00 (Karmelo Plaza): Toma Castaña! ipuin-kontaketa (LaRitual).
  • 20:00 (Café Teatro La Nube): amaiera-ekitaldi gisa, Zirriborroka katalan eta euskal marrazkigileen arteko desafioa (Oriol García eta Sussana Martín vs. Ainara Azpiazu Axpi eta Joseba Larratxe Josevisky). Aurkezlea eta Dj: Amaia Pérez de Arriluzea.

"Jon eta Mirka", "SOS Lusitania" eta "Museo bilduma", euskarazko komiki berriak

e-gor 2016/10/17 22:15
Harriet argitaletxeak atera ditu lehen biak eta Xabiroik azkena

"Jon eta Mirka", "SOS Lusitania" eta "Museo bilduma", euskarazko komiki berriak
Irudia: Redondo / Manini / Holgado
...Eta hasiko gara udazkeneko komikien berri ematen!

Gregorio Muroren Harriet argitaletxea, besteren artean, 80ko hamarkadan berak gidoitutako komikien edizio osoak berrargitaratzen ere ari da. Iaz Justin Hiriarten txanda izan zen, eta orain Daniel Redondok marraztutako Jon eta Mirka berreskuratu du. Gazteentzako zientzia fikziozko komiki hau abenturaz, robotez eta estralurtarrez betea dago. Serie honen lehen albuma bere garaian euskaraz ere atera zen, baina bigarrena ez zen hemen argitaratu, soilik Frantzian eta beste herrialde batzuetan, beraz euskal publikoarentzat berria da. Azkenik, klasiko hau osorik euskaraz!

Harriet argitaletxearen eskutik datorkigu Frantziako hiru albumeko SOS Lusitania seriearen edizio osoa ere, gidoia Patrick Cothias ezagunak (Les sept vies de l’épervier / Las siete vidas del gavilán sonatuaren gidoilaria) eta Patrice Ordasek eta marrazkiak Jack Maninik egindakoak dituena. 1915ean alemanek torpedoz erasotutako Lusitania itsasontziaren hondoratzearen gertaera historikoa kontatzen da, intrigaz betetako istorioan. Luxua horrelako lan bat euskaraz izatea!

Eta bukatzeko, Xabiroi aldizkarian atalka agertutako istorioen urteroko albuma ere atera da. Harkaitz Canok gidoilari gisa eta Iñaki Holgadok marrazkilari moduan osatzen duten tandemaren hirugarren istorioa da Museo bilduma, ikuskatzaile misteriotsu batek munduko museorik bitxienetan zehar egiten duen bidaia kontatzen duena. Egile bikotearen ohiko kalitate bikainarekin, jakina!

Bide batez, Harriet argitaletxearen bi komikien aurkezpena urriaren 19an egingo da Donostiako Komikigunean goizeko 11:00etan.

Bi komiki erakusketa urrian Donostian

e-gor 2016/10/13 22:20
Euskal binetak 1894-2014 Komikigunean (Mikel Begoñak bisita gidatua egingo du bertan 20an) eta Fantascity Egiako Kultur Etxean

Hilabete honetan Donostian bi komiki-erakusketaz gozatzeko aukera izango dugu. Batetik, Komikigunean Euskal binetak 1894-2014 erakusketa dago ikusgai irailaren 26tik, eta urriaren 28ra arte egongo da zabalik. Duela bi urteko Parrapean jardunaldietarako prestatu zuen euskal komikigintzaren errepasoa egiten duen erakusketa ezin interesgarriago hau Mikel Begoñak (Komikeri blog ezinbestekoaren egileak), eta erakusketa Mikel berak gidatuta bisitatzeko parada izango da 20an arratsaldeko 19:00tan. Bestetik, Egiako Kultur Etxean Fantascity - Fantasiazko hiriak komikietan erakusketa ikus daiteke urriaren 3tik 38ra bitartean. Ikustera joan, merezi dute eta!

"Altza porru", Jakoba Errekondoren "Bizi baratzea"ren jarraipena komikian

e-gor 2016/10/12 16:20
Errekondoren testuak hainbat komikigileren istorioekin tartekatzen dira bertan
"Altza porru", Jakoba Errekondoren "Bizi baratzea"ren jarraipena komikian

Irudia: Asisko

Udazken honetako komikien berri ematen hasi baino lehen, ekainean atera zen Altza Porruren berri ematea tokatzen zen. Jakoba Errekondo ezagunak iaz Argiarekin ateratako Bizi baratzea liburu arrakastatsuaren jarraipena edo osagarria da Altza Porru komiki hau. Hartan baratzezaintzari buruzko bere jakintza eta gomendioak bildu bazituen, beste honetan baratzearen inguruko bere testu ludiko-poetiko batzuk (eta Maialen Lujanbioren sarrera) badaude, baina batez ere baratzea gaitzat duten hainbat komikiz osatuta dago. Egile ugarik egin dituzte komikiok: Unai Iturriaga, Asisko, Iñaki Martiarena Mattin, Ainara Azpiazu Axpi, Zaldieroa, Unai Gaztelumendi, Antton Olariaga eta Joseba Larratxe Josevisky. On egin!

Emakumeak eta euskal komikigintzari buruzko ikastaroa Durangon udazkenean

e-gor 2016/10/06 18:35
Andragunea Emakumeon Topaguneak antolatuta eta Josune Muñoz adituaren eskutik

Ikastaroaren kartela

Durangoko Andragunea Emakumeon Topaguneak Emakumeak eta euskal komikigintza ikastaroa antolatu du. Urriaren 27tik abenduaren 22ra bitartean izango da, ostegunetan 17:00etatik 19:00etara. Skolastika Literatur Zerbitzuak zentroko Josune Muñoz izango da irakaslea, gai horretan benetako aditua. Interesgarria zinez!

Intxaurrondoko komiki-solasaldien kurtso berria

e-gor 2016/10/04 21:15
Lau saio euskaraz izango dira, neuk gidatuta

Solasaldien kartela

e-gorblog

e-gorblog

Egunez, Igor Leturia Azkarate pertsona arrunta da. Errenterian bizi den arrasatearra, 8etatik 15etara Elhuyarren lan egiten du eta arratsaldeak neskarekin eta bere bi umeekin pasatzen ditu.

Baina gaua iritsi eta umeak lotara joaten direnean, e-gor bihurtzen da, interneteko bere alter-egoa, ziberespazioko informatikaririk komikizaleena eta komikizalerik informatikariena! Bere superbotereekin (interneteko kable-konexioa, bloglines, informatika aldizkariak, gadget-ak, komiki-bilduma, Errenteriko liburutegiko komikien atala eta batez ere bere jakinmin aseezina) eta bere superlaguntzaileak ondoan dituela (Patxi Lurra, DabilenHarria...), euskaldunon teknofobiaren eta komikiei buruzko aurreiritzien aurka burrukatzen du etengabe! Hemen duzu bere bloga: e-gorblog!

Bai, hor goiko aurkezpena superheroi batena da (ezin aproposagoa honelako blog batentzat, ezta?). Superheroia banintz zein izango nintzatekeen jakiteko the Superhero Personality Test egin nuen eta hona emaitzak:

You are Spider-Man
You are intelligent, witty, a bit geeky and have great power and responsibility.

Spider-Man
80%
Superman
70%
Green Lantern
65%
Robin
65%
The Flash
60%
Supergirl
55%
Hulk
55%
Iron Man
45%
Wonder Woman
35%
Catwoman
25%
Batman
0%
Lizentzia

Creative Commons-en baimena
Blog honetako edukia, Igor Leturiak eta beste kolaboratzaile batzuek egiten dutena, Creative Commons Aitortu-PartekatuBerdin 3.0 Unported baimen baten mende dago (irudiak salbu).

Harpidetza
  • Harpidedunak:
  • e-gorren blog pertsonala (komikiak, informatika eta beste) RSS jarioa
  • E-mail harpidetza
  • Twitter-en jarraitu:
  • Erantzunen harpidetza
  • Harpidedunak:
  • RSS jarioa
  • E-mail harpidetza
  • Artxiboa
    2004 2005 2006 2007 2008 2009 2010 2011 2012 2013 2014 2015 2016 2017
    Artikulu aipagarriak

    MythTV sorta
    2004/11

    "Pololoak" sorta
    2004/11-12 - 2006/10-12 - 2007/02-03

    Monoblogoa
    2005/01/11

    "Persepolis", xalotasunaren sakontasuna
    2005/01/25

    Elgetako Blogs&Beers 2005: nire inpresioa eta moblogging kontuak
    2005/04/18

    Firefox eta bere plugin zoragarriak
    2005/05/11

    "El País"-en komiki bilduma
    2005/05/15

    Euskarazko bi blog berri (bai, beste bi, baina hauek bereziak dira!)
    2005/05/25

    "Watchmen" sorta
    2005/09-11 - 2006/10 - 2007/10 - 2008/07

    "La cárcel de papel"-eko "Mis tebeos favoritos" saila I: 1etik 20ra
    2005/11/08

    "Goienkaria"-n agertu naiz
    2005/12/08

    Komikiak eta euskal rock-a
    2005/12/14

    Ruben Arozena "Ruben" komikigilea hil da
    2006/01/02

    Zope-rako DTML Calendar Tag produktua, euskaraz
    2006/02/01

    "Joyas Literarias Juveniles" bilduma, osorik eMule-n
    2006/08/05

    Argazkigintza eta DRM-a
    2006/10/09

    Paul Auster eta Euskararen Herria
    2006/10/29

    Angoulême sorta
    2007/01-02

    Gaur duela 25 urte nire bizitza aldatu zen
    2007/04/23

    Hergé-ren defentsan
    2007/05/22

    Ubuntu-ren bertsio berria, hobekuntza askorekin
    2007/07/02

    OLPC sorta
    2007/12 - 2008/01

    Guillermo Zubiaga, Marvel-eko komikilari euskalduna
    2008/02/05

    Asus EEE PC, ordenagailu txiki eta merkeen hurrengo sorta
    2008/03/11

    Agur, Ipurbeltz, agur... :-(
    2008/08/04

    "Café Budapest", gizatasuna eta bizikidetzaren aldeko aldarria
    2008/08/25

    "Arturo Erregea" serie mitikoa, Euskal Encodings-en! (beste askorekin batera)
    2008/09/17

    "Gazteak", beste serie mitiko bat euskaraz eskuragai!
    2008/10/14

    Pottokiek 50 urte!
    2008/10/22

    Europan ere OLPC-ren XO ordenagailuak erosteko aukera!
    2008/11/12

    Microsoft-en web zerbitzuetako gehienak, euskaraz!
    2008/12/04

    "Heroes"-en 2. denboraldia: ETB kirtenkeria errepikatzera, eta Euskal Encodings konpontzera
    2009/01/23

    I. Euskal OLPC Party-a, apirilaren 23an Donostiako Doka kafe antzokian
    2009/04/16

    Elkarrizketa egin didate 7K-n
    2009/06/03

    Azpiriren Spectrum-entzako jokoen azalak liburu batean
    2009/10/06

    Asterix, heroi garaitua
    2009/10/29

    "Ihes ederra", euskarazko komikigintzaren heldutasunaren konfirmazioa
    2009/11/13

    Pololoak 3: The making of
    2009/11/22

    5 urte 5!
    2009/12/15

    Nobela grafikoa, komikien prestigiorako ala mespretxurako?
    2009/12/20

    "Pololoak 3 - Atxeritoko balada", trilogiaren amaiera borobila
    2010/01/13

    Sinclair ZX Spectrum bat oparitu didate!
    2010/01/19

    Zergatik ez dudan liburu elektronikorik erosiko (gauzak aldatzen ez diren artean)
    2010/01/27

    Errealitate areagotua: munduaren pertzepzioa aberasten
    2010/02/09

    e-gorblog, "Nick dut nik" telebista saioan
    2010/05/20

    Sarearen neutraltasunari erasoak: Interneten izaera arriskuan
    2010/06/02

    "Avatar, azken aire maisua" osoa eta "Heroiak"-en lehen bi denboraldiak, Euskal Encodings-en
    2010/07/22

    Sistema eragileen guda berria
    2010/12/14

    Anubis 3.0 albumarentzat 3D animazio ederra
    2010/12/27

    Telebistaren benetako iraultza hemen da, eta ez da LTDa
    2011/01/10

    "Asterix galiarra" eta "Urrezko igitaia" berrargitaratu ditu Salvatek
    2011/01/13

    Euskarazko komikigintza digitalizazioaren aurrean
    2011/01/27

    "Ihes ederra"ren gaztelaniazko eta katalanezko bertsioak eta "Alokairuan", kalean
    2011/02/20

    Star Wars jatorrizko trilogia, euskaraz
    2011/03/21

    Sare sozialetan preso
    2011/04/06

    Zer dudan Steve Jobsen, edo Appleren, aurka
    2011/10/14

    Gaur 100 urte Adèle Blanc-Sec-en abenturak hasi zirela
    2011/11/04

    Euskarazko 8 komiki berri
    2011/12/02

    Social networks killed the RSS star?
    2012/06/10