e-gorblog

Berriz ere La cárcel de papel-en bidez jakin dut Motsukora elkarteak bere Manga eta Anime Jardunaldiak antolatu dituela hamargarrenez. Gaur martxoaren 25etik 29ra izango dira, Barakaldoko Clara Campoamor kultur etxean.

Programa oparoa dute, lau aretotan anime eta irudi errealeko filmen proiekzioak, hitzaldiak, erakusketak, lehiaketak, bideojokoak eta beste hainbat ekintza gauzatuko dituzte. Hemen duzue programa osoa eta ekintzen zerrenda.

Zoritxarrez, web gune osoa gaztelaniaz soilik dago eta filmak, hitzaldiak etabeste ekintzak ere hala direla dirudi...

La cárcel de papelen bidez jakin dut Bruguera etxeak 1970 eta 1983 urteen artean argitaratutako Joyas Literarias Juveniles komiki-bilduma mitikoa, gazteentzako eta abenturazko literaturaren klasikoen komiki-bertsioz osatua, berriz erosteko aukera izango dugula Zeta bolsilloren eskutik, hainbat album bateratzen dituzten tomotan.

269 aleko bilduma horretan Jules Verne, Walter Scott, Mark Twain, Charles Dickens, Karl May, Robert Louis Stevenson, Daniel Defoe, Emilio Salgari eta beste hainbat egileren abenturazko literaturaren klasikoak komiki-formatoan atera zituzten. 30-40 urte bitartean dugun jende asko horien bidez zaletu ginen ez bakarrik komikietara, baita literaturara ere, eta askok nostalgiaz gogoratzen ditugu komiki haiek eta amesarazten zizkiguten abenturak. Adibidez, Eibartarrak posta-zerrendan Elena Laka, Julen Gabiria eta beste batzuk horri buruz aritu ginen duela hiru urte inguru. Gero duela urte eta erdi blog honetan publikatu nuen denak eMule-n aurki zitezkeela, eta album guztien zerrenda ere erantsi nuen. Ba artikulu hori da hilero-hilero blog honetatik hilero-hilero bisita gehien jasotzen duena!

Jada atera dira Jules Verne eta Emilio Salgariren lanak dituzten bi tomoak. Erosi beharko ditut, haurrentzako, badakizue... ;-)

Lankide txapas batek ;-) Asus EEE PC bat erosi du AEBetatik zuzenean eskatuta. Subnotebook motakoa da Asus EEE PC ordenagailua, hau da, txiki-txiki horietakoa, baina aspalditik existitzen diren Sony Vaio eta antzekoak ez bezala, merke-merkeetakoa ere bada, OLPC proiektuak irekitako lineakoa beraz.

Nik OLPC XO bat dudanez, ekidinezina da bien arteko konparaketa. Abantaila hauek ditu XOak EEErekiko:

• Pantaila zertxobait handiagoa du XOk, baina erresoluzioa askoz handiagoa: 1200x900, eta EEEk 800x480 besterik ez (argazkian ikusten da blog honen lehen orria nola ikusten den bakoitzean)
• Gutxiago kontsumitzen du XOk (irakurritakoagatik diot, EEEa ez baitut konprobatzeraino bezainbeste erabili) eta gutxiago berotzen da (hau bai da nabarmena, oso gutxi erabilita ere nabaritzen zaio beroa EEEari, eta OLPCri bat ere ez)
• Liburu elektroniko moduan erabili daiteke XOa pantaila biratuta
• XOa merkeagoa da, bestearen erdia baino gehiago; hori bai, hemen lortzeko orain arte egon den modu bakarra bikoitza ordainduta izan denez, antzera kostatu zaizkigu

Aldiz, gauza hauetan da EEE hobea XO baino:

• Nabarmen arinagoa da (eta hori XO ere oso arina izanik!), eta txikiagoa ere bai (irekita antzekoak dira, baina itxita XOa handiagoa da heldulekuagatik)
• EEE azkarragoa da (amen jesus baten pizten da!), memoria handiagoa du (512 MB, bestearen bikoitza) eta kapazitate handiagoko Flash memoria (2 GB-tik 8 GB-ra, XOk 1 GB soilik)
• Biek dituzte bozgorailuak, mikrofonoa, bideokamera (2 GB-ko EEE modeloak ez), hiru USB ataka, SD txartelarentzako slot-a, Wi-fi konexioa eta mikrofono eta bozgorailu konexioak, baina horiez gain EEEk monitore eta Ethernet konexioak ere baditu
• EEEk gure eguneroko erabilerarako ohikoak diren aplikazio gehiago dakartza instalatuta (Xandros Linux banaketaren gainean, Skype, Firefox, OpenOffice eta horrelakoak baditu, eta nahi izanez gero Windows XP ere instala dakioke); OLPCk hezkuntzarako software gehiago du, baina ez horiek (nahiz eta norberak instalatu diezazkiokeen)

Guztia honela laburbilduko nuke nik: OLPCa ingeniaritza lan guztiz iraultzailea da kontsumoan, aprobetxamenduan, kostuan eta abarretan eta hezkuntzarako zoragarriak diren aplikazio mordoa ditu, eta beraz bikaina da pentsatuta dagoenerako, hau da, hirugarren munduko haurren hezkuntzarako (nahiz eta guk eman diezaiokegun erabilerarako ere prestatu daitekeen); Asus EEE PCa, aldiz, beste moldaketa edo instalaziorik gabe lehen munduko edozein erabiltzaile asetzeko moduko benetako eramangarria da (benetakoarena azpimarratuz, ez orain arte eramangarritzat saldu dizkiguten ladrilo garesti horiek bezala).

Edonola, konparazio honek ez du zentzu gehiegirik ere, liga ezberdinetan baitaude biak. OLPCak hirugarren munduko haurrentzat soilik dira, beraz, 1x2 promozio kanpainaren bat salbu, Asus EEE PCa da lehen munduko publikoak eskura dezakeen bakarra. Eta, zalantzarik gabe, oso-oso aparatu majoa da. Nik erosiko nuke, bestea ez banu (edo izanda ere bai, agian... ;-). Ikastolen Elkarteak aukera ona egin du IkaSYS proiekturako.

Oraindik ez dago Espainian salgai, baina inportatzaile batzuen bidez lor daiteke. Hala ere, horien bidez AEBetako  prezioa baino dezente garestiago ateratzen da. Lankideak eBayn erosi du 4 GB-ko modeloa 300 eurotan (AEBetako prezioan), eta hori bera aipatutako inportatzaile horretan 60 euro garestiagoa da (bidalketa gastuak antzekoak dira batean zein bestean).

Bi asteren tartean, paperezko bi mediotan OLPCri buruzko artikulu bana agertu da, eta biak ilustratzeko gure XOri egindako argazkiak erabili dira.

Lehena Berrian agertu zen, otsailaren 21eko kontraportadan. OLPCri buruzko artikulua egin nahi zuen Irune Lasa kazetariak, eta etxera etorri zen argazkilari batekin batera (ez dut bere izena gogoratzen, barkatu) XOri, Ximuni eta Hurri argazkiak ateratzeko eta haurrei eta niri galderak egiteko. Artikulua argazkiarekin hemen duzue PDF formatuan.

Bigarrena Elhuyar Zientzia eta Teknika aldizkarian agertu da, martxoko alean. Nik idatzitako bost orriko artikulua da, eta honek, gure XOaren argazkiez gain, berau daukaten hirugarren munduko hainbat tokitako irudi ederrak ere baditu (Mongolia, India, Uruguay...). Sarean osorik oraingoz harpidedunentzat soilik dago, beraz irakurri nahi baduzue paperezkoa erosi beharko duzue, edo harpidetu. Ez zaizue damutuko, benetan (eta ez diot nire artikuluagatik, aldizkariaren kalitate eta interesgarritasunagatik baizik).

Oraingoan garaiz iritsi zait etxera Ikastolen Elkarteak ateratzen duen Xabiroi komiki-aldizkaria, otsaileko alea otsailean bertan alegia, eta lau ale gainera (norbaitek lortzeko arazorik izaten badu, lasai eskatzea dauka).

Jarraian datorren edukia aurkituko duzu bertan, hemengo ordena berean:

• Nik neuk egiten dudan Albisteen txokoa
• Manu Ortegaren Haizea banda
• Auzomorro umorezko orri bikoitza, Guaikaipuroren gidoia eta Alex San Vicenteren irudiekin
• Javier de Isusiren Eguzkiaren herria, sei orriko luxuzko kolaborazioa
• Zaldi Eroaren Arranotxu bikainaren beste bi orri
• KomikiTAUN elkarrizketen orria, oraingoan Raquel Alzaterekin
• Asiskoren Hor Konpost banda
• Dani Fanoren Anubis 3.0 sail berriaren 12 orri; adi sail honi, lehenengo atalak asko prometitzen du
• Julen Ribasen Ikasten 4 orriko istorioa
• Olierrek asmatutako eta Markok marraztutako Haratagoren beste lau orri

Gainera Dani Fanok, Anubis 3.0 sailaz gain, sailari buruzko bloga ere estreinatu du: http://psikostasia.blogspot.com/. Bertan sailaren berri ematen du eta sailaren gaia, hau da, psikostasia edo arima pisatzea, zer den ere azaltzen du. Itxura ederra du blogak. Berak dioen bezala, "Blog honetan sailaren inguruko irudiak, berriak, hausnarketak, amarruak eta ezkutuko zirrituak ipini nahi ditut agerian. Aitor daitezkeen sekretuak, eta aurpegiratuko dizkidazuen gezurrak". Ongi etorri euskal blogosferara, jefe!

Informazio gehiago:

• Euskaraz: http://www.egunkaria.info
• Gaztelaniaz: http://www.javierortiz.net/voz/egunkaria

Technorati etiketa: egunkarialibre

Komikiak egiten badituzu, udaberri honetan bi aukera polit dituzu zure lana bultzatzen eta ezagutarazten saiatzeko. Batetik, urtero bezala martxan da berriz ere Basauriko Kultur Etxeak antolatzen duen Ganorabako 2008 komiki-lehiaketa. Martxoaren 31 bitarte dago lanak bidaltzeko aukera. Lehenengo saria 900€ dira, bigarrena 450€ eta hirugarrena 300€, eta horrez gain, 300 euroko sari bana dago euskarazko lanik onenari eta Basauriko lanik onenari. Oinarri zehatzak, epaimahaia eta informazio gehiago euren web gunean aurkituko duzu. Iaz ere izan genuen hizpide lehiaketa hori, partehartzaile guztien lan guztiak online ikusteko aukera eman zutela-eta.

Bestetik, Alhóndiga Bilbao elkarteak beka bat emango dio komikigile bati Angoulêmeko La maison des auteurs zentroan urtebetez aritzeko, Europako komiki-zentro entzutetsuenean alegia. Irabazleak urtebetez bertan komiki-sorkuntzan jarduteko aukera izango du, baldintza ezin hobeagotan. Zentroko ekipamendu eta baliabide guztiak erabiltzeko eta beste bekadunekin ideiak trukatzeko aukera izateaz gain, urtebeteko alojamendua ordainduko zaio eta soldata bat ere izango du. Beka lortu nahi dutenek 18 urte beteta izan behar dituzte eta komiki bat sortzeko proiektu bat aurkeztu beharko dute, paperean edo euskarri informatikoan, idatzizko garapen batekin eta irudiekin, apirilaren 14a baino lehenago. Epaimahaiaren burua Max komikigile ospetsua izango da, berriki Espainiako Komikiaren Sari Nazionala irabazi duena. Bekaren oinarri zehatzak web gunean dauzkazu irakurgai.

Zeren zain zaudete? Benga marraztera!

A ze aurkikuntza egin duen Berriako Idoia Etxeberriak! Gaurko alean artikulu bat egin dute Guillermo Zubiagari buruz, AEBetan komikigintzan dabilen Barakaldoar bat, tartean Marvel mitikoan ere aritu dena. Han aspaldi bizi arren, euskara eta Euskal Herriarekiko loturak ez ditu galdu, eta hemengo eta euskarazko detailetxoak sartzen aritzen da komikietan.

Baina horrez gain, euskal bale-arrantzaleei buruzko komiki-liburua ere egin du, Joanes izenekoa. Trilogia baten lehenengo alea izan nahi duen komiki hau jatorrian euskaraz egin du eta gero ingelesera itzuli. Orain argitaratzaile bila ari da, bai AEBetan eta baita hemen euskaraz argitaratzeko!

Zeren zain zaudete? Sauré, Elkar, Xabiroi... Benga denok Guillermori idaztera! Euskal komikigintzak ezin du aukera hau pasatzen uzteko luxua permititu!

Joxe Rojas Teknopatak antolatutako Zazpi@2007 lehiaketa, 2007ko euskal interneteko 7 berrikuntza, ekarpen edo gertaera nagusiak aukeratzea helburu duena, amaitu berri da. Blog hau hautagaien artean zegoen eta ez da zazpi irabazleen artean geratu (eta nahiago dut horrela, ez zuen ezer pintatzen hor, ez baita 2007koa). Baina partaide naizen hiru proiektu bai gelditu dira sarituen artean. Ezin kexatu, beraz!

Lehenengoa Elebila euskarazko bilatzailea gelditu da. Elekak komertzializatutako bilatzaile honen proiektua nik zuzendu eta garatu nuen lan egiten dudan Elhuyar Fundazioko I+G sailean.

Bigarren gelditu denean ere, Euskalbar Firefoxerako barran alegia, parte hartzen dut. Baina oso parte hartze txikia, lanean egin ditudan web guneak (ZT Corpusa, CorpEus eta Elebila) kontsultatzeko botoiak jarri besterik ez dut egin. Euskalbar zoragarriaren benetako errudunak Juanan Pereyra, Julen Ruiz eta Asier Sarasua dira. Eskerrik asko eta zorionak beraiei!

Bukatzeko, laugarren gelditu den Eibar.org-en partaide ere banaiz. Hemen ere oso parte hartze txikia dut, bloga dut bertan eta ezer gutxi gehiago (beno, bai, pelmada ematen diet, beti eskaera eta arazoekin). Elkarte aitzindari hau osatzen duten guztiei ere zorionak eta mila esker!

Eta nola ez, zorionak beste irabazle eta hautagai guztiei ere!

Ikastolen Elkarteak ateratzen duen Xabiroi komiki-aldizkariaren azken bi zenbakiak ale bereziak izan dira, oso denbora tarte txikian argitaratuak. Aldizkariaren ohiko aleak, jarraipena izaten duten istorioak kontatzen dituztenak, urtean hiru izaten badira, bi hilabeteko tartean bi ale berezi atera dira, ohikoez kanpoko istorioekin.

Azaroan irten zen ale berezietako bat, urtero bezala. Bertan ondoko istorio laburrak agertu ziren: Haur besoetakoa, Unai Iturriagaren gidoia eta Alex San Vicenteren irudiekin; Tradizioa eta traizioa, Patxi Zubizarretak asmatua eta Pepe Farruqok marraztua; Ustekabeko oporrak, Arantxa Iturberen istorioa eta Manu Ortegaren marrazkiekin; Asiskoren Desertorkina; Raquel Alzateren Burbuilak; Dani Fanoren Mundu modernoa XP4.2; eta Olatz Salaberriaren Zakurraren biolina! izenburuko hitzaurrea, Dani Fanok ilustratua.

Eta orain urtarrilean beste ale berezi bat atera dute, berariaz matrikulazio kanpainarako banatzeko, eduki hauekin: Albisteen txokoa, nik neuk egina; Manu Ortegaren Haizea; "M" arrotza, A.K. Seltzer-en gidoia eta Iñaki G. Holgadoren irudiekin; Haratago, Olierrek asmatua eta Markok marraztua; Asiskoren Hor konpost; Loperen Einstein inspektorea: Heuxkaltzaina; Julen Ribasen Mutila eta botila; KomikiTAUN elkarrizketen atalean Juan Luis Landa, Iñaki G. Holgado eta Harkaitz Cano; Arthur Suydamen Mudwogs: Haurtxoa hezten; eta Zaldi Eroaren Arranotxu.

Urtarrileko ale berezi hau beste bereziak baino bereziagoa da, Ikastolen Elkarteak matrikulazio kanpainarako bereziki eskatua baita, Xabiroin eta komikian sinesten duen seinale, horrek jendea ikastoletara erakarriko duela pentsatzen du-eta. Eskerrik asko horregatik Ikastolen Elkarteari! Gainera, ale hau Ikastoletako ikasle guztiei banatu zaie, eta ohiko aleek DBHn eta Batxilergoan banatuta berez tirada handia badute (15.000 ale inguru), honek hirukoitza izan du. Egileentzat, Xabiroirentzat eta komikiarentzat orokorrean erakusleiho eta propaganda bikaina! Eta bestalde, ale hau denbora errekorrean egin behar izan da, eta hala ere erronka ondo gainditu da, betiko kalitate handiari eutsi baitzaio. Zorionak Dani Fano koordinatzaileari eta talde guztiari!