e-gorblog

(Elhuyar aldizkariko 2014ko ekaineko zenbakian argitaratutako artikuluaren jatorrizko extended bertsioa)

P2P siglek Peer To Peer ordezkatzen dute, hau da, parekotik parekora, eta berdinen arteko partekatze edo kolaborazioa adierazi nahi dute. Orain 15 urte inguru sortutako P2P sistemek, hala nola Emule eta Bittorrent, fitxategiak sarearen bidez trukatzen uzten zuten; orain bestelako kontsumo-gaiak -lo egiteko tokia eta automobil-bidaiak, esate baterako- partekatzeko P2P zerbitzuak sortu dira. Jakina, gai horiek ezin dira sarean zehar bidali fitxategiak bezala, baina pertsona batzuen ondasun partekagarriak eta beste batzuen beharrak elkarrekin lotzen laguntzen dute.

Denetarik partekatzen

Gehien ugaritu diren zerbitzu-motetako bat automobil-bidaiak partekatzekoak dira, ingelesez carpooling deitzen direnak. Horrelako zerbitzu ugari daude: Blablacar, Amovens, CircleRide... Antzeko beste zerbitzu batzuk ere sortu dira, real-time ridesharing deritzenak, non unean bertan dugun bidaia-behar bat adierazten dugun eta auto partikularren sare bat dagoen diru baten truke eramango gaituena. Adibideak: Uber, Lyft, Sidecar...

Oporretarako ostatuen partekatzea ere oso modan dago. Oporraldian etxebizitzak trukatzeko, home exchange izeneko zerbitzuak daude; HomeExchange, HomeForExchange eta LoveHomeSwap, kasurako. Beste zerbitzu batzuk accomodation sharing motakoak dira. Haietan, gure etxean ostatu ematen diogu jendeari, gu beste batzuen etxeetara joateko aukeraren truke. Mota horretakoak dira BeWelcome eta CouchSurfing. Azkenik, jendea oporretan gure etxean diru-truk ostatatzeko zerbitzuak daude; ezagunena, Airbnb.

Crowdfunding edo finantziazio kolektiboa ere partekatze-motatzat har daiteke. Kasu horretan, produktu baten finantziazio-gastuak partekatzen dira, azken produktuaren truke normalean. Kickstarter eta Indiegogo dira, ziurrenik, horietako ezagunenak.

Eta beste gauza asko partekatzeko edo eskaintzeko zerbitzuak ere badaude: otorduak (Kitchensurfing, Cookening, CompartoPlato...), denbora (TimeBank...) eta bururatzen zaigun beste edozer.

Aurkako jarrera sektore tradizionalen aldetik

Jarduera berri horiek, argi dago, hainbat ekonomia-sektoreri erasaten diete: hotelei, taxiei, garraio publikoari... Horregatik, jarduerok gehien hedatu diren tokietan, sektore horiek aurka egin diete.

Adibidez, New York eta Amsterdameko hotelen elkarteek eskatu dute Airbnb zerbitzuan eskaintzen diren ostatu-etxeei hotelen segurtasun-neurri eta zerga berak eskatzea eta lizentzia eskuratu behar izatea, eta Amsterdamen lortu ere egin dute. Espainian 2013an onartutako Alokairuen Legeak autonomia-erkidegoen esku uzten du alokairu pribatu horiek erregulatzea, eta Madrilen debekatzea pentsatzen ari dira.

Taxi-gidarien elkarteak ere Uber zerbitzuaren aurka altxatu dira hiri askotan, real-time ridesharing motako zerbitzua, finean, taxien oso antzekoa eta lehia bidegabea dela baitiote. Frantzian, Uber-en zerbitzu bat erabili aurretik 15 minutu itxoiteko araudia onartu zen, eta, gero, atzera bota zuten. Bruselan ez diote lan egiten uzten Uber-i, eta Seattle-n automobil-kopurua mugatu diote.

Airbnb eta Uber-en aurkako protestak ulergarriak dira, neurri batean, horietan ez baitago benetako partekatze edo trukerik: pertsona batzuek beren ondasun batzuk erabiltzen uzten diete beste pertsona batzuei diru-truke; beraz, irabazi-asmoz egiten den aktibitatetzat har daiteke. Gutxiago ulertzen da Espainiako autobus-konpainien elkarte Fenebús-ek benetako automobil-bidaien partekatzea ahalbidetzen duen Blablacar-en aurka jarritako salaketa eta itxiera-eskaera.

Crowdfunding ari dagokionez, Espainiako Gobernuak hura erregulatzeko proposatu zuen legeak hautsak harrotu zituen sarean, murriztaileegia zelakoan eta crowdfunding a hilko zuelakoan. Muga hauek jarri nahi zizkieten bide hori erabiltzen zuten finantzaketei: milioi bat euroko gehienezko laguntza jasotzea proiektuko, eta pertsona batek gehienez 3.000 euro ematea proiektuko eta 6.000 euro urteko. Egia da horrek asko mugatzen duela inbertitzaile handiek proiektu handiei eman diezaieketen laguntza, baina banako askok lagundutako banakoen proiektuetan (horrelakoak dira benetako crowdfunding edo finantzaketa masiboko proiektuak) nekez gainditzen dira kopuru horiek.

Beste sektore askok ere agertu dituzte kezkak eta protestak partekatzearen eredu ekonomiko horien inguruan: ostalaritzak, otorduak banatzearen aurka; sektore askok, denbora-bankuen aurka... Baina protestak protesta eta kexuak kexu, badirudi partekatzearen ekonomiak asko egingo duela gora oraindik.

Aurtengo irailetik komiki-zinta berri bat dugu online egunero: Irribarrez.info. Proiektua abiarazi ahal izateko, bere egile Eñaut Aiartzaguenak (@irribarrez Twitter-en) crowdfunding bat martxan jarri zuen, ekarpen txikien bidez 500 euroko finantziazio/laguntza lortzeko asmoarekin, eta azkenean helburua hirukoiztu baino gehiago egin zuen! Badakizu, goizak irribarre batekin ekiteko, Irribarrez.info!

Bilbon dagoen eta Azkue Fundazioak kudeatzen duen Euskararen Etxera bisitan doazen ikasle-taldeek komiki digitalen tailer bat egin eta lehiaketa batean parte hartzeko aukera izango dute. Lehen Hezkuntzako 5. mailatik hasi eta Batxilergoko 2. mailarainoko ikasleei dago zuzenduta.

Interesgarria eta sariak irabazteko aukerarekin? Irakasleak, zeren zain zaudete bidaia antolatzeko? Eta ikasleak, zeren zain zaudete irakasleak konbentzitzeko?

Apur bat berandu gatoz honen berri ematera, solasaldietako asko jada pasatu baitira, baina beno... Donostia Kulturak antolatuta, komiki batzuen inguruko hainbat solasaldi egingo dira Donostian kurtso honetan zehar.

Euskarazkoak Iosu Mitxelenak zuzenduko ditu, eta egile hauen inguruan izango dira: azaroaren 11, Juan Luis Landa; urtarrilaren 13a, Zaldieroa; martxoaren 10a, Axpi; eta maiatzaren 12a, Joseba Larratxe Josevisky. Gaztelaniazkoak Antonio Altarribak zuzenduko ditu, eta obra hauen jiran arituko dira: urriaren 14an, Shaun Tanen Emigrantes; abenduaren 9an, Winshlussen Pinocchio; otsailaren 17an (adi, data aldaketa!), Jiro Taniguchiren Barrio lejano; apirilaren 14an, Guy Delisleren Piongyang; eta ekainaren 9an, Miguelanxo Pradoren Ardalén.

Solasaldi guztiak arratsaldeko 19:00tan izango dira Intxaurrondoko Kultur Etxean. Animatu!

Aspaldiko partez komiki-lehiaketen berri ematera goaz, makinatxo bat pilatu zaizkigu honez gero eta...

Tolosako Galtzaundi Euskara Elkarteak antolatzen duen Galtzakomik lehiaketaren VII. edizioaren irabazleak ezagunak dira dagoeneko. Amaia Ballesterosek eraman du 1. saria Nozilla asperturik dago lanagatik, eta akzesita Aitor Urkiolak Larrialdia lanagatik. 12 eta 18 urtekoen artean 1. saria Markel Galbetek eraman du Smith familiaren bidaiagatik, 2.a Haizea Ganzedok Bidaiarik garrantzisuenagatik eta aipamenak Leire Amonarrizek Ametsak egi bihurtu daitezkegatik eta Inhar Esnaolak Basozainakgatik. 12 urtetik beherakoetan, 1. saria Iñigo Agirrek irabazi du Hobe maitatzea borrokatzea baino lanagatik, aipamenak Asier Sanchezek Supermanegatik, Maria Arrieta, Paula Vicente eta Maria Contrerasek Maitasunaren gauzakengatik eta Ibai Torkemadak Anbroxio eta Inaxiogatik, eta Ibarrako lan onenen sariak Eneritz Jauregik Desperux sagutxoagatik eta Markel Arsuagak Unibertsoagatik.

Bestalde, Rekalde Aretoak eta Noticias taldearen Ortzadar kultur gehigarriak antolatzen duten Rekalde-Ortzadar IV. Lehiaketak ere baditu irabazleak. Sari nagusia Uxía Larrosak eraman du Pluto lanagatik. Eta aurtengo Ohorezko Saria, guztiz merezia, Antton Olariagak jaso du.

Eta urtero-urtero falta gabe urte hasierarekin batera irekitzen diren bi lehiaketen berri ere eman behar dugu. Horietako bat da Basauri Komik ekimenak antolatzen duen Ganorabako komiki-lehiaketa, sariz ongi hornitua (900, 450 eta 300 euro hurrenez hurren lehen hiru sarituei, eta 300 euroko akzesit bana euskarazko lan onenari eta Basauriko lan onenari). Lehiaketan parte hartzeko, komikiak martxoaren 31 baino lehen bidali behar dira.

Beste bat Portugalete Uri Urena Komiki Lehiaketa da, hiri horretako udalak antolatzen duena eta aurten XXIX. edizioa betetzen duena. Komiki kategorian 1800, 1250 eta 800 euro daude lehen hiru sarituentzat, 300 euroko akzesitak euskarazko eta Portugaleteko egile onenentzat eta 200 euroko akzesita 16 urtetik beherakoen lan onenarentzat, eta komiki-banda kategorian 300 euro irabazlearentzat eta 100 euroko akzesita 18 urtetik beherakoen arteko lan onenarentzat. Lanak bidaltzeko epea, kasu honetan, otsailaren 27a da.

Zorionak iazko irabazleei! Eta zu, irakurle, animatu aurtengoetan parte hartzera, hurrengoa zu izan zaitezke eta!

(Elhuyar aldizkariko 2014ko apirileko zenbakian argitaratutako artikuluaren jatorrizko extended bertsioa)

Ahots-teknologiak berriki arte asko erabili ez badira, ez da izan beharrik ez zegoelako, baizik eta teknologia oraindik nahiko heldua eta aurreratua ez zegoelako. Beharrak eta aplikazio posibleak ugariak izan dira betidanik.

Erabilera posible horietatik burura lehenengo etortzen zaiguna gailu digitalekiko interakzioa da. Ordenagailu, telefono edo tabletari aginduak teklatuan idatziz edo saguaz klik eginez eman beharrean, erosoagoa eta azkarragoa izan daiteke, kasu askotan, ahoz esanda egitea. Eta makinaren emaitza jasotzeko ere, pantailan irakurri beharrean, maiz erosoagoa izan daiteke entzutea. Ahots bidezko interakzioaren adibide dira gailu mugikorretan gero eta gehiago ikusten diren Siri moduko elkarrizketa-agenteak (2012ko urtarrilean hitz egin genizuen horiei buruz).

Pertsonen arteko komunikazioan ere lagundu dezakete. Itzulpen automatikoarekin konbinatuta, ahots-teknologiekin ahots-itzultzaileak egin daitezke.

Beste aplikazio bat informazioaren kudeaketa da. Idatziz dagoen informazioa erraz eta azkar maneiatzen dute ordenagailuek, eta tresna oso baliagarriak egiten ahal dira, bilatzaileak esaterako. Baina informazioa audio-grabaketak direnean, makinak ez dira gai ulertzeko, eta transkribatu egin behar dira. Aldiz, ahots-teknologien bidez hizketa ulertzeko gai badira, makinek berek bihurtuko lukete ahotsa testu, eta audio-fitxategiak erraz indexatu ahal izango lirateke bilaketarako (horrela ari da, adibidez, BBC bere historia guztiko irratiko audio guztiak bilaketarako katalogatzen), edo filmak automatikoki azpititulatu.

Ahotsaren sorkuntza...

Horrelako gauzak egiteko, esan bezala, ahots teknologiak deritzen teknologiak erabiltzen dira. Eta mota ezberdin askotako teknologiak daude.

Ahots-sintesia da horietako bat, ingelesezko TTS (Text To Speech edo testutik hizketara) izenaz ere ezaguna. Teknologia horrek hizketa baten audioa sortzen du testu batetik, ahots sintetiko edo artifizialez, molde ahalik eta naturalean. Eta hori, neurri batean, nahiko lortua dago, intonazio neutro baterako behintzat. Bitxia bada ere, zientzia-fikziozko film zaharretan agertzen ziren robotak makina oso adimendunak ziren, eta ez zuten arazorik esaten zitzaiena ulertzeko; berek hitz egin, ordea, oso modu artifizial eta robotikoan (jakina) hitz egiten zuten. Baina errealitatean kontrakoa gertatu da: gaur egun nahiko ongi hitz egin dezakete makinek, ulertu, baina, ez hain ongi, eta adimendun izateko tarte handia falta da oraindik...

Ahots-sintesi emozioduna ere lantzen ari dira ikertzaileak, hau da, ahots sintetikoak haserrea, poza, harridura, pena eta horrelako emozioak ere adieraztea. Izan ere, kasu askotan ez da nahikoa gauzak intonazio neutroarekin esatea, adibidez, filmak-eta automatikoki bikoiztu nahi badira.

Sortzen den ahots sintetikoak naturala iduri dezan, benetako pertsonen grabaketa asko egin behar izaten dira, eta, hala, pertsona horren ahots bera duen hizketa lortzen da, benetako pertsona batek esandakoa dela ematen duena. Baina horrek badu arazo bat, ahots ezberdin asko behar direnean ez baitu balio (goian aipatutako filmen bikoizketarako, adibidez). Horregatik, ahotsen transformazioaren teknologia ere existitzen da, hau da, grabaketetan oinarritutako ahots sintetiko batek beste norbaitena dela eman dezan lortzeko teknologia. Hori erabiltzen da, adibidez, hitz egiteko gaitasuna galdu duen jendearentzat bere ahotsaren antza izango duen ahots-sintetizadoreak egiteko.

... eta ezagutza

Ahots teknologien beste familia handia kontrako norabidekoa da, hau da, ahotsaren ezagutzakoa. Hemen sartzen da, esate baterako, biometriarako erabiltzen den hizlariaren ahots bidezko identifikazioa. Hala ere, teknologia hau ahots baten ezaugarriak detektatzean eta horren bidez pertsona zein den jakin edo egiaztatzean datza soilik.

Zailagoa da esaten dena ezagutzea, hau da, benetako ahots ezagutza. Horregatik, ahotsaren ezagutzako sistemetan mota ezberdinetakoak daude, konpontzen duten problematikaren arabera, eta emaitzen kalitatea ere ezberdina dute. Adibidez, diktaketa-sistemak hizketa jarraia eta edozelakoa ezagutzeko pentsatuta daude. Hori lortzea oso zaila da eta hori dela eta, pertsona bakoitzaren hizkerara entrenatu behar izaten dira eta emaitzak ez dira hain onak ere.

Ahots ezagutzako beste sistema batzuk komandoen ezagutzakoak dira. Hauetan, ezagutu beharrekoa mugatua egoten da. Hauen adibideak dira call-centerak edota aipatutako elkarrizketa agenteak. Ezagutu beharrekoa unean uneko testuinguruaren araberakoa da (zenbakiak, aukera multzo batetik bat, gure agendako pertsonetako bat...), eta horregatik emaitza hobeak lor daitezke, hobeak ezagutu beharrekoaren aukera ezberdinak zenbat eta gutxiago izan.

Azkenik, edukien indexazio eta bilaketarako erabiltzen diren ezagutza teknologiak daude. Diarizazioa deritzonak, adibidez, audioko fitxategi baten dauden atal ezberdinak identifikatzeko balio du: noiz den elkarrizketa, noiz isilunea, noiz musika, noiz zarata… Horrela, ahots ezagutzailea zein zatiri aplikatu jakiten da, hizketarik ez dagoenean ezagutzailea pasatu eta zaborra indexatu beharrean. Hizlariaren identifikazioa ere interesgarria izaten da indexazio helburutarako. Eta ohiko ahots ezagutza ere erabiltzen da indexaziorako. Gainera, honelako erabileretan maiz ez du axola ezagutza perfektua ez izateak: sarri ez da transkribapen zehatza behar, bilaketarako hitz edo termino esanguratsuen eta errepikakorrenak harrapatzea nahikoa izan daiteke.

Euskarazko ahots-sintesia Elhuyar aldizkaria, Zientzia.net eta EITB.eus entzuteko!

Arestian esan dugu ahots-teknologiak gaur egun nahikoa aurreratuta daudela eta gero eta gehiago erabiltzen direla. Teknologia horiek, baina, hizkuntzaren araberakoak dira (beharbada hizlariaren detekzioaren salbuespenarekin), eta ez daude garapen-maila berean hizkuntza guztietarako. Beti bezala, teknologiok oso garatuta daude hizkuntza gutxi batzuetarako (betikoak: ingelesa, gaztelania, alemana, txinera...), eta gainerako gehienetarako askoz atzerago.

Garapen onena duten hizkuntza horien mailan ez badago ere, euskara ez da, zorionez, azkeneko bagoian doazen horietakoa. Urteak daramatzagu euskararentzako ahots-teknologiak lantzen. Eta lan horretan aitzindari eta erreferente EHUko Aholab ikerketa-taldea dugu. Aipatutako teknologia guztiak landu dituzte eta lantzen ari dira.

Aholabek euskararentzat aurreratuen daukan teknologia, jakina, ahots-sintesiarena da. Oso kalitate oneko ahots sintetiko neutroa lortzen dute, aplikazioetan erabiltzeko modukoa. Horregatik, Aholabekin elkarlanean, Elhuyarreko Hizkuntza eta Teknologia unitateak webguneak irakurri beharrean entzuteko teknologia garatu du ahots-sintesi bidez.

Izan ere, jada ez dugu soilik mahai gaineko ordenagailuetatik nabigatzean webean. Gero eta gehiago ibiltzen gara Interneten gure smartphone eta tabletetatik. Eta horietan, webguneak irakurtzeko baldintzak ez dira sarri oso egokiak: pantaila txikia da (batez ere, telefonoetan), mugimenduan joaten gara maiz (oinez, trenean, autobusean...) eta abar. Aldiz, horrelako gailuetan, oso ohituta gaude edukia (musika, podcast-ak...) entzungailuez entzuten. Horregatik, oso interesgarria iruditu zitzaigun webguneak entzun ahal izateko teknologia hori garatzea. Erabiltzailea ordenagailu edo gailu mugikorrean edukia irakurri ordez entzuten joan ahal izango da, bitartean beste zerbait egiten duelarik.

Oraingoz, Elhuyar aldizkariaren webgunean, Zientzia.net-en eta EITB.eus-en jarri dugu teknologia hori. Bertako eduki batean gaudela (artikulu bat, erreportaje bat...), barra bat agertuko zaigu, eta han “play” itxurako botoi tipiko bat. Hori sakatuta, artikulua entzuten hasiko gara. Entzuketa esaldiz esaldi egiten da, eta entzuten ari garen esaldia markatuta agertzen da. Era berean, entzuketan nabigatu ahal izateko botoiak ere badaude (aurreko edo ondoko esaldira, aurreko edo ondoko paragrafora, edo nahi dugun tokira joateko). Gainera, ahotsa (emakumezko eta gizonezko baten artean), bolumena zein abiadura alda ditzakegu. Horrez gain, aldizkariko zenbaki batean bagaude, entzuteko botoia sakatuta, zenbaki horretako artikulu guztiak entzun ahal izango ditugu bata bestearen atzetik; hori oso interesgarria izan daiteke kotxean gidatzen-edo bagoaz bidaia luze samar batean, irratia entzun beharrean aldizkari osoa entzun baitezakegu. Azkenik, elkarrizketetan, aukeratutakoa ez beste ahots batekin irakurtzen dizkigu galderak, galderak eta erantzunak bereiz ditzagun. Eta hori guztia, HTML5 teknologia estandarra erabiliz egin da (HTML5ez 2010eko otsailean hitz egin genizuen).

Aukera ederra, beraz, euskarazko ahots-teknologiak ezagutu eta baliatzen hasteko. Probatu, eta ikusi!

Joe ze poza! Euskarazko komiki berrien argitaraketen berri ematera ohituta gaude blog honetan (urtean izaten dira batzuk), baina argitalpen periodiko berrien berri ematera ez hainbeste. Xabiroiren sorrera eman genuen duela urte asko, baina Ipurbeltzen itxiera ere bai geroago... Horregatik, be yeda de odguyo y satisfacion H28 euskarazko komiki-aldizkari satiriko digital honen albistea ematea!

Euskal komikien panoramako aurpegi ezagunek jarri dute martxan proiektu hau (Dani Fano, Asisko, Marko, Zaldieroa, Adur, Patxi Gallego, Exprai, Unai Iturriaga, Josevisky...), baina kolaboraziotarako irekita dago. Hilerokoa izango da, eta 28an aterako. Digitala eta onlinekoa izango da, eta momentuz ISSUUn dago, http://issuu.com/h28aldizkaria/docs/h28_saretirikoa helbidean. Twitter kontua ere badute, @H28aldizkaria. Arkatzak zorroztuta, ostiak ezker-eskuin banatzeko prest, lehen zenbakian ikusten den bezala!

Albiste bikaina da hau. Adierazpen askatasunaren aldeko ekintza benetakoa, ez Parisen argazkia atera eta gero argitalpenak bahitu, umoristak espetxeratu edo komunikabideak ixten dituztenena modukoa. Biba H28!

Ikastolen Elkartearen Xabiroi komiki-aldizkariak hiru zenbaki atera ohi ditu urtean (otsailean, ekainean eta urrian). Baina 2014an abenduan beste zenbaki bat kaleratu du, lehen zeukan urteroko zenbaki bereziaren tradizioa berreskuratuz. Bi horietako edukien berri emango dizuegu hemen.

33. zenbakian ondoko edukiak aurkituko dituzue:

• Dei Gaztelumendi Deisignen azala
• Neuk egindako Albisteen txokoa
• Adur Larrearen Xabiroienea umorezko banda
• Auzomorro umorezko orri bikoitza, Sanviren gidoi eta irudiekin
• Haur besoetakoa sailaren 8 orri, Unai Iturriagaren gidoia eta Sanviren irudiekin
• 5 orriko Info.eus istorioa, Asiskoren gidoia eta Jon Juarezen irudiekin
• Asiskoren Hor Konpost zinta
• Manu Ortegaren Haizea banda
• Exprairen Pertza ustelaren gogoeta antzuak zinta
• Unai Iturriaga eta Sanviri Haur besoetakoa albumaren inguruan egindako bi orriko elkarrizketa
• ZaldiEroaren Arranotxuren beste bi orri
• Mendozaren iztartekoa 6 orriko istorioa, David Zapirainen gidoia, Dani Fanoren irudiak eta Sedyasen koloreekin
• Egoitz Lasaren gidoia eta Loperen irudiak dituen Zonbiñe umorezko sailaren 3 orri

Eta 34.ean:

• Arthur Suydamen azala
• Neure Albisteen txokoa
• Adur Larrearen Xabiroienea zintaren beste entrega bat
• Sanviren Auzomorroren beste bi orri
• Frédéric Bertocchiniren gidoia, Marko Armspach eta Iñaki Holgadoren irudiak eta Nuria Sayagoren koloreak dituen Gaitzeko berria, hainbat kortsikarren Lehen Mundu Gerrako istorioak kontatzen dituen Aiò Zitelli! album atera berriaren istorioetako bat, 7 orrikoa
• Sanviren 4 orriko Bushido istorioa
• Asiskoren Hor Konpost zinta
• Manu Ortegaren Haizea banda
• Exprairen Pertza ustelaren gogoeta antzuak zinta
• Xabiroiri Getxoko Komiki-Azokak emandako sariaren inguruko erreportajea
• ZaldiEroaren Arranotxuren beste bi orri
• Javier de Isusiri egindako bi orriko elkarrizketa Baleak ikusi ditut dela-eta
• Joseviskyren Urrezko pasea bi orriko istorioa
• Mikel Begoñaren gidoia eta Adur Larrearen irudiak dituen The last shot 4 orriko istorioa
• Egoitz Lasaren gidoia eta Loperen irudiak dituen Zonbiñe umorezko sailaren 2 orri

Ez galdu! Eta gogoratu harpidetza egiteko aukera dagoela orain!

Komikiek rock musikarekin eta, bereziki euskal rock-arekin izan duten eta duten harremanaren inguruko erakusketa paratu dute Koldo Mitxelena Kulturuneko ganbaran. Rockomikiak - Binetak & Doinuak izenburua jarri diote bihartik urtarrilaren amaiera arte irekita egongo den erakusketa honi.

Blog honek ere parte txiki-txiki bat ere izan du erakusketa honetan. Izan ere, beronen antolaketan laguntzen aritu da Iñaki Otamendi Dabilenharria, blog honetan duela urte batzuk idatzitako Komikiak eta euskal rock-a artikulua medio horretarako gonbidapena jaso baitzuen. ;-)

Erakusketaren inaugurazioa bihar, asteazkena 17, 19:30ean izango da. Eta etzi, osteguna 18, 19:00etan, bisita gidatua egingo da Iñaki Otamendiren eskutik.

Interesgarria benetan, nik behintzat ez dut galduko!

Ia oharkabean pasatu zait... Udazken honetan, urria edo azaroa partean, 10 urte bete ditu e-gorblog blog honek!

Bataz beste astean ia artikulu bat argitaratu da 10 urte hauetan zehar, beraz ia 500 artikulu, informatika eta komikien ingurukoak gehienak, bestelako hausnarketaren edo bestez gain. Lan eta ordu asko, baina, nekeak-neke, orokorrean gustura egiten dena. Eta gainera, bere saria izan duena: hainbat jendek gustuko duela ikusten da erantzunetan eta Facebook eta Twitter-eko komentarioetan, Elhuyar aldizkarian hilero informatikari buruz idatziz kolaboratzeko aukera ekarri zuen, Xabiroiko albisteetaz eta elkarrizketa batzuetaz arduratzeko enkargua ere honi esker atera zen, irrati, prentsa, telebistetako eta bestelako argitalpenetan hainbat kolaborazio edo elkarrizketa...

Ea oraindik urte askoan jarraitu ahal dudan! Gogotsu banago behintzat, ea!