Harrikadak

Bai, Erral, lapurtu egin didazu titularra ;-)

Gaur goizean errakundeak berriro armak dantzan jarri behar zituela enteratu naizenean ez naiz abenduaren 30ean bezainbeste larritu. Kaka zaharra! pentsatu dut. Baina gosaltzen jarraitu dut irratia entzuten nuen bitartean.

Eguna lanean pasa dut eta ez diot gehiegi erreparatu interneti. Eguerdian, igerilekura joan aurretik, gainetik begiratu dut sheriff gehienek esandako txorakeriak.

Bazkaldu ondoren, bilera bat izan dut eta erakusketa baten inaugurazioa petit comitéan. Tartean, Erralekin hitz egin dut, bai. Bi puntu zero. ETA 2.0 titular ederra izan zitekeela pentsatu dut.

Baina the organization ez da 2.0ra iritsi oraindik. Erraminta kolaboratiboak maneiatzetik urrun dago. Ez dirudi hainbeste maite duen herriari, gizarteari, kasu egiteko gai denik. Eneko Bidegainek idatzi bezala, uste dut errakundeak errespetu gutxi diola Ipar Euskal Herriari. Ezta ANVko boto emaileei ere. Zergatik ez zuten Hegoaldeko hauteskunde kanpainan bertan iragarri erabaki hau?

Loretxoa haserretu den bezala haserretu naiz.

Ortizek duela gutxi idatzi bezala errepikatu dut: "no les veo remedio / no os veo remedio / no nos veo remedio".

Atentaturik egongo ote den galdetu diot nire buruari. Hurrengo biktima nor izango ote da? Gaixoa!

Joseba Zulaikaren liburua gazteleraz argitaratu dutela ere irakurri dut. Gaur prezisamentian.

Eskerrak Rabo jauna gaur ere hortxe dagoen.

Egilea: Álvarez Rabo

En castellano

Maiatzaren hasierako igande batean Pello Zubiriak Xabier Sánchez Erauskin kazetariari 2006ko bukaeran eginiko elkarrizketa honekin egin nuen topo Argian.

Igande euritsu hartan hasi nintzen 18 folioko elkarrizketa gazteleraz jartzen eta maiatzean zehar joan naiz gaztelerazko blogean atalka zintzilikatzen.

Hona hemen zati guztiak (zati bakoitzaren titulua nik jarritakoa da, adi):

Periodista de trinchera

La política

Sacerdote en Terranova, periodista en Madrid

De Madrid a Egin

Bergamín y el futuro del periodismo

Espero dut jatorrizko bertsioak duen onena pikutara ez bidaltzea nire ahaleginarekin. Asko gozatu dut, behintzat, itzulpenarekin.

Irutxuloko Hitzan ekainaren 2an argitaratutakoa.

Donostiara duela urtebete etorritako pertsona batek hiria gustuko ez zuela esan zidan pasa den astean. Gipuzkoarra da bera eta urte dezente eman ditu Gasteizen bizitzen, (hemen baino askoz ere gusturago haren hitzetan). Baietz esan nion nik, giroa ez zegoela bere onenean.

Kulturaz ari zelarik, dena oso ofiziala zela bota zuen. Eta neurri batean behintzat horrela da, Donostia oso instituzionala baita. Aipatu nion ez zuela batere laguntzen Guardetxearen egoera penagarriak (ea laster konpontzen den), baina berpizte horrek edo Donostiako Kafe Antzokiak aire berria ekarriko dutela.

Hala ere, haren berbek ezinegona sortu zuten nigan. Eta buelta asko eman nion kontu horri hurrengo egunetan. Izan ere, Udalak kultura sustatuko ez balu, herritarrok, arrazoi osoz, kexu agertuko ginateke arduragabekeria horregatik. Aldiz, Udalak gauzak antolatzen baditu, gaizki, kutsu ofiziala baitu denak.

Nahi al dugu Udalak dirua gastatzea kultur eskaintza oparoa herritarren esku jartzeko? Bai? Ez? Egia da beste kultur politika bat ere ahal dela egin. Ados. Baina nahiko lukete honen tamainako hainbat hirik Donostiako kultur eskaintza eta oinarrizko sarea (duela aste batzuk Santanderren egon nintzen eta hango egoera penagarria da).

Oinarrizko sarea aipatu dudalarik, balizko kutsu ofizial horretatik kanpo gelditzen den udal programaziorik ere bada. Adibidez, Poltsiko Antzerkia. Jite urratzailea eta berritzailea duen programa hau maiatzaren 9an abiatu zen Victoria Eugeniako Klub Aretoan Chirigóticas taldearen eskutik. XVI. edizioa Altxerrin amaitu zen maiatzaren 27an, "La Calaña del Tío Tom" antzezlanarekin. Bi data horien artean 11 taldek 26 emanaldi eskaini dituzte.

Hiri honek duen luxuetako bat da jaialdia, luxua baita 50-100 lagunentzako emanaldiak eskaintzea auzoetako tabernatan Pepín Tre, Gu ta Gutarrak, Yogurinha Borova, Chirigóticas edo Mago Migue bezalako artistek.

Zergatik du, baina, hain oihartzun gutxi jaialdiak? Zenbat lagunek dakite hamasei edizio egin direla jada? Arrazoi ezberdinak daude. Adibidez, diru gehiago beharko litzateke oihartzun gehiago izateko, foku gehienek Victoria Eugenia argitzen dute orain, maiatzeko eskaintza zabala, etab.

Ea hurrengo urteetan ere edizio honen mailako ekitaldiak antolatzeko masa kritiko nahikoa dugun. Diru publikoa egongo ote al da horretarako? Hori beste eztabaida bat da, baina hala izatea espero dut. Amen.

En castellano

Gaur goizean ikusi dugu Berrian, Wilson Saliwoncyk payadore argentinarrari eginiko elkarrizketa. Bertan, Euskal Herriko zenbait herritan egingo duen biraren berri ematen zuen.

Bira horrek geldialdia izango du ekainaren 6an kultur etxean.

Maiatzaren 10ean, Wilson Gu ta Gutarrak taldearen gonbidatu sorpresa izan zen Donostiako Via Foran, kultur etxeek antolaturiko Poltsiko Antzerkian. Gu ta gutarrak taldearen webgunean klik eginda ikus dezakezu emanaldiaren zati bat eta bertan ageri da Wilson eskurrik asko esaten (edo antzeko zerbait).

Hona hemen prentsa-oharra:

Ernest Lluch Kultur Etxeak jakinarazten dizue ekainaren 6an Wilson Saliwoncyk payadoreak saio bat egingo duela gure zentroan Fredi Paia eta Xabi Paya bertsolariekin batera. Ekitaldia arratsaldeko 19:30etan hasiko da areto nagusian (Anoeta Estadioko 7. eta 8. ateen artean) eta sarrera doakoa izango da.

Apirilaren 19an Igor Calzadaren FTF proiektua aurkeztu genuenean, gure asmoa zen urrira arte ez programatzea Erakusleihoako saio gehiagorik. Hala ere, proposamen eder honi ezin uko egin eta horregatik Erakusleihoa Bonus Track programatu dugu ekainean.

Wilson Saliwoncyk Argentinako Los Toldos General Viamonten jaio den payadorea da. Artearen inguruan urte mordoa daraman arren, modu profesionalean Terneroko festan irabazitako sariaz geroztik hasia da (1996an). Egun emanaldiak egiten ditu festibaletan, kultur guneetan eta payadoreen tailerretan.

Payadorea, gitarraz lagundurik, bere kantuak eta inprobisatutako dezimekin batera, Xabi Paya eta Fredi Paia bertsolariekin arituko da.

Emanaldiaren ardatza Wilson izango da, baina bertsolariak ere saiatuko dira payadoreari desafioa edo payadas egiten. Munduko bi inprobisazioen arteko jolasa, jokoa, borroka… gozamena hitz batean.

En castellano

Kabigorri Ateneoaren urteko ekitaldirik garrantzitsuenetakoa hasiko da gaur. Zinema zuzendarien omenezko ziklo berri bat antolatu dute orain ere. Lehenengo bi zuzendari omenduak Luis Buñuel eta Juan Antonio Bardem izan ziren. Aurtengoa, berriz, Luis García Berlanga da.

Egilea: Juantxo Quiroga.

"Wellcome Berlanga jauna" zikloa: Maiatzaren 29tik ekainaren 2ra.

Maiatzak 29

Bienvenido Mr. Mashall filmaren proiekzioa Amaia Kultur Zentroko auditorioan. 20:00etan.

Maiatzak 30

El verdugo filmaren proiekzioa Amaia Kultur Zentroko auditorioan. 20:00etan.

Maiatzak 31

Tamaño natural filmaren proiekzioa Kabigorri Ateneoan (kontuz toki aldaketarekin). 20:00etan.

Ekainak 1

Hitzaldia: Trabajar con Don Luis Solaskideak: Juan Cobos, José Luis García Berlanga.
Ikust-Alaia Udal Liburutegian. 19:00etan.

Ekainak 2

"Plácido" filmaren proiekzioa eta mahaingurua Amaia Kultur Zentroko auditorioan. 17:30etan.

Gonbidatuak: Amparo Soler-Leal (Luis G. Berlangaren hainbat filmetan lan egindako aktoresa
Juan Cobos (idazlea, Berlangaren lagun mina)
José Luis García Berlanga, semea, zinema zuzendaria eta ekoizlea.

Kabigorri Ateneoan, 20:30etan. Itxiera ekitaldia eta omenaldia. "El sueño de la maestra" filmaren proiekzioa. Berlangaren omenez Rafael Azconak ekitaldi honetarako idatzitako testuaren irakurketa. Azcona Berlangaren ohiko gidoigilea izan zen.

Erakusketa

Maiatzaren 22tik ikusgai dago "Berlanga Natural" erakusketa. Ekainaren 16ra arte, Kabigorrin bisita daiteke Berlanga familiak utzitako materiala: kartelak, errodajeetako argazkiak, familiaren argazkiak, bitxikeriak…

Egilea: Juantxo Quiroga.

En castellano

Larunbat gau zirraragarria Elgetan. Ez ginen Mathilderen bila joan, lagun giroan egotera baizik. Mathilderen atzetik joateko enkargua Julen Gabiriak eta Txuma Murugarrenek zuten. Eta lan horretan abiatu ziren Rafa Aceves pianista eta Arturo García bateria jotzailearekin batera.

Zita Elgetako Ostatuan genuen. Arratsaldeko 20:00etan. Berandu iritsi ginen, baina hantxe zegoen Iban anfitrioia, Leire eta Elena. Trago bat hartu eta Espaloia tenplura joan ginen.

Tenpluan entsaioan topatu genituen artistak. Haiekin afaltzeko aukera izan genuen. Asier eta Mendigreen ere gerturatu ziren. Afaria galdu zuen Etiamek, baina ez emanaldia.

Gustura sumatu nuen Gabiria egindako lanarekin. Berdin Txuma, hain gustura ezen ordu erdiko plusa eskaini zigun bi taldekide birtuosoekin.

Eszenatokia ederto zegoen jarrita. Sinple baina dotore, luxuzko beste salon pop saioa ikusteko aukera izateko. Testu eta musika iradokitzaileak.

Hainbeste blogari (batzuk indarrean, besteak erretiroan) elkartuta, Elgetara etorri ez zirenak larrutzen egon ginen. Larunbatean ere demostratu nuen abila naizela lan horretan. Dedio!

Memea bertaratu ziren gainerako blogariei bidaltzen diet.

Hau ere ez da kronika bat izango. Horretarako duzue, adibidez, zuzenean egindako kronika bikain hauek: 1, 2, 3, 4 eta 5.

Goiza

Goizeko 10:00ak pasatxo sartu nintzen Gurejaimen. Aitzaki polita nuen Bilbora joateko: Blogak 2.0.

Slashdot-eko Rob Maldak arazo teknikoak izan zituen etsai, baina irribarrea galdu gabe egon zen eszenatokian. Ez zitzaidan gehiegi interesatu tipoak esandakoa, hiruzpalau gauza apuntatu banituen ere (ingelesak menperatzen nau eta euskarazko itzulpena entzun nuen. Ondo aritu ziren bi itzultzaileak). Saioa amaitzerakoan, goizean ohitura bihurtu zen biko solasaldia hasi zuen Del Moralekin; jendearen galderak ere egon ziren. Sofaren formatua estetikoki polita, baina uste dut a priori ematen zituen aukerak ez zirela aprobetxatu.

Gero Startup 2.0 lehiaketan sailkatu ziren bost finalisten txanda ailegatu zen. 12 minutu zituzten proiektuak aurkezteko; ondoren, epaimahaikide batek eginiko galdetegi zorrotza erantzun behar izan zuten (beste 10 minutuz). Hizlari bakoitzak bere erara egin zuen aurkezpena. Txukunena, bigarren proiektuko ordezkaria, 5min. Lauena Properazzi-koa, webgunea ia pantailan erakutsi gabe. Sclipo-koa (garaile suertatu zena) gogotsu eta indartsu hasi zen, baina beheruntz joan zen. Paristik etorritako Trivop-eko aurkezlea nekatuta aritu zen. 11870 proiektuko Natxok ere ez zuen asmatu. Garbi geratu zen bideoa dagoela boladan 2.0n (5 proiektuetatik 3k zuten formatu hori).

Arratsaldea

Abaroa jatetxean bazkaldu eta terraza batean trago bat hartu ondoren, berriro barrura.

Television 2.0 jarduna aspergarria iruditu zitzaidan. Ekarpen interesgarri gutxi entzun nituen. Itxuraz, solaskideak mahaingurua behar den bezala prestatu gabe agertu ziren. Itxuraz, diot.

Arratsaldeko saio onena Education 2.0 izan zen (beste guztiak ingelesez izan baziren ere, hau gazteleraz). Ondo Julen Iturbe eta Josu Orbe, makalago hirugarren solaskidea. Batek baino gehiagok komentatu bezala, Maite Goñi (edo beste IKTeroak) falta ziren mahaian.

Women 2.0 mahainguruari buruz, berriz, ez dut hitzetan jarri nahi entzundakoak nire barruan sortu zuen ezinegona. Ekarpenik ez. Arinegia. Hiru txolin mahai baten inguruan.

Lehiaketa biren sari emate ekitaldiarekin amaitu zen Blogak 2.0.

Eta?

Iaz ez nintzen lehen edizioan egon, baina goiz-arratsaldean ikusitakoak ez ninduen asebete (gehiago espero nuen). Arazo tekniko gehiegi (wifi-arekin, adibidez), arratsaldean erritmoak beheruntz egin zuen. Agian kontua da ez naizela horrelako ebento batera joateko nahiko geek-a oraindik (uste dut itzultzaileak freaky erabiltzen zuela berba horren ordez).

Teketen-ek esan bezala ikusitakoak ikusita euskal blogosfera ez doa gaizki. Maite, Iban, Patxi, Haritz (zorionak!), Sergio, etab. hantxe egon ginen, popatxateatzen inkluso.

Zer pentsatuko du JVk jardunaldietaz?

Portzierto, zein aberastuko da Euskal Herrian 2.0 burbuilarekin? Gorbatak azaldu dira jada...

En castellano

Pasa den astean Jose Del Moralen gonbidapena jaso nuen datorren ostegunean (maiatzaren 24an) Bilbon ospatzekoa den Blogak 2.0 jardunaldietara joateko.

Iazko edizioan ez nintzen gerturatu. Ez naiz gogoratzen zergatik. Agian enteratu ez nintzelako, edo denborarik ez nuelako... ez naiz oroitzen. Mutilmediak egin zuen iaz zuzeneko jarraipena eta gogoan dut ere zalaparta pizarra egon zela.

Aurten bai, autopista zeharkatuko dut. Ez dakit zerekin egingo dudan topo. Ikusi dut egitaraua, ikusi dut izena eman dutenen zerrenda. Gauza berririk entzungo al dugu? Berdin zait. Sarea egiteko behar beharrezkoa da kontaktu fisikoa. Ezagunak eta ezezagunak agurtzea, besteak beste.

Gaur entzun dut irratia.com-eko bikoteak Del Morali eginiko elkarrizketa. Nahi baduzue hemen sakatu eta entzungo duzue Alianzoko nagusiak bota dituenak (hasieran euskaraz, gero gazteleraz).

Donostiatik autoz joango naiz. Norbait animatzen da? Utzi mezua hemen azpian.

En castellano

Juan Cruz nekaezina astearte arratsaldeko 19:30etan tirripi tarrapa sartu zen Ernest Lluch Kultur Etxean. Periodikora presazko zerbait bidali behar zuela esanaz. Horrela hasi zen hirugarren edizioa.

Hiru kazetari eseri genituen mahaian dokumentazio prozesuetan teknologia berriek izan duten eraginaz berba egiteko. Joseba Iriondo solaskidearekin batera, Alberto Moyano moderatzailearen galderak erantzun zituzten.

Egia esateko, jende gehiago espero genuen (berrogei lagun inguru gutxi da). Ez zigun batere mesederik egin Nacho Escolarren azken orduko espanták. Nola edo hala salbatu genuen eguna.

Asteazken arratsaldean, ordu berean. Casares-Tomasene Kultur Etxean ehun lagun inguru agertu zen Agnes Agboton entzutera. Agnes-en aurretik, Binta y la gran idea filma ikusi genuen bertan bildutakook, UNICEF erakundearen enkarguz Javier Fesser zinemagileak Senegali buruz eginiko hogeita hamar minutuko dokumentua.

Noticias de Gipuzkoa periodikoaren zuzendari albokoa, Arantzazu Zugastik aurkeztu zuen Agnes. Afrikako ahozko tradizioaren barrena murgildu gintuen honek. Horretarako Beningo vudú erlijioaren errepresentazio ezberdinak erakutsi zizkigularik.

Ostegunean Luisa Futoransky idazle argentinarraren tailerra egon zen Liburutegi Nagusiaren Ekitaldi Aretoan. Ez nintzen bertan egon, baina kontatu didatenez, maila onekoa izan zen jarduera eta hurbildutako berrogeita hamar lagunak gustura egon omen ziren.

Ostiralean, berriz, jende gehien bildu duen ekitaldia: Manuel Vicent idazle eta zutabegile ezaguna egon zen Okendon. Juan Velázquez irakasleak galdegin zion memoria eta nobela uztarketari buruz. Literatura ez zen ukitu zuten gai bakarra, kazetaritzari buruzko galderak ere tartekatu zituelako Juanek. Ohar asko hartu nituen, baina bost esaldi jarriko ditut hemen:

"Nostalgia ez da literarioa, malenkonia bai".

"Komunikabideak hain dira hedakorrak, mikrofonoa eskutan duen edozein idiota izaki arriskutsu bihurtzen dutela".

"Gaur egun teknika eta moralaren artean dagoen aldea ikaragarria da".

"XXI. mendeko literatur generoa kazetaritza da".

"Gutxi irakurriko da XXI. mendean. Kontutan izan haurrek behatzekin pentsatzen dutela jada. Kultura digitala".

Larunbat arratsaldean, zikloaren amaiera Loiola Kultur Etxearen eremuan. Martuteteneko kartzelaren atzealdean dagoen Benartegi baserriaren zelaian, Carlos Aurtenetxe, Luisa Futoransky eta James Wilkes poeten saioa. Eli Tolaretxipi aurkezlea eta irakurketen arteko tarteetan Izadi soka laukotearen musika.

Poesia gai da berrogeita hamar lagunetik gora elkartzeko hain toki liluragarri eta gogorrean. Liluragarria zelaiagatik, baserriaren xarmagatik, ibaiaren hurbiltasunagatik. Gogorra kartzelaren presentziagatik, poesia irakurtzen zuten bitartean entzuten ziren din-don-din abisuengatik.

Hurrengo urtean, gehiago. Txis pun.

En castellano

Atzo internet eguna bazen ere, ez nuen inguruan ezer berezirik nabaritu. Aldiz, museoen eguna ospatzen baita gaur, Donostiako museoek prestaturiko egitarauaren berri emateko prentsaurrea egin zen eguerdian Victoria Eugenian.

Zazpi eguneko egitaraua prestatu dute, gaur hasi eta maiatzaren 24ra arte. Donostiako pertsona ezagun batek hitz egin zuen erakunde bakoitzak prestatu duena ezagutzera emateko.

Zientziaren Kutxagunea ordezkatuz Naroa Agirre atleta eta aktoresa aritu zen. Gazteleraz hasi, baina itxuraz eroso ez zegoenez, euskarara pasa zen berehalakoan.

Museum Cemento Rezola gunearen bozeramaile lanetan bertako langile izandako Javier Irazusta aritu zen eta Chillida Lekuren eleduna Teresa Cormenzana dendaria.

Unai Ugalde irakaslea Untzi Museoaren izenean aritu zen eta Inazio Mujika Iraola editoreak Aquariumaren berri eman zigun. Biak euskaraz.

Txaro Arteaga kazetaria, Emakundeko buru ohia, Elizbarrutiaren Museoak prestaturiko egitaraua bota aurretik, bertan bildutakoak harritu zituen gunea ezagutzen ez zuela aitortu zuenean. Nik ere ez, Txaro.

Amaieran, Juan Mari Arzak sukaldariak hitz egin zuen San Telmo Museoaz.

Ekitaldia Mitxel Ezquiaga kazetariak aurkeztu zuen.

Ugaldek Einstein-en esaldi bat bota zuen “petit comité”an: “Zerbait eskatu behar baduzu, eskatu denborarik ez duen norbaiti”. Edo antzeko-parezido. Apuntatu nuen libretan.

Gaurko Noticias de Gipuzkoa egunkariaren azalean ageri da argazki hau.

En castellano