Irungoa naiz
Javi Vizcaínok idatzitako lerro hauek eraman naute teklatu eta pantaila aurrean jartzera. Jende gehiago ageri da alardean izeneko webgunean emakumearen partehartzearen aldeko iritzia plazaratuz.
Izan ere gaur alarde-eguna baitugu Irunen. Alarde-eguna baina bi alarde: betiko alardea, gehiengoak babesten duena (tartean nire koadrilako lagun gehienak, senide gehienak); alarde mistoa, gizonezko eta emakumezko soldaduekin.
Duela sei bat urte ondorengo lerro hauek idatzi nituen betiko alardeari buruz irundarren foro batean. Gazteleraz zegoena euskaraz jarriko dut hemen:
"Kontua ez da jendea botatzea, ezta inori alardean ateratzeko aukera ukatzea. Kontua da emakumeak alardean parte hartzeko aukera izatea".
"Ni ere Irungoa naiz. Ez naiz inoiz atera ditxosozko alardean. Niretzat argi dago: alardea herriko jaia da eta, horregatik, edozeinek izan beharko luke parte hartzeko aukera (eta ez bakarrik espaloitik)".
"Arazo nagusia da nik alardea espaloitik ikusten dudala eta parte hartu nahi duten Irungo neskek ez dutela horretarako aukerarik. Nik askatasun osoz erabaki dezaket, beraiek ez. Hori bai, nire lagunek Bartzelonako adiskideak ekar ditzakete herrira eta hauek lasai asko atera daitezke alardean, hori ahalbidetzen duen pitilina dutelako".
Sei urte pasa dira hori idatzi nuenetik eta gauzak lasaiago daude herrian. Baina oraindik bide asko dago korritzeko.
Gora Sanmartzial!
Loretopetik (XV) Indarkeria nagusi
Irutxuloko Hitzan ekainaren 28an argitaratutakoa.
Igande goizaldean emakume bat erail zuten Bilbon. Goizeko 11:00etan entzun nuen irratian zintzurra moztu ziotela. Geroxeago, lagun batek pasa zidan erailketaren berri ematen zuen interneteko lotura bat. Sasi-jakintsu, hau da, ezer ez dakienaren moduan, zera erantzun nion: "Kanpoko gero eta jende gehiago dago hemen, eta orain arte bertakoenak izan ez diren zenbait indarkeria ohitura hasi dira agertzen".
Ordurako banekien taberna latinoa zela, irrati esatariak bota baitzuen datua albistegian. Arratsaldean, berriz, interneteko bideo bat ikusi nuen. Esatariak zioen hemeretzi urteko ustezko hiltzailea dominikarra dela. Bizilagunek zioten askotan izaten zirela istiluak.
Kazetariek duten ohitura txarra da gaizkilea nazionalitatea jakin batekoa denean datu hori ematearena. Hiltzailea norvegiarra izango balitz, hain garbi adieraziko ziguten? Kazetari bizkaitar batek taberna latinoaren datua ematekoa zela esan dit, baita ustezko hiltzailea dominikarra zela. Nire tesiaren kontra ihardetsi dit Londresen berriki bi urteko alaba akabatzeagatik atxilotu zuten exekutiboari buruzko albiste guztiek tipoa bilbotarra zela azpimarratzen zutela.
Honekin loturik, Harresiak Apurtuz erakundeak ekainaren 27an aurkeztu behar zuen Bilbon "Inmigrazioa eta hedabideak. Kazetaritzarako jardunbide egokien eskuliburua" izeneko materiala. Ez naiz kazetaria, baina interesgarria dirudi ahaleginak.
Indarkeria autoktonoa ere badugu, zelaia uzten ez dakien ETArena, besteak beste. Loiolako kuartela ez dakit autoktonoa ote den, baina hemen dago. Duela aste batzuk, itxura guztien arabera bertakoak ziren soldadu batzuekin egin nuen topo taberna batean, gaugiroan. Latinoamerikar bi, edanda eta edaten; on puska itxura zuen ekialdeko kankailu bat; taberna guztiari desafio egiten zion beste tipo zatar bat. Orduan pentsatu nuen Espainiako nazionalitatea eskuratzeko batzuek zer nolako lanak hartu behar dituzten.
Igande arratsaldean Armada espainiarreko kide ziren sei soldadu hil zituzten Libanon, horietako hiru kolonbiarrak. Pasa den udazkenean Joseba Kamiok Artelekun eginiko EH 2.0 jardunaldietan jarritako adibide batetaz gogoratu nintzen orduan. Telebista informatiboa batean ikusitako gauza deigarri bat aipatu zuen, gaur egungo egoera globalizatua laburbiltzen duena: soldadu bat, kolonbiarra, abizen euskaldunekoa, Armada espainiarreko kide, Nazio Batuen Erakundeak Libanon duen indar armatuetako partaide.
Gazteak bortitzak direla esango dugu gero, baina egiturazko indarkeria marka guztiak puskatzeko modukoa da gure gizartean. Igandeko Berrian beste adibide xume bat. Hamar mila langile kaleratu behar dituen Airbus hegazkingile europarrak nabarmen hobetu dituela emaitzak azken bolada honetan.
Ondo goaz, bai. Hain ondo, bandera txuria ateratzeko gogoa ematen baitu.
Azkargorta edo Galeseko hirukoa
Pasa den igandean Xabier Azkargortari eginiko elkarrizketa hau entzundakoan, konturatu nintzen oraingoan ere ez dela etorriko Donostiara.
Gainera, komunikabide ezberdinek argitaratu dute Administrazio Kontseiluak John Benjamin Toshack aukeratu duela Reala bide onean jartzeko. Salva Iriarte izendatuko omen dute kirol zuzendari eta Chris Coleman entrenatzaile.
Baga
Marka da gero, berriro ere JB jarri nahi izatea agintzen. Inor ez al da gogoratzen aurrekoan nola kanporatu zuten?
Biga
Lotsagarria iruditzen zait gizon honi laugarren aukera eman nahi izatea eta Azkargorta azpeitiarrari, harrobikoari azken finean, aukera bakar bat ere ez ematea.
Higa
Larunbatean irakurri nuen nonbaiten Salvak jarraituko zuela Galesekoentzat lanean, baina hemen ezetz diote, full time arituko dela. Dena dela, JBk bai jarraituko duela Galeseko hautatzaile. Ez al da askoz ere logikoagoa egoeraren gordina aintzat hartuz, dagoena buru belarri aritzea?
Tristea da egoera, bai. Eskerrak behintzat Eibar Bigarren Mailara igo den. Zorionak.
Donostiako moda berria
Realak Lehen Mailan jarraitzeko arazoak zituela-eta, Administrazio Kontseiluak bazkideen artean Anoetan jokatu beharreko partidetarako gonbidapenak banatzea erabaki zuen. Reala putzura joan da, baina joera berri bat finkatu du hirian.
Ostiral arratsaldean eman zidaten abisua: Donostiako Udala gonbidapenak banatzen ari zela zenbait udal ekipamendutan. Sarrera gutxi batzuk izango zirela uste nuen, baina oker nengoen. Larunbat goizean pieza berri bat gehitu nion puzzleari: Udaletxeko atarian jaso behar zirela sarrera horiek. Eta ondo esan dut: ez ziren gonbidapenak, preziodun sarrerak baizik. Hamarnaka banatu omen zituzten, lehen aipatu zenbait udal ekipamendutako erabiltzaile eta pertsonalaren artean.
Haserretu egin nintzen: ez zait ondo iruditzen sarrerak horrela banatzea (65, 73, 105 euro edo gehiago pagatu duen jendea gozoa egongo da); baina gonbidapenak barra-barra banatu badituzte, nola ez da inor akordatu kontzertuaren muntaia gorabeheratsua sufritu dugunokin? (kultur etxeko langileetaz ari naiz, bai; norbaitek pentsatzen badu haserre nagoela gonbidapenik gabe geratu naizelako, ez nau ezagutzen, baina libre da hori pentsatzeaz, noski).
Halere, sutan jarri nintzen jakin nuenean EGazteak bi mila sarrera (oharra: edo mila izan ziren?) banatu behar zituela Miramongo Estudioetara hurbildutako lehen mila lagunen artean. Kaguenlarrusia!
Webgunean informazio hau aurkitu dut: "Eguerdiko 12:00etatik aurrera Miramongo egoitzan banatu ditu Egazteak Rolling Stones ikustera joateko sarrerak, euren kanta baten izena esate hutsaren truke. Sarrera guztiak agortu dira dagoeneko!"
Albistea atzo eguerdikoa da. Saiatu naiz komunikabide konbentzionaletan honi buruzko informazio gehiago topatzen, baina oraingoz ez dut ezer aurkitu.
Argi dago Rolling Stones taldeak kobratu beharrekoa kobratu duela. Badirudi Euskal Herriko promotorak dirua galduko duela emanaldiagatik, baina jakin nahiko nuke kontzertuak zenbat diru publiko suposatu digun donostiarroi, gipuzkoarroi, euskaldunoi.
Lehen lerroetan aipatu bezala, Realak joera berri bat finkatu du. Ikusteko dago noiz arte bota dezakegun harrika guztion dirua.
Eguneratzea: 17:15. Lok egindako jestioengatik lortu ditut La Máquina de Huesos argazkilari famatuak eginiko zenbait argazki. Eskerrik asko bioi. Webgunean dituzue erretratu gehiago.
Eguneratzea: ekainak 29. 10:00etan. Bihar Ejidon daude lau golfoak. Iaz bertan behera utzi behar izan zuten emanaldia eta hemen barkamena eskatzen dute. Adi Keith Richardsekin.
Eguneratzea: ekainak 29. 18:45etan. Bi langile hil dira Madrilen eszenatokia desmuntatzen ari zirenean. Goian beude.
Segundan
Lagartija Nick taldearen saioan egon naiz Gazteszenan. Ekitaldi honekin Musikaren Eguna ospatu nahi izan du garagardo marka batek Donostian. 1996an Morente artista flamenko handiarekin grabaturiko Omega gustuko lanen artean badaukat ere, inoiz ikusi gabea nuen zuzenean Granadako talde zaratatsua eta azkar joan da ordubeteko emanaldia.
Egile eskubideak: Jon Iraundegi
Afalorduan Irutxuloko Hitzaren laguntza izan dut. Donostiako egunkariaren bezperako zenbakian Gaztelumendi anaiek idatzitako Primeran artikulua irakurri dut. Bertan Realaren jaitsiera aipatzen dute, futbolak duen garrantzia bere tokian jarriz.
Gaurko gutunen artean, berriz, ekainaren 30ean Realaren Ez-ohiko Batzar Nagusirako deialdia jaso dut. Ez dakit agertuko naizen (agian hauei emango dizkiet nire bost akzioak), baina ezinezko ikusten dut gaur egungo agintariak klubetik joatea.
Asteartean egin nuen topo taberna batean Administrazio Kontseiluko zenbait kiderekin. Anoeta Estadio aldamenean zeuden bilera baten ondoren. Ez zegoen jende askorik, baina lasai aritu ziren solasean.
Ez da lehenengo aldia beraiekin topo egiten dudala taberna horretan. Realak Osasunaren aurka galdu ondorengo astelehenean, lanetik atera eta bertara joan nintzen trago bat hartzera. Han zeuden kontseilu kideak. Buelta eman eta etorritako bidetik joan nintzen etxera. Edozer gauza esateko moduan nengoen-eta.
Ez dut esango direktiboak jipoitu behar ditugunik, baina ezer pasatuko ez balitz bezala ibili nahi izateak, klubaren aginte makilarekin jarraitu nahi izateak, amorrarazten nau.
Bi urteko kudeaketa negargarria egin ondoren, egungo Administrazio Kontseilua ez da gai taldea Lehen Mailan jartzeko. Utikan.
Artea Oinez 07 Donostian
Gaur inauguratu da Donostian Artea Oinez erakusketa. Rolling Stones taldearen kontzertuak sortu dituen arazoak albo batera utzita (XXI. mendeko kolonizazioa zer den jakin nahi baduzue, pasa Anoeta Estadioaren ingurunetik egun hauetan).
Erakusketa ikusgai egongo da Ernest Lluch Kultur Etxean uztailaren 20ra arte: astelehenetik ostiralera (16:00etatik 20:30etara) eta larunbatetan (16:30etatik 20:30etara).
Hona hemen prentsa-oharretik jasotako zenbait zati:
Iruña, Gasteiz eta Lizarratik pasa ondoren, erakusketa ibiltaria Donostian egongo da hilabetez Ernest Lluch Kultur Etxean.
Nafarroa Oinez-eko ekitaldien barruan dagoen arte erakusketa hau kultur erreferente bihurtu da 2000an sortu zenetik, hain zuzen San Fermin Ikastolak antolaturiko edizioan.
Harrotasun eta gogo handiz hartu du Vianako Erentzun Ikastolak Nafarroa Oinez eta Artea Oinez erakusketa antolatzeko erantzukizuna 2007an. Hasieratik zuten garbi kalitatezko arte erakusketa bat antolatu nahi zutela, artista euskaldunen sormen anitzaren erakusleiho, artista ezagunak eta balore berriak nahasiz, Viana eta Lizarraldeakoak aintzat hartuz.
Erakusketak 86 artisten artelanak bildu ditu: olioa, akrilikoa, collage-a, teknika mistoa, eskultura, litografia, grabatua, argazkigintza digitala... Horiek guztiak bisitariak erakusketa aretoan bertan erosteko aukera izango duen liburuxka batean ageri dira ere.
Orrialde honetan artista bakoitzaren izenaren gainean klik eginez gero, artelan bakoitza ikus daiteke.
Udalak eta boterearen pornografia
Atzo zen eguna. Maiatzaren 27an batutako botuak hartu, hau zuretzat, bestea niretzat, irabiatu eta ka-ta-plof, listo, sortu dira datozen lau urtetan Hegoaldeko herriak gobernatuko dituzten udalbatzak.
Donostian Ezker Batua Berdeak Aralar koalizioak Partido Socialista de Euskadi-Euskadiko Ezkerrarekin lortu du akordioa (gero eta izen luzeagoak dituzte gaur egungo indar politikoek, portzierto). Ez dute orain garbi esaten, baina aste honetan bai bota zutela gobernu akordiotik at utziko zutela errauskailua. Ederki! Horrela jarraituz gero, politika antiterrorista ere ken daiteke mahai gainetik eta PPrekin lortu akordioa hurrengo batean.
Donostian ere egon da beste sorpresa handi bat: Ramon Etxezarretak adio esan zuela aditu genuen guztiek, baina alkateak eginiko eskaintzari baiezkoa eman ondoren, Kultura Delegatu jarraituko du urrestildarrak. Datorren astean esplikatuko omen du erabakia.
Denok ikusi, eta askok txalotu, dugu ere Sartagudako alkate sozialistaren seta. Iruñean eta Madrilen hartutako erabakiei muzin egin eta herriko ANVko zinegotziaren botoa baliatu du alkatetza lortzeko José Ramón Martínez Benitok. Ostiral arratsaldean entzun nituen haren adierazpenak irratian. 25 urte zeramatzala afiliatuta eta alderdiak zigortuz gero, bost axola hori berari. Politika ez duela ogibide eta urte horietan guztietan partiduak dirua eta denbora kendu diola soilik.
Gaur ikusi dut ere Gararen azalean ageri den Ondarroan ateratako argazkia. Herri honetan ANVko kandidatura ilegalizatuak gehiengo absolutua lortu zuen maiatzaren 27an. Atzo gainerako alderdietako kideak ez ziren Udaletxera hurbildu beren tokiak hartzera (PPkoa uste dut agertu zela bakarrik).
Donostia, Bilbo, Iruñea, Gasteiz, Baiona, Paris, Madril. Han hartutako erabakiak, herrietan bete behar. Eta askotan herritarrak bata bestearen kontra jartzen dituzte. Tamalgarria. Batez ere, etorkizuna kolokan duten herrietan. Eta horietakoa da Ondarroa.
Ez genuke herritarrok boterearen pornografiari men egiten dutenen sare pelagikoetan erori behar. Erraza da esatea. Hori betetzeko formularik ezagutzen duzue?
Gay edo lesbiana? Lasai, sendatuko zara
Nabari da gay eta lesbianen harrotasun eguna ospatzeko gutxi falta dela. Toki ezberdinetan azaltzen dira aipamenak, baita sarean ere. Interesgarria da, adibidez, Luis Foncillasek bere blogean idatzitako apuntea.
AEBetako kazetari gay eta lesbianen NLGJ elkarteak egun horren berri emateko eginiko zenbait aholku aipatzen ditu Luisek. Foncillasek elkarte honek duela zenbait urte ateratako manual baten berri ematen du ere. Bi lotura daude: ingelesez eta gazteleraz.
Esan bezala ondo dago apuntea, baina txundituta utzi nauena lehen komentarioa izan da.
"La homosexualidad es un trauma del que se puede salir, muchos médicos trabajan en este sentido y la pagina www.esposibleelcambio.com. Animo!!! dejad de ser gays y realizaros plenamente como personas, no obliguemos a todos los que tienen tendencias homosexuales de vivir infelices toda la vida Publicado por: lucas - 12.06.07 09:05:19”
Horrelako komentarioa irakurri ondoren, bertan aipatutako webgunera jo dut zuzenean. Taldearen izena Grupo Juan Pablo II da. Eta laburbilduz, Aquilino Polaino eta Palentziako gotzaina den José Ignacio Munillaren tesiak jarraitzen dituzte.
Baten batek pentsatuko du hobe dela horrelako ekimenei kasu askorik ez egitea. Eta igual arrazoia dauka. Baina gaur ezin izan dut paso egin.
Eskola publikoa
Atzo zortzi Euskal Eskola Publikoaren aldeko jaian egon nintzen Ondarroan, beste lagun asko bezala.
Ikasketa guztiak sare publikoan egindakoa naiz, etxean eskola pribatu batera edo ikastolara bidaltzeko dirurik ez zegoelako. Beraz, barrutik ateratzen zait niri publikotasunaren aldeko jarrera hori.
Seme-alabarik ez dut, baina bai harritu nauela familiakoek edota lagunek beren seme-alabak eskolaratzerakoan egin dituzten zenbait hautu. Denetarik dago, baina esango nuke pribatuaren aldeko joera gailentzen ari dela.
Ondarroan egon zen ere Javier Vizcaíno eta blogean idatzitako apunteak irakurleen arteko debatea piztu du. Bertan badaude arrazoi batzuk nire inguruko jendearen erabakia ulergarri egiten dutenak.
Ikusten da ere badagoela irakasle kontzientziatu eta auto-kritikorik, gurditik tiratu nahi duena. Ezin baita beti izan diru eskasia eta agintarien gaitasun eza sare publikoan dagoen problema guztien sorburu. Hori biktimismo-bertan-goxoa da (oso kirol euskalduna).
Honen harira dator duela egun batzuk lagun batek kontatu zidan dei bitxi bat. Berak jardunaldi batzuk antolatu ditu azken urte hauetan eta unibertsitate publikoko irakasle bertan goxo bat kexu omen zen inork ez ziolako berari jardunaldien berri eman. Potroak behar dira, dedio!
Bukatzeko, ikastola (pribatu jarri behar nuen, baina igual norbaitek badu zer esana) bat aipatu nahi dut. Aste bukaeran jaso behar zuen Maite Goñik saria Bartzelonan. Ordiziako Jakintza Ikastolako IKTeroak taldeko partaideak landutako Euskal Jakintza blogak irabazi baitzuen duela hilabete inguru I. Espiral Saria ikasgelako blogen kategorian. Kronikaren zain nago, Maite.
Bidaiatzeko beharraz
Euskal Herriak gu akabatu baino lehen, hobe da bolada batez hemendik hanka egitea. Aste honetan bidaiatzearekin loturiko pare bat notizien berri izan dut.
Imanol Alvarez
Arrate eskubaloi taldeko bigarren entrenatzailea da Imanol eta, apustu bat tarteko, Ermuatik Hungariako Tatabanya herrira abiatu da bizikletan. Hori kontatu zuen, behintzat, asteazkeneko Noticias de Gipuzkoan.
"Arrateko jokalari nintzela, harreman ona nuen Jenörekin. Bera Athleticzalea zen eta ni Realzalea, eta egun batean esan nion Reala jaisten zen egunean bere etxera txirrindan joango nintzela. Aurten gauzak itsusi jartzen ari zirela ikusirik, eta Viktor (Debre) zein Jenö-rekin dudan harreman ona aintzat hartuz, prestaketak hasi nituen urte hasieran. Nahiz eta mailari eutsi, bidean naiz jada. Apustua tarteko, gustuko gauza egiten ari naiz".
Abentura uztailaren lehen egunetan burutzeko asmoa dauka Imanolek. Egunero nondik nora dabilen kontatzeko konpromisoa hartu du eta, horretarako, Sin cadena bloga erabiliko du.
Zorte on eta ea Realak gaur beste astebetez Lehen Mailan jarraitzeko aukerari adiorik esaten ez dion.
Dina Bilbao Bidaia Beka
Dina Bilbao abenturazale ondarrutarraren omenez haren lagunek antolaturiko beka deialdia aurkeztu da aste honetan ere. Dina Karibeko uretan desagertu zela hamargarren urteurrena beteko dela aprobetxatu dute, urtero antolatu izan den Tolosa Ondarroa bizikleta martxa (Zapato Azulen, Dina Martxi) ahaztu gabe.
Hona hemen bekaren oinarriak.
Laburbilduz:
Gazte jendeari zuzendurikoa da (16-18 urteko gazteei).
Zazpi eta hamar egun bitarteko bidaia proposamen bat aurkeztu beharko dute.
Gehienez hamar orri aldetan azaldu behar da asmoa (euskaraz).
Proiektu irabazleak denbora eta laguntza izango du bidaia prestatzeko (irailean).
Bidaia bederatzi lagunentzat bereziki prestatutako furgoneta batean egingo da.
Talde irabazlearekin Josu Iztueta bidaiaria eta beste pertsona bat joango lirateke.
Bidaiak gehienez 3.000 euroko aurrekontua izango du.
Lanak jasotzeko epea ekainaren 20a izango da, eta 23an emango da ezagutzera irabazlea.
Lanak bidaltzeko:
Postaz: Dina Bidaia-Beka; 104 Posta Kutxa; 20400 TOLOSA; GIPUZKOA
Posta elektronikoz: dinabidaiabeka@gmail.com
