Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Eibartik / La Mancha hezea, txoritarako inguru berezi eta aberatsa

La Mancha hezea, txoritarako inguru berezi eta aberatsa

Asier Sarasua 2021/10/03 13:15
Kuku mottodunak, gangak, basoiloak, ahate buruzuriak, zertzeta marmolaireak... hegazti esteparioak zein urtarrak behatzeko leku ederra dira Ciudad Real inguruan sakabanatuta dauden urmael eta ordoki hauek.
La Mancha hezea, txoritarako inguru berezi eta aberatsa

Tablas del Záncara

La Mancha Húmeda deitzen diote Ciudad Realen (eta Mantxako inguruko probintzietan) bizirik dirauten hainbat aintzira, 'tabla' eta hezeguneri. Babes bereziko naturguneak dira, bertan aurkitu daitezkeen animalia eta landare komunitate aberats eta bereziengatik.

Daimielgo Tablak dira inguru zabal honetako naturgunerik ezagunenak, baina dozenaka toki gehiago ere badaude, txorizaleentzat oso interesgarri direnak. Hezeguneak eurak ez ezik, baita inguruko landa-lur eta sailak ere. Esate baterako, kuku mottodunak, ahate buruzuriak, ardeidoak, gangak, karrakak edo basoiloak ikusteko leku aparta da ingurumari hau.

Gizakiaren jardunak ia desagertzeraino idortu ditu Mantxako hezegunerik gehienak, baina oraindik bada nora joan eta zer behatu. Alcazar de San Juan, Manjavacas, lagunas de Pedro Muñoz, Navaseca, Tablillas del Záncara... txoriketan jarduteko leku on-onak dira (webgune teknikoki kaskar honetan aurkitu dut hezegune hauen inguruko informaziorik zehatz, zabal eta praktikoena).

2021eko ekainean 5 egun pasatu nituen txoritan Alcázar de San Juan eta inguruko lautadetan eta hementxe azal-azaleko laburpen bat, egondako tokiak eta ikusitako espezie nagusiak. Uda ez da sasoirik onena bisita hau egiteko, seguru asko, baina edozein garaitan aurkituko dugu zer beha eta zer goza Mantxa aldeko hezegune hauetan (amaieran zerrendatu ditut egonaldi honetan ikusi eta identifikatutako espezieen zerrenda).

Mantxa hezea 18

Beltzaranak (Plegadis falcinellus). Navasecako urmaeletan (Ciudad Real).

Complejo lagunar de Alcázar de San Juan

La Veguilla (Alcazar de San Juan). Mantxako urmaelik ezagun eta garrantzitsuenetakoa. Uretan ez ezik, inguruko lurretan ere espezie interesgarri franko aurki daitezke. Txori-behaketarako nahiko ondo prestatuta dago La Veguilla (behatoki egoki samarrak, ibilbideak markatuta...). Espezie interesgarri batzuk ikusteko primerakoa da Veguillako urmaela (flamenkoak, koartza mota ugari, zingira-mirotzak, lezkariak,...), bereziki galtzeko zorian izan ziren eta oraindik mehatxatuta dauden ahate buruzuriak eta zertzeta marmolaireak.

La Veguilla ondoan, Complejo lagunar de Alcázar de San Juan izeneko naturgune babestuan, beste 2 aintzira ere badaude. Laguna de las Yeguas (udan lehortu egiten da, zeharo) eta Laguna del Camino de Villafranca. Azken hori oso zabala da eta primerakoa zankaluzeak (limikoloak) eta larido-esternidoak (itsas enarak, txenadak, kaioak, antxetak...) behatzeko. Hala ere, hezegune honetan hegaztiak behatzea zailagoa da, ez dagoelako behatokirik eta errepideak ur-bazterretik urrun samar geratzen direlako, oro har.

Mantxa hezea 04

La Veguillako aintzirak dozena erdi behatoki ditu, gehienak nahiko toki egokian kokatuta eta egoera onean.

Mantxa hezea 07

Lezkari arruntak (Acrocephalus scirpaceus) La Veguillako bazter guztiak betetzen ditu bere kantuarekin.

Mantxa hezea 17

Ahate buruzuria (Oxyhura leucocephala) galzorian egon zen duela urte gutxi. Azkenaldian bere populazio egonkortzen eta hazten ari da. Mantxa Hezea da espezie hau behatzeko tokirik onenetakoa.

Mantxa hezea 26

Zertzeta marmolairea (Marmaronetta angustirostris) ere mehatxatutako espeziea da. Alcazar de San Juanen eta aldameneko Pedro Muñozen espeziea berriro sartzeko programak arrakasta izaten ari da.

Mantxa hezea 28

500 flamenko baino gehiagoko taldea La Veguillan lotaratzen.

Tablas edo Tablillas del Záncara

Alcázar de San Juan hegoaldean dago Tablas del Záncara naturgunea, Záncara eta Gigüela ibaiek bat egiten duten lekua (Junta de los ríos izenez ere ezaguna). Lehenengoak ur geza darama, bigarrenak gazia, eta biak elkartzean, ezaugarri ekologiko berezi eta aberatsak dituen naturgune zoragarria sortzen da inguru zabal honetan.

Zoritxarrez, gaur egun erabat txikituta dago jatorrizko urmaela. Garai batean 3.500 hektarea estaltzen zituen urak bi ibaien arteko eremu honetan; gaur egun 150 hektarea besterik ez dira, urterik euritsuenetan.

Jatorrizko altxorraren adibide txiki bat besterik ez da geratzen, beraz, gizakion eraginaren ondorioz, baina hegaztientzat oraindik leku garrantzitsua da, bere txikitasunean. Karrakak, argi-oilarrak, basoilo txikiak, erle-txoriak, Naumann etxe-belatzak, atalarrak, galeperrak, eperrak, usapalak... erruz ikusten dira bazterrotan. Gehienbat goizeko lehenengo orduetan, jakina. Gipuzkoar batentzat, leku exotikoa, zeharo.

Mantxa hezea 01

Ugaztunen artean untxiak dira ugarienak. Ehunka ikus daitezke edozein parajetan. Hainbeste untxi egonda, arraroa egin zitzaidan hain harrapari gutxi ikustea (arrano ertain eta handientzat paraje egokia izan zitekeen, baina ez nuen bakar bat ikusi; beharbada habia egiteko leku egokiak faltako zaizkie).

Mantxa hezea 30

Naumann belatza (Falco naumanni), espezie migratzailea, iberiar penintsulako harrapari txikienetakoa. Kolonia txikietan kumatzen dira, batez ere gizakion eraikuntzetako zuloetan (etxe-belatza ere deitu izan zaio Naumann belatzari; izen egokia iruditu zait beti).

Mantxa hezea 31

Karraka europarra (Coracius garrulus), nire espezie gustukoenetako bat. Jatorri afrikarreko espezie honen urdin dirdaitsuak kolorez betetzen ditu Europa hegoaldeko ordokiak.

Mantxa hezea 32

Atalarra (Burhinus oedicnemus), gure "Juanito txistularia", halaxe entzuten delako goizalde eta ilunabarretan, txistulari, liruli-liruli.

Mantxa hezea 27

Esango nuke azkenengo kuku mottodunak XX. mendean ikusi nituela. Ederra izan da espezie hau berriz ikusi ahal izatea (6-8 ale ikusi nituen), espezie iheskor hau ondo behatzea gaitza den arren.

Manjavacas (Mota del Cuervo, Cuenca)

Hezegune gehienak Ciudad Realeko probintzian dauden arren, salbuespen den Manjavacas (Mota del Cuervo, Cuenca) da lurralde hauetako naturgunerik gomendagarrienetariko bat. Babestutako naturgunea da, batez ere hegazti negutar eta migratzaileentzat duen garrantziagatik.

Bizpahiru arrazoi aipatuko nituzke Manjavacaserako bisita aholkatzeko. Garrantzitsuena: txenada mokobeltz (Gelochelidon nilotica) kolonia ikusgarria dauka eta espezie hau ikusteko leku paregabea da. Gainera, inguru osoa ere aberatsa da, alboan dituen landa eta lur-sailekin, eta bionaniztasun handia dauka. Bukatzeko, 8 kilometroko perimetroari itzulia emateko bidexka bat dauka (oinez, bizikletaz edo kotxez) eta pare bat behatoki ere baditu. Leku eder bat txoritan jarduteko.

Manjavacaseko hezegunea da Mota del Cuervoko urmaelik zabalena eta ur gehien izaten duena (udan gutxi), baina bere inguruan beste 4-5 aintzira txikiago ere badaude, tarteka baizik ureztatzen ez direnak: Sánchez Gómez, Alcahozo, La Dehesilla, Navaluenga eta Maljarejo. Aintzira-multzo osoa eta bere inguruko eremu guztia daude babestuta.

Mantxa hezea 12

Txirritxo handia (Charadrius hiaticula), Europa iparraldean, Eskandinabian, Siberian, Groenlandian... kumatzen den espeziea, lotsabako eta lasai, Manjavacasen.

Mantxa hezea 14

Complejo Lagunar de Manjavacas (Mota del Cuervo, Cuenca). Udan nabarmena da aintzira hauetako gehienen gazitasuna.

Mantxa hezea 20

Mantxako hezegune gehienetan aurkituko ditugu flamenkoak, aintzira gazi hauetan ingurune egokia aurkitzen baitute elikatzeko eta ugaltzeko.

 

Daimiel eta Navaseca

Mantxa heze honetako padura eta hezeguneen arteko izen nagusia eta ustezko izarra da Daimiel. Parke Nazionala, ZEPA, Biosferaren erreserba... babes teoriko guztiak ditu eta sekulako potentziala daukan eremua da... baina burua altxatu ezinda dago 1990. hamarkadatik. Lehorreko labore tradizionalen ordez sail ureztatuak ezarri dira azken hamarkadetan Mantxako eskualderik gehienetan eta Daimielgo Tablak urez hornitzen dituzten akuiferoak gero eta okerrago daude. Daimiel urik gabe ari da geratzen; eta, urik gabe, bizitza ere badoa.

Horren ondorioz, garai bateko aberastasuna galtzen jarraitzen du Daimielek eta itxura pobrea dauka ia beti, zer esanik ez udan.

Daimiel pobrearen alboan, ostera, ezusteko ederra ematen du bere arreba txikiak, Navasecak. Daimiel herri alboan dago eta, urte guztian zehar daukanez ur-maila egonkorra (E.D.A.R.eko urak jasotzen ditu), une honetan oso leku egokia da Navaseca txoriketarako. Perimetro guztia egin daiteke oinez (4-5 km) eta hagitz ongi dago egokituta hegaztiak behatzeko, behatoki on bezain ugariak dituelako. Ingurumari hauetara hurreratzen den txoriburuarentzat must bat da Navaseca.

Navasecan oso erraz ikus daitezke hainbat espezie urtar interesgarri (flamenkoak, beltzaranak, ahate buruzuriak, uroilo urdinak, abozetak, mota guztietako zankaluzeak...) eta bere inguruko lur-sailak ere oso erakargarriak dira txorizaloentzat, gangak, atalarrak, erle-txoriak, mozoloak... eta abar ikusteko. Ezusteko ederra izan zen Navaseca.

Mantxa hezea 15

Navasecako naturgunea, leku aparta txoriketarako.

Mantxa hezea 16

Mozolo arrunta (Athene noctua).

Mantxa hezea 19

Uroilo arrunta (Gallinula chloropus), espezie ugaria hezegune guztietan. Uroilo urdinik ez nuen ikusi, ostera.

Mantxa hezea 21

Antzara hankagorriztak (Anser anser) habiagile arruntak dira Manjavacasen.

Mantxa hezea 22

Mantxako hezegunerik egokiena da Manjavacas txoriak behatzeko. Perimetro guztia egin daiteke oinez eta dozena erdi behatoki daude bertan. Ur-maila egonkorra da urte guztian zehar eta hegazti populazio handiak ikus daitezke urtaro guztietan, ber-bertan.

Mantxa hezea 23

Daimiel lehor zegoen 2021 uda honetan. Zoritxarrez ohikoa da hori Daimielen, baita beste urtaro batzuetan ere, naturgunearen kudeaketa negargarria dela eta.

Mantxa hezea 24

Murgilari arrea (Aythya nyroca). Galzorian dagoen espezie. Daimielen hazi egiten dituzte eta inguruko hezeguneetan askatzen.

Mantxa hezea 25

Behatokia Daimielen.

Lagunas de Villacañas

Alcázar de San Juan eta Villacañas arteko pareje zabaletan 3 urmael edo aintzira daude, hirurak ere elkarren ondoan eta oinez bisitatzeko moduan. Taray, Peñahueca eta Tirez dira hiru aintzirok.

Azkenengo biek, Peñahuecak eta Tirezek, ur gutxi izaten dute eta udan erabat lehortzen dira. Laguna del Taray, ostera, Mantxa osoko hezegunerik garrantzitsuena da, bai hedaduraz, bai balio ekologikoei dagokionez. 

Tarayko aintzira oso egokia da sternidoak behatzeko, adibidez. Txenada, antxeta eta itsas enara espezie mordoxka beha daiteke bertan, besteak beste, itsas enara musuzuria (Chlidonias hybrida) aintzira hauetan kumatzen den eta oso ugaria den sternido txikia.

Hala ere, Tarayko aintzira honek baditu zenbait arazo, hegazti-behaketa zailtzen duena. Ez nuen aurkitu ez behatokirik, ez ibilbide zehatzik; distantziak handiak dira; ur-bazterra landaretzaz beteta dago eta oso zaila da hezegunea ganoraz ikustea eta hegaztiak aurkitzea; enpresa pribatu batek kudeatzen ditu hezegune honetako behatoki egoki bakarretakoak (sarbideak kontrolatuta dituzte); uraren kalitatea eta kudeaketa, Mantxako gainontzeko hezeguneetan bezala, ez da behar bezain ona.

Hori esan ondoren, esan behar dut goiz ederra igaro nuela paraje hauetan eta Taray eta Peñahueca arteko lurrak ere oso interesgarriak direla Euskal Herrian ugariegiak ez diren zenbait espezie lasai eta gustura behatzeko, hala nola, atalarrak, alaudidoak, erle-txoriak, argil-oilarrak, karrakak, gangak, hegaberak, zingira-mirotzak, bele txikiak eta abar.

Itsas enara musuzuria

Itsas enara musuzuriak (Chlidonias hybrida) ikusteko toki ezin hobea da Tarayko aintzira. Argazkia: J.M. Garg, CC BY-SA 4.0.

Mantxa hezea 03

Hegabera (V. vanellus) Tarayko aintzira inguruan. Hiruzpalau ale ikusi nituen eta, euren jarreragatik, esango nuke euren kumeak inguruan zebiltzala eta zaintzen ari zirela. Hegaberek lurrean egiten dute habia.

Mantxa hezea 06

Peñahuecako aintzira. Udan gatza besterik ez da geratzen. Hala ere, toki polita da txoritan egiteko, estetikoki ez ezik, baita hegazti ugari ikus daitezkeelako ere. Alaudidoak, karrakak, erle-txoriak, argi-oilarrak... dozenaka ikusi ahal izan nituen.

Mantxa hezea 08

Landa-txolarrea (Passer montanus), nahiko espezie ugaria oraindik Ciudad Realeko landa eremuetan, Euskal Herrian ez bezala.

Campo de Criptana eta Pedro Muñoz  arteko parajeak

Alcázar de San Juanetik ekialdera, Cuencako mugaraino, labore-sail zabalak aurkituko ditugu, Campo de Criptana eta Pedro Muñoz herrien bueltan. Hiru herri horiek osatzen duten eremua ere toki ona da txoritan ibiltzeko.

Negu partean (eta udaberrian), zalantza barik, Pedro Muñoz herrian dauden hezeguneak dira lekurik interesgarrienak. Hiru aintzira dira: Laguna del Pueblo, Retamar eta Navalafuente. Jatorriz aintzira endorreiko gaziak ziren hirurak. Azkenengo biak halaxe dira oraindik, jausitako euriaren arabera betetzen direnak (ez urtero) eta udan idor-idor geratzen direnak. Pedro Muñoz herrian bertan dagoen Laguna del Puebloren ezaugarri fisiko-kimikoak eta ur-emaria, ostera, erabat aldatuta daude. Ur gezarekin betetzen da, EDAReko emariarekin. Horren ondorioz, urte guztian dauka ura eta fauna interesgarria, baina jatorrizko ezaugarriak erabat ditu galduta. Inguru hau, beraz, batez ere azarotik apirilera bisitatzea aholkatzen da.

Pedro Muñozeko aintzirekin batera, beste hainbat ere aurkituko ditugu Alcázar de San Juan, Campo de Criptana eta Pedro Muñoz artean. Esate baterako, Salicor, Carros eta Pajares. Udan lehortu egiten dira, baina neguan leku interesgarriak izan ohi dira.

Uda partean, hezeguneak baino interesgarriagoak dira hiru herri hauen inguruko landa-soroak eta labore-sailak. Paraje horietako espezieak behatzeko toki aparta da eta erraz aurkituko ditu txoriburuak basoilo handia eta txikia, ganga azpizuriak, atalarrak, mirotz urdinak, arrano txikiak...

Mantxa hezea 09

Basoilo handia (Otis tarda).

Mantxa hezea 29

Basoilo txikia (Tetrax tetrax).

Mantxa hezea 10

Azeria Pedro Muñoz herriko aintziran. Ez ninduen ikusi eta ia-ia hanketaraino hurreratu zitzaidan. Ederra sustoa hartu zuena!

Mantxa hezea 02

Bele "begiurdin" txikia (Corvus monedula).

Mantxa hezea 11

Haize-erroten herria da Campo de Criptana (Ciudad Real). Ezin esan Mantxako herri gehienak politak direnik; Campo de Criptanako alde zaharra eta goikaldea gozagarriak dira, ordea.

Beste hezegune, urmael eta paraje batzuk: Quero, Villafranca, Lillo, Villacañas eta Campo de Calatrava eskualdea

Nire 5 eguneko egonaldiak ez zidan eman aukerarik Mantxako hezegune eta paraje guztiak miatzeko, jakina. Goian aipatu ditudan tokietaz aparte, beste hauek ere interesgarriak izan daitezke..

  • Lillo herri inguruko aintzirak, iparraldean, Toledoko probintziaren mugan: Longar, Altillo Chica, Altillo Grande eta Albardiosa.
  • Humedales de Villafranca de los Caballeros. Gizakiak erabat moldatuta, hondartza, jatetxe eta beste hainbat azpiegiturarekin. Neguan interesgarriagoak izan daitezke, jenderik gabe. Udan familien aisialdirako gune dira.
  • Villafranca: bainurako eta aisialdirako egokitutako aintzirak dira, hegaztien ikuspegitik ez bereziki interesgarriak.
  • Laguna grande de Quero. Normalean lehor dago eta landa-lurrez inguratuta dago.
  • Ciudad Real erdi-hegoaldean badira hegaztiak ikusteko beste leku batzuk ere (lautadetako hegaztiekin eta urtarrekin batera, baita errupikola eta harrapariak ere, esate baterako), baina ez nuen astirik izan. Hurrengorako gelditu dira Poblete ingurua eta Calatrava eskualde osoa.

 

Mantxa hezea 05

Behatokia Tablas del Záncarako hezegunean. 1960 arte lautada hauek urez estaltzen ziren euri-sasoian. Garai hartako 3500 hektareetatik, gaur egun 150 hektarea soilik dira neguan ureztatzen direnak. Desastre bat.

Mantxa hezea 13Ekaitza Manjavacaseko pasabidean.


Mantxa hezean behatutako hegaztiak (2021eko ekainean)

eBird aplikaziotik erauzitako laburpena.

# Espeziea
1 Antzara hankagorrizta - Anser anser
2 Antzara egiptoarra - Alopochen aegyptiaca
3 Paita arrunta - Tadorna tadorna
4 Ahate mokozabala - Spatula clypeata
5 Ipar-ahatea - Mareca strepera
6 Basahatea - Anas platyrhynchos
7 Zertzeta marmolairea - Marmaronetta angustirostris
8 Ahate gorrizta - Netta rufina
9 Murgilari arrunta - Aythya ferina
10 Murgilari arrea - Aythya nyroca
11 Ahate buruzuria - Oxyura leucocephala
12 Galeperra - Coturnix coturnix
13 Eper gorria - Alectoris rufa
14 Flamenko handia - Phoenicopterus roseus
15 Txilinporta txikia - Tachybaptus ruficollis
16 Murgil handia - Podiceps cristatus
17 Txilinporta lepabeltza - Podiceps nigricollis
18 Haitz-usoa - Columba livia
19 Pagausoa - Columba palumbus
20 Usapal europarra - Streptopelia turtur
21 Usapal turkiarra - Streptopelia decaocto
22 Ganga azpizuria - Pterocles alchata
23 Basoilo handia - Otis tarda
24 Basoilo txikia - Tetrax tetrax
25 Kuku mottoduna - Clamator glandarius
26 Sorbeltz arrunta - Apus apus
27 Uroilanda handia - Rallus aquaticus
28 Uroilo arrunta - Gallinula chloropus
29 Kopetazuri arrunta - Fulica atra
30 Atalarra - Burhinus oedicnemus
31 Zankaluzea - Himantopus himantopus
32 Abozeta - Recurvirostra avosetta
33 Hegabera - Vanellus vanellus
34 Txirritxo hankabeltza - Charadrius alexandrinus
35 Txirritxo handia - Charadrius hiaticula
36 Txirritxo txikia - Charadrius dubius
37 Kuliska buztanbeltza - Limosa limosa
38 Kuliska txikia - Actitis hypoleucos
39 Kuliska iluna - Tringa ochropus
40 Antxeta mokogorria - Chroicocephalus ridibundus
41 Kaio iluna - Larus fuscus
42 Txenada mokobeltza - Gelochelidon nilotica
43 Itsas enara beltza - Chlidonias niger
44 Itsas enara musuzuria - Chlidonias hybrida
45 Zikoina zuria - Ciconia ciconia
46 Ubarroi handia - Phalacrocorax carbo
47 Koartza hauskara - Ardea cinerea
48 Koartza gorria - Ardea purpurea
49 Koartza zuria - Ardea alba
50 Koartzatxo txikia - Egretta garzetta
51 Koartzatxo itzaina - Bubulcus ibis
52 Beltzarana - Plegadis falcinellus
53 Mokozabal zuria - Platalea leucorodia
54 Sai arrea - Gyps fulvus
55 Arrano txikia - Hieraaetus pennatus
56 Arrano beltza - Aquila chrysaetos
57 Zingira-mirotza - Circus aeruginosus
58 Mirotz urdina - Circus pygargus
59 Miru beltza - Milvus migrans
60 Zapelatz arrunta - Buteo buteo
61 Mozolo arrunta - Athene noctua
62 Argi-oilarra - Upupa epops
63 Erle-txoria - Merops apiaster
64 Karraka europarra - Coracias garrulus
65 Naumann belatza - Falco naumanni
66 Belatz gorria - Falco tinnunculus
67 Urretxoria - Oriolus oriolus
68 Mika arrunta - Pica pica
69 Bele txikia - Corvus monedula
70 Belabeltza - Corvus corone
71 Amilotx urdina - Cyanistes caeruleus
72 Kaskabeltz handia - Parus major
73 Dilindaria - Remiz pendulinus
74 Kalandria - Melanocorypha calandra
75 Hegatxabal arrunta - Alauda arvensis
76 Kutturlio arrunta - Galerida cristata
77 Ihi-txoria - Cisticola juncidis
78 Lezkari arrunta - Acrocephalus scirpaceus
79 Lezkari karratxina - Acrocephalus arundinaceus
80 Benarriz gorrizta - Locustella luscinioides
81 Uhalde-enara - Riparia riparia
82 Enara arrunta - Hirundo rustica
83 Enara ipurgorria - Cecropis daurica
84 Enara azpizuria - Delichon urbicum
85 Errekatxindorra - Cettia cetti
86 Arabazozo beltza - Sturnus unicolor
87 Zozo arrunta - Turdus merula
88 Urretxindorra - Luscinia megarhynchos
89 Buztangorri iluna - Phoenicurus ochruros
90 Pitxartxar burubeltza - Saxicola rubicola
91 Etxe-txolarrea - Passer domesticus
92 Txolarre iluna - Passer hispaniolensis
93 Landa-txolarrea - Passer montanus
94 Larre-buztanikara - Motacilla flava
95 Buztanikara zuria - Motacilla alba
96 Txonta arrunta - Fringilla coelebs
97 Txorru arrunta - Chloris chloris
98 Txoka arrunta - Linaria cannabina
99 Kardantxiloa - Carduelis carduelis
100 Txirriskila arrunta - Serinus serinus
101 Gari-berdantza - Emberiza calandra
Iruzkina gehitu

Erantzuna formulario hau betez utzi dezakezu. Formatua testu arruntarena da. Web eta e-posta helbideak automatikoki klikagarri agertuko dira.

Galdera: Zenbat dira hiru ken lau (idatzi zenbakiz) ?
Erantzuna:
Aurkezpena

Eibar, Euskalkiak, Natura, Etnografia

Asier Sarasua Aranberri

Eibar, 1969. Naturzalea txikitatik; txorizalea joan zen mendetik; euskaltzalea betidanik. Sasibiologoa eta sasifilologoa. Txoriak ez ezik, txori-izenak ere behatzen ditut han-hemen. Blogroll ibiltari bat ere banaiz.

..........................

Blog honetako testu original guztien lizentzia: Creative Commons by-sa.

Somerights20

..........................

Blog honetako gai nagusiak

Sarean

Asier Sarasua Aranberri Twitter

Asier Sarasua Aranberri Flickr

Asier Sarasua Aranberri Facebook

Liburu eta proiektuak
Lehen Hitza Euskaraz