Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Eibartik / Zabor bilketa: nire dekalogoa (4 puntutan laburbilduta)

Zabor bilketa: nire dekalogoa (4 puntutan laburbilduta)

Asier Sarasua 2013/04/26 09:55
Atzoko 4-5 txio birziklatuz, hementxe dator nire ekarpentxoa. Zaborra zaborraren gainean.

Zaborraren kontu honekin erabat aspertuta eta higuinduta nago. Lartxo, nire gorputzarentzat. Egunen batean baretu egin beharko dela kontua..., baina baretu ez ezik, Zaborraren Gerrak gorantz jarraitzen du. Azken egunotako gora-beherak ikustea besterik ez dago. Atzo bertan, albiste izan ziren Elgetako berria, Zumaiakoa, Gariren mezua, Teketenena,...; hori guztiori ordu gutxiren buruan (eta gauean #Debatea; 2 minutu ikusita nahikoa izan nuen).

Twitterren ere bizi ibili zen gaia atzo goizean, txio ta txio. Han ere esan nuen: Garik esandakoarekin ados nago, oro har. Gerra politikoa da, beste ezer baino gehiago, zaborren hau. Bando bi egin dira, alderdiekin lotutakoak, eta dena beltz edo zuri omen da: oinaztarrak eta ganboarrak. Teknikarien ordez, politikariak kontu teknikoetaz berbetan. Zabor usaina besterik ez diot hartzen. Han eta hemen antolatu diren mahai-inguruak eta erreferendumak ikustea besterik ez dago. Zaborren gaia ez dakit argituko zuten, baina gure ordezkarien (batzuen) maila ageri-agerian geratu da. Patetikoa.

Zelan heldu gara, orduan Gerra honetara? Erakunde, eragile eta alderdi gehienak ez daude birziklapenaren alde, ala? Lander Garrok EAJri egotzi dio gerra-egoeraren ardura osoa. Ni neu ez nago ados. EAJk gerra nahi izan du, jakina; Gipuzkoan izugarri interesatzen zitzaion (ondo bete du oposizioko alderdi bati dagokion desgaste lana, hedabideak alde zituela). Baina aurkariak ere ez dio muzin egin kolpe-truke horri. Azken batean, Garik aipatutako bandoen guda klasiko eta historikoa. Edo zu edo ni.

    Bilduren estrategia okerra iruditu zait kontu honetan (are gehiago denbora aurrera joan ahala, gizartearen zati handia aurka jarri zaionean). Sisteman oinarritu du eztabaida osoa, #atezAtekoa bai ala ez. Eta nire ustez behar zuen:

    • Birziklapen-tasa negargarriak ditugu Euskal Herrian; ez dago onartzerik. Ez gaitezen urde zikin izan.
    • %70eko birziklapen-tasa lortu behar da; sistema edozein delarik ere. Eta kitto.

    Izan ere, Atez Atekoaren aurkako jarreraren atzean, sarri asko "ez daukat birziklatzeko gogorik" ezkutatzen baita. Eta Bilduk ez du jakin hori azaleratzen; "sistema" izan da bere aldarria, eta ez hainbeste "helburua" (tira, laburbilduz diot).

    Eta horretara dator nire dekalogoa, 4 puntutan laburtuta:

    1.- Zaborra egoki sailkatu eta birziklatzea derrigorrezkoa izan behar da.
    Lan apur bat da, baina kontrakoak ezin du izan lekurik XXI. mendean. 2013. urtean birziklatzen ez duena txerri zikin bat da; ez du beste izenik. Lehenago ere derrigortu gintuzten zakarrak poltsetan pilatzera (errekara bota beharrean); eta ondoren zaborrontzietan pilatzera (etxeko atarian utzi beharrean). Ez dira pleistozenoko kontuak; nik neuk bizi izan nuen aldaketa hori 70-80 bueltan. Duela 30 urte ere jendea kexatu egiten zen, ea zergatik bota behar ote zituzten zakar-poltsak kontenedoretara, "eskubidea" zutela zakar-poltsak kalean uzteko, etxeko ate azpian. Inposiziorik ez, oihukatzen zuten orduan ere. Ba bai, inposizioa, gizartearen hutsikeriak erakutsi duelako 30 urteko nolabaiteko kontzientziazio lanak ez duela inolako emaitzarik eman. %30 inguru birziklatzen duen Eibarren bizi naiz; dena esanda dago.

    2.- Birziklatze-tasa minimo bat lortu behar da epe laburrean, %70 adibidez.
    Europako zuzentarauak %50eko helburua dauka Europa osorako. Gaur egun Europa erdi-iparraldeko herrialdeak bakarrik heltzen dira kopuru horretara, eta batzuk juxtu-juxtu. Gipuzkoan frogatu da %70-80 ere lortu daitekeela nahiko epe laburrean. Benga, animo, izan gaitezen Europako liderrak.

    3.- Herri (eskualde) bakoitzak erabaki dezala helburuak lortzeko sistema.
    Izan ere, geografia, demografia, hirigintza eta baliabideak ez dira berdinak leku oro. Atez atekoa fenomeno dabil Usurbilen; beste eredu batzuk landu nahi omen dituzte Elgetan eta Zumaian. %70 hori lortzen duten bitartean, herritarrek erabaki dezatela eredurik onena. Niri neuri, 5. edukiontzia iruditzen zait erosoena, esate baterako, baina garbi daukat nekez lortuko dela ganorazko birziklatze-tasarik eredu horrekin. Baina zergatik ez? Herritarren esku dago demostratzea.

    4.- Birziklatzen ez duenari isuna.
    Baditugu, ba, TAOzainak? Askoz ere komenigarriagoak ZAKARzainak. Benetan diot.

    Bilduk erakutsiko luke helburua dela beretzat garrantzitsua, ez sistema. Oposiziokoek erakutsiko lukete sistemaren aurka bakarrik daudela, baina prest daudela benetako apustua egiteko birziklapenaren alde (eta ez orain arteko urteetako demagogia).

    Elgeta eredu izan daiteke, beharbada. Baina atzoko ETBko #Debatea-ko pare bat minutu ikustea nahikoa izan zen konturatzeko, nire 4 puntuko dekalogoa ez duela inork onartuko.

    Joxe Aranzabal
    Joxe Aranzabal dio:
    2013/04/26 12:06
    Inork ez duela onartuko zure proposamena? Nik bai, oso zentzuzkoa iruditzen zait-eta. Eskerrik asko zure ekarpen interesgarri honengatik.
    Amatiño
    Amatiño dio:
    2013/04/26 12:42
    Ni ere bat nator lau puntuen espirituarekin. Baina bada datu bat gutxienez eztabaidagarria dena. Europar Batasunaren helburua 2020rako %50 birziklatzea baldin bada, zein arrazoi objektibo izan dezake nire herri-administrazioak niri 2014an %70 eskatzeko (inposatzeko?)? Zer esangura duzu zuk zeuk "%70 ADIBIDEZ" proposatzen duzunean?

    Kontua da, datuen arabera, Austria (63), Alemania (62), Belgika (58), Holanda (51) eta Suitza (51) direla nonbait aitzindariak eta ereduak. Eta gu, sekulako liskarretan, ia elkar astintzen, %70 baino gutxiago birziklatzen duena atzeratua, atzerakoia eta hutsaren hurrengoa balitz moduan. Ba nik ez dut uste hori denik bidea. Helburua da gero eta gehiago, epez epez, urtez urte eta elkarrekin erabakitako egitasmo batez, beti ere europar arauen barruan. Baina helburua ezin da izan norbait, adibidez, %70 otu zaiola eta...
    Juan José Araolaza
    Juan José Araolaza dio:
    2013/04/26 16:47
    Bai, neretzat ere horrelaxe dek. Eibarren orain illabete eta Garden laguntaldearen bultzadaz, udaletxeko osoko bilkurak onartu zien adostazun osoz, edukiontziaren bitartez erreziklajea egingo zala, bainan aurrez pauso garrantzitzuak emanez.
    Hau onartuta, 5 garrengo edukiontziari baietza ematea, askorentzat, orain arte bezela izango dela. Eta hori ez duk horrela. Jentea ez bada ohartzen eta berdin jarraitzeko asmoa baldin ba du, beharrezkoa izango dek derrigortasuna eta inspekzioa.
    Eta hori ikusi beharko diagu nola erantzuten dioten udaletxeko alderdiak
    Eta bai, ni ere nazka nazka eginda bukatu nin atzoko telebistako estabaida. Zerbait salbatzekoan Aintzane Ezenarrona izan zuan.

     
    asier
    asier dio:
    2013/04/27 11:47
    @joxe: eskerrik asko!

    @juanjo: Eibarren itxaropen gutxi, nik neuk.

    @amatiño: Estatistiketan bi datu nahasten dira, eta ez dakit hemen ere ez gabiltzan (nabilen) nahastu samar. Ez delako berdina zenbat "sailkatzen" den edukiontzietan, eta zenbat "birziklatzen" den benetan. Horrekin batera, kontuan izan helburua Europa osorako dela, tartean Errumania eta Bulgaria (hutsaren hurrengo sailkatzen eta birziklatzen dute). Nik neuk nahiago Alemariaren 63an egon. Une honetan, askoz hurbilago gaude Bulgariatik. Dena dela, lehenengo puntua da klabea, birziklatzea derrigorrezkoa izan behar dela. Behin hori onartuta (eta horrekin ados zaude), orduan lasai ibili: %70tik gora ibiliko zara inongo sakrifizio izugarririk barik. Halaxe daramagu etxean udazkenetik; "betiko" zakarrontzia 15-20 behin hustuz, asko jota.
    iñaki
    iñaki dio:
    2013/04/28 13:41
    Dekalogo horren 4 puntuak batean laburbiltzen dira: Atez-ate
    Jadanik demostraturik dago lau horrek betetzea nahi bada atez-atekoa derrigorrezkoa dela. Bostgarren kontenedorea jarri den tokietan ez da lortu eta ez da lortuko. Jendeari ez bazaio behartzen ez du egingo, askoz erosoagoa bait da zakar dena ontzi batean sartu eta berdera botatzea. Hor dago koxka, erosotasunean.
    Iruzkina gehitu

    Erantzuna formulario hau betez utzi dezakezu. Formatua testu arruntarena da. Web eta e-posta helbideak automatikoki klikagarri agertuko dira.

    Galdera: Zenbat dira hogei ken bi? (idatzi zenbakiz)
    Erantzuna:
    Aurkezpena

    Eibar, Euskalkiak, Natura, Etnografia

    Asier Sarasua Aranberri

    (Eibar, 1969). Blogroll ibiltari bat naiz.

    ..........................

    Blog honetako testu original guztien lizentzia: Creative Commons by-sa.

    Somerights20

    ..........................

    Blogeko gai nagusiak

    Sarean

    Asier Sarasua Aranberri Twitter

    Asier Sarasua Aranberri Flickr

    Asier Sarasua Aranberri Facebook

    Lehen Hitza Euskaraz