El centro del Bajo Deba
Asier Sarasua
2008/10/14 22:50
Errebaleko obrak geldirik daude oraindik. Udalak jarraitzen du esaten "berehala" hasiko direla eta, hasi bitartean, barandila berriak ipini dituzte eta iragarki zirraragarri eta erakargarriak: "Errebal Center: El centro del Bajo Deba". Izena ingelesez. Informazio guztia gaztelaniaz. Eskualdearen izena ez ofiziala. Ederto!
Ikaragarria da zein "ondo" ari den gestionatzen Errebaleko kontua udala. Txapuzaz txapuza dabil, eta segi aurrera. Hasierako proiektua, ondorengo sekretismoa, lurra pribatizatzea, inguruko auzotarrak kontra jartzea, lanak geldirik izatea hainbat hilabetez, lehengo merkatu plazako saltzaileen egoera penagarria, baserritarrei jarri zaien azpiegitura txapuzeroa...
Alderdi publikoa eta urbanistikoa ez ditut aipatuko kasu honetan. Horretarako badaude Errebalekoak. Hizkuntzaz bota nahi ditut hiru purrustada, aste honetan bertan jarri dituzten kartel ederrak gogoan hartuta:
- Zergatik eta zertarako ingelesezko izena? Zergatik Errebal Center? Zergatik ez euskal izena, edo errazago, lekuaren izena, Errebal hutsa? Modernoak gara Eibarren. Hori izango da.
- Hesi berrietan 15 kartel jarri dituzte. %100 gaztelaniaz. Onartezina.
- Eta gainera, merkatalgune berriaren leloa ere okerra eta eskualde honen benetako izena aintzat hartzen ez duena: "El centro del Bajo Deba". Gure eskualde honetako udaletxe guztiek aho batez onartu zuten duela mordoa (ondoren, Euskaltzaindiaren oniritziarekin), eskualde honen izena Debabarrena dela, euskaraz zein erdaraz, eta horixe bakarrik erabili behar dugula guztiok. Ez dagoela gaur egun ez Bajo Debarik, ez Alto Debarik, ez Deba Behea edo Deba Beherea bezalako enjendrorik.
Harrituta geratu naiz. http://fotodenuncias.diariovasco.com/2008/10/23/errebal-center-solo-en-castellano/#comments
Hau da gure herria, biba!