Eibartik

Bidaia ornitologikoa Maroko hegoaldera

Asier Sarasua 2025/09/07 16:30

Aurtengo negu amaieran Maroko hegoaldera egindako bidaiaren laburpen txiki bat. Txoritarako leku egoki-egokia euskaldun batentzat.

Buztanzuri magrebtarra (Oenanthe halophila)

Aspaldi Maroko bisitatzeko gogoz, aurten izan dugu aukera herrialde eder horretako hegoaldera bidaiatzeko. Turismo kulturalaz gain, turismo ornitologikoa egiteko ere aprobetxatu dugu (Ainhoaren pazientziari esker ;).

Izugarri gustatu zitzaigun ikusitako guztia. Bilbotik Marrakexera hartu genuen hegaldia eta hiri zalapartatsu eta zoro horretan pare bat egun egin ondoren, hegoalderantz jo genuen, lekurik ezagunenetara, besteak beste Essauirara, Atlasera, Ouarzazate ingurura, Ait-Ben-Haddour herrixkara, Todghara, Merzougako basamortura, Erg Chebbiko dunetara..., bidean hegaztiak behatzeko oso toki aproposak diren beste paraje ezezagunago batzuetan geratuta, esate baterako, Oukaimeden eski-estazioan, Boumalne Dadesen, Tagdilt basamortuan eta Draa Tafilalet bailaran.

Gozada bat aukera hori izatea, 10 egunez turismo lasaia eta txori-behaketa aberatsa egiteko aukera. Turismo gutxiko eta tenperatura oso atsegineko sasoian, gainera, hegaztiak behatzeko aukera ere ziurtatuta zegoenean. Negu amaierarako kumaldia oso aurreratuta dago Maroko hegoaldean, migrazioa ere hasita dago eta espezie gehienak oso aktibo daude egun guztian zehar. %100 gomendagarria!

Bahia jauregia, Marrakexen.

Litroka te.

Atlas mendikatean, gailupa hegalgorriaren bila.

Tajina, bereber sukaldaritzako jakia eta ontzia.

Atlas mendikatean. Atzean Tubkal (4.167 m).

Moussier buztangorria, Marokoko txori nazional ofiziala. Zein ote Euskal Herrikoa?

Assif Amerzgane ordokia, basamortuko buztanzuri eta hegatxabalen bila.

Psammomys obesus arratoia, nahiko ugaria ingurumari honetan.

Zata egiptoar parea. Behaketa zoragarria, 3 ex. aurkitu genituen Merzouga alboko paraje harritsu batean, bertako giden laguntzari esker.

Ilunabarra Erg Chebbiko dunetan.

Bidaiaren erdian, laupabost bat egunez, Hamid izan genuen bidaide, gida ornitologiko lanak eginez. Lehenengoz bizi izan genuen horrelako esperientzia bat, gida baten laguntzarekin bidaiatzearena eta, oro har, esperientzia oso aberasgarria izan zen. Hamiden esperientzia ikaragarria da, txoko eta txori guztiak ezagutzen ditu, eta espezie berezi guztiak behatzeko ahalegin izugarria egin zuen, gu pozik gera gintezen.

Bere laguntzarik gabe nekez helduko ginen heldu ginen bailara, basamortu, duna eta ingurumarietara, eta nekez ikusiko genituen ikusi genituen espezie guztiak eta hain gertutik. Bestalde, horrelako bidaiak argazkilaritzari oso bideratuta daude, hau da, espezieak lasai behatzera baino, txoriei argazkiak ateratzera eta checklist zerrendak betetzera, eta hori ez zitzaidan hain erakargarri egin.

Guri patxada gehiagoz ibiltzea gustatzen zaigu, presarik gabe, espezie erdiak behatuta ere, txori horien ibilerak lasai disfrutatuta. Baina tira, esan bezala, lehenengo esperientzia moduan gustatu zitzaigun eta esango nuke helburu bezala espezie jakin batzuk behatzea eta, batez ere, argazkiak ateratzea dituen txorizalearentzat gidari aparta dela Hamid, Birdwatching Morocco enpresakoa.

Bidaia ornitologikoa Maroko hegoaldera

Hementxe bidaia ornitologikoaren laburpena, eBirden, behaketa-puntu eta ikusitako espezie guztien zerrendarekin.

Ez dira espezie asko (87 espezie erraz ikus daitezke Euskal Herrian, baita egun bakarrean ere), baina bai oso bereziak niretako, horietako ia erdia estreinakoak zirelako, bizitzan lehenengoz behatuak. Espezieak ez ezik, kasu batzuetan taldea edo generoa ere estreinekoak ziren guretzat, Argya generoko kalapitariak eta Scotocerca inquieta zoragarria, adibidez.

Hementxe, bada, eBirden apuntatu genituen txorien zerrenda eta espezie berezienen argazki batzuk.

1	Paita gorrizta	Tadorna ferruginea	2
2	Eper afrikarra	Alectoris barbara	7
3	Haitz-usoa	Columba livia	1
4	Pagausoa	Columba palumbus	2
5	Usapal turkiarra	Streptopelia decaocto	20
6	Usapal senegaldarra	Spilopelia senegalensis	2
7	Ganga tandoduna	Pterocles senegallus	19
8	Ganga koroaduna	Pterocles coronatus	1
9	Zata egiptoarra	Caprimulgus aegyptius	3
10	Sorbeltz arrea	Apus pallidus	10
11	Sorbeltz txikia	Apus affinis	60
12	Kopetazuri arrunta	Fulica atra	2
13	Antxeta mokogorria	Chroicocephalus ridibundus	3
14	Kaio hankahoria	Larus michahellis	100
15	Kaio iluna	Larus fuscus	100
16	Zikoina zuria	Ciconia ciconia	5
17	Ubarroi handia	Phalacrocorax carbo	11
18	Mokozabal zuria	Platalea leucorodia	1
19	Koartzatxo txikia	Egretta garzetta	1
20	Koartzatxo itzaina	Ardea ibis	5
21	Koartza hauskara	Ardea cinerea	2
22	Zapelatz handia	Buteo rufinus	1
23	Basamortuko hontza	Bubo ascalaphus	2
24	Okil handia	Dendrocopos major	3
25	Okil berde magrebtarra	Picus vaillantii	1
26	Belatz gorria	Falco tinnunculus	2
27	Hego-belatza	Falco biarmicus	1
28	Belatz handia	Falco peregrinus	1
29	Antzandobi handi arrunta	Lanius excubitor	2
30	Mika magrebtarra	Pica mauritanica	12
31	Belatxinga mokogorria	Pyrrhocorax pyrrhocorax	25
32	Belatxinga mokohoria	Pyrrhocorax graculus	3
33	Basamortuko erroia	Corvus ruficollis	1
34	Amilotx urdin afrikarra	Cyanistes teneriffae	2
35	Kaskabeltz handia	Parus major	1
36	Ibis txoriandrea	Alaemon alaudipes	1
37	Txoriandre mokolodia	Ramphocoris clotbey	1
38	Txoriandre buztanbeltza	Ammomanes cinctura	1
39	Basamortuko txoriandrea	Ammomanes deserti	2
40	Kutturlio mokolaburra	Galerida theklae	30
41	Kutturlio arrunta	Galerida cristata	3
42	Hegatxabal adarduna	Eremophila alpestris	25
43	Hegatxabal sahararra	Eremophila bilopha	7
44	Txoriandre arrunta	Calandrella brachydactyla	3
45	Haitz-enara eurasiarra	Ptyonoprogne rupestris	3
46	Enara arrunta	Hirundo rustica	1
47	Bulbul arrunta	Pycnonotus barbatus	9
48	Txio arrunta	Phylloscopus collybita	2
49	*Scrub Warbler	Scotocerca inquieta	2
50	Txinbo kaskabeltza	Sylvia atricapilla	1
51	Txinbo sahararra	Curruca deserti	7
52	Basamortuko txinboa	Curruca deserticola	1
53	Txinbo burubeltza	Curruca melanocephala	2
54	Ezkai-txinboa	Curruca conspicillata	3
55	Kalapitari arrea	Argya fulva	6
56	Erregetxo bekainzuria	Regulus ignicapilla	2
57	Arabazozo beltza	Sturnus unicolor	8
58	Garraztarroa	Turdus viscivorus	2
59	Zozo arrunta	Turdus merula	4
60	Txantxangorria	Erithacus rubecula	1
61	Moussier buztangorria	Phoenicurus moussieri	2
62	Buztangorri iluna	Phoenicurus ochruros	3
63	Harkaitz-zozo urdina	Monticola solitarius	1
64	Pitxartxar burubeltza	Saxicola rubicola	4
65	Buztanzuri arrunta	Oenanthe oenanthe	1
66	Basamortuko buztanzuria	Oenanthe deserti	1
67	Buztanzuri ipurgorria	Oenanthe moesta	4
68	Buztanzuri beltza	Oenanthe leucura	1
69	Buztanzuri kaskazuria	Oenanthe leucopyga	3
70	Buztanzuri magrebtarra	Oenanthe lugens	4
71	Mendi-tuntuna	Prunella collaris	2
72	Etxe-txolarrea	Passer domesticus	20
73	Basamortuko txolarrea	Passer simplex	4
74	Harkaitz-txolarrea	Petronia petronia	50
75	Buztanikara horia	Motacilla cinerea	2
76	Buztanikara zuria	Motacilla alba	1
77	Negu-txirta	Anthus pratensis	25
78	Txonta afrikarra	Fringilla spodiogenys	3
79	Gailupa hegalgorria	Rhodopechys sanguineus	50
80	Gailupa tronpetaria	Bucanetes githagineus	1
81	Txorru arrunta	Chloris chloris	2
82	Txoka arrunta	Linaria cannabina	30
83	Txirriskila arrunta	Serinus serinus	1
84	Gari-berdantza	Emberiza calandra	3
85	Mendi-berdantza	Emberiza cia	1
86	Hesi-berdantza	Emberiza cirlus	1
87	Berdantza sahararra	Emberiza sahari	4