Zorria inoren burutan ikusi
Ez da kontu berria. Xabier Letek honelako zerbait salatu zuen orain hogeita hamar urte, berak gaztelaniaz kantatzea traiziotzat jotzeko gertu zeuden zaleek ez baitzuten eragozpenik beraiek barra-barra gaztelaniaz hitzegiteko. Euskal arotzari, armaginari edo informatikoari zilegi bazaio gaztelaniaz hitzegitea bere bezeroekin, zergatik ez euskal kantariak gaztelaniaz kantatu merkatuak horrelakorik eskatuko balu? Zorria inoren burutan ikustea besterik ez da hori.
Baina ez gero uste izan kontu hauek Anoeta inguruan baino ez direna gertatzen. Bixente Lizarazuri txanponak bota zizkioten aurpegira, Lezaman, Munitxeko Bayernek fitxatu zuenean, eta Xabier Eskurzari ETBko audio-teknikoek boikota egin zioten, Iurretan, Bartzelonara joan zenean.
Bitartean, Xabi Alonso dela-eta, Liverpool maitekiro ikusten duen super giputz ganorabako askok kristorenak esango ditu Iñigo Diaz de Cerio San Mames aldera hurreratuez gero.
Barru-barruko mixeriak baino ez dira, kolore santuen aitzakiaz defenditu arren.
Goiz kronika. Euskadi Irratia, 2009ko maiatzaren 5ean.
