Zero kilometroa
Amatiño
2026/03/13 19:45
Jakina gero, lerro hauek irakurriko ditugunon artean nagusi garena zero kilometroaren aldekoak. Beste kontu bat da zer ote den alde egotea. Alde egotea bada noizbait inguruko tomateak edo barazkiak erostea, orduan bai. Baina hori nahiko ote da gurea bezalako ekonomia industrialean?
Seguru gutako gehienok ez garela hasiko makina-erremintak, trenak eta robotak erosten, baina ez al dira zero kilometrokoak ere hainbat esku-erreminta, bizikleta, ehiza-tresneria, kirol-arropa, sukalde edo bulegotako gailuak, eta gure edozein dendariren edo profesionalen produktuak eta zerbitzuak? Gure sektorerik handienetakoa automozioa denez --Euskadiko BPGren %13--, gogoan izaten al dugu autoa –europarra-- erosterakoan? Eta gutxitan pentsatu arren –inguruko administrazio, eskola, kultura, literatura eta hedabideak tarteko— ez al da euskara zero kilometroaren ezaugarririk handiena?
Gatozen berriro baserri-girora. Euskaldunok gaztazaleak gara eta gaztarik onenak gureak omen dira. Bai, baina gure gazta-kontsumoaren %90 kanpotik dator.