Zein falta izango eta… Eibar!

Mutrikuko herri-aldizkariaren arduradunek orain arte esku hartu ez izanaren arrazoia zehaztu nahi izan dute jendaurrean: “Kalaputxi aldizkariaren izaera, ezaugarriak eta osaketa kontuan hartuta, handi etorri zitzaion egitura profesionalean oinarrituta zetorren proiektuaren baitan txertatzea”. Baita, jarraian, aurrerantzako nahia adierazi ere: “Baina, etorkizunean, zer eta nola etorriko den jakin gabe, argi dugu Mutrikuk presentzia bat izan behar duela Barrena aldizkarian eta webgunean. Poliki, gure martxan, gure moduan, bidea egingo dugu, Barrenara hurbiltzeko, Barrenari gure ekarpentxoa egiteko, Debabarreneko herritarrei mutrikuarron berri emateko”.

Eibarko “Eta Kitto” aldizkariak, ostera, ez du orain arte agirian ezer esan. Ez zergatik ez duen nahi edo ahal izan ekineratik parte hartu, ez eta aurrera begira ere, "Barrena" proiektuarekin bat egiteko asmorik ote duen ala ez.

Nork bere arrazoiak, erabakiak eta erantzukizunak ditu, jakina. Baina Eibarko herri-aldizkariak ezin izango du esan, behintzat, eskualdeko egitasmoaren egitura profesionala handi etorriko litzaiokeenik.

Eskualdeko herririk handienak (3) inguruko proiektu bateratuari muzin egitea zilegi da, jakina. Baina, behar bada, zilegi bezain zatarra. Buruzagitzak partekatuak dira ala ez dira.

---ooOoo---

1) Deba, Elgoibar, Ermua, Mallabia, Mendaro, Mutriku eta Soraluze barruan dira.

2) Arrate Irratiaren "euskal sintonia" da, oraingoz, eibartarron ordezkari bakarra, eskualdeko "Barrena" proiektuaren barruan.

3) Eskualdeko biztanlego osoaren %39 eibartarrak dira.