Zaharrak mokoka
Bi zahar (ni baino gazteagoak biak) kuttun eta goxoren arteko asteburu (Le week-end, Zinemaldia'2013) erromantikorik itxaro lukeenak hobe luke etxean geratu. Elkarri nork ezten zorrotzagorik sartuko ikusi nahi duenak, aldiz, behazunik franko aurkituko du Roger Michell zuzendariaren film honetan.
Lehen partean topiko errazik eta merkerik ez da falta, emakumeen bihurrikeria konplexuak eta gizonezkoen ganora gabeko inozokeriak tarteko. Pelikulak aurrera egin ahala, berriz, elkarrizketen garratza eta harremanen mikatza jorituko dira, ironia malenkoniatsuaz lepo gainezka. Patetismo gordin samarrik ere bada. Sasi-maitasuna eta sasi-gorrotoa, elkar ikusi ezina eta elkarren premiari eutsi nahia… azken afalostean hainbat urtetan gordetako zor sorren sumendia gori-gori lehertu arte.
Primerako aktore-aktoresak gero, nor baino nor, Jim Broadbent eta Lindsay Duncan… nahiz gidoiak hainbat pasarte errepikarazten dien beharrik gabe eta zenbait egoera (ostatu garestia, kasu) batere sinesgarri ez gertatu.
Jim Broadbent eta Lindsay Duncan