"Udaleko frontoia"
Amatiño
2012/03/08 23:00
“Udaleko frontoia” dago Enkarterrietan, euskara XIX. mendean galdu zuen barrutian. Pilotalekuaren atzealdeko horman hitz bi horiek idatziarazi dituen alkate jaunak ez luke, behar bada, EGArik lortuko, baina ezin izango zaio borondate onik ukatu.
“Udaleko frontoia” izen-moldeak min ditzake hainbat begi eta belarri, baina oker geundeke Enkarterrietako erdal giroaren ondorioa baino ez dela uste izango bagenu.
Enkarterrietatik 125 kilometrora, Euskal Herriaren bihotz-bihotzean, euskal hedabideen ardatzik nagusienetakoan, Euskadi Irratiaren albistegietan alegia, txitean pitean erabili ohi dira “udaleko aurrekontuak”, “ELAko ordezkaria” edo “Alderdi Sozialistako hautagaia”… eta ez da ezer pasatzen.
