Santiago bideko paradoxak

Ez da gero erraz asmatzea zergatik ez duten oporretara joan izana euskaraz adierazi. Behar bada azken unean ohartu dira, alde egin aurretik atea ixteko orduan edo, eta errazenetik jo dute, birritan pentsatzeke, gaztelaniaz jarrita denentzat errazago suertatuko delakoan.

Daitekeena, hala ere, aldez aurretik oso ondo pentsatutako erabakia izatea. Akeitegi hori euskal itsasbazterreko Santiago bidean dago, eliza nagusiaren aurrean, erromesek derrigorrez gurutzatu beharreko plazan, eta da gosaria eskaini ohi dien kafe-denda eta okindegi bakarra. Iaz 15.000 erromes baino gehiago pasatu ziren bertatik Bizkaialdera eta, segurutik, hamarretik bederatzi erdaldunak. Horretara, hobe edo, gaztelaniaz.

Baina, horrela balitz, beste paradoxa bat litzateke, ostera, nola arraio  bidekariei kafesnea eta eguneko ogia eskaini ahal dien bakarrak ateak ixten dituen, uztailean eta Santiago bidean, oporretara joateko.  Auskalo! Krisia omen...