Romeo eta Julieta

Paseatzea euskal kirol nazionala omen da. Holaxe zioen atzo hainbat egunkarik. Udaberria dela-eta euskaldunok maiteen dugun jarduera fisikoa ez omen da futbola, ezta atletismoa edota mendizaletasuna ere, lau-lau paseatzera ateratzea baino. Segurutik paseatzea dateke aukerarik errazena, merkeena eta osasungarriena ere baina ez, ordea, zaharrena. Zenbaitek besterik uste arren, paseoa ohitura berri samarra da.

Auskalo oinez ibiltzeko zaletasunak bidegorriak areagotu ote dituen ala bidegorriek erraztu duten paseatzeko aukera baina, batere zalantzarik ez, gero eta jende gehiagok paseatzen duela han-hemenka zabaldu diren bidezidorretan zehar. Gure inguru-minguru honetan Aixolako urtegi aldera joan besterik ez dago, Soraluzetik Bergarara trenbide zaharretik edota  Maltzagatik Elgoibar aldera erreka bazterretik.

Baina guztion aitzindari, nabarmen gero, gure Romeo eta Julieta.  Beti heldu-heldu eginda, elkarren maitale, eta dotore asko kaleko jantzita, txandala eta kirol-oinetakoak azken urteotako modak baitira.

Kirol nazionala... omen