Amatiño

Potzutik gurpilak arteko CO2 isuriak

Amatiño 2013/07/09 20:20

Ez dut nik inor ezagutzen, nola edo hala petrolioaren eratorriren bat soinean ez darabilenik. Ezta gasolina erretzeari uko egiten dionik ere. Ez, ez naiz heroi bila ari. Are gutxiago inoren begitan lastoa ikusi gurarik. Baina zuhurrak ez dakar gezurra eta, zenbaitek besterik uste arren, petrolioaren berotegi-isuririk gehienak ez darizkio ekoizpenari, trafiko-kontsumo arruntari baino.

Europako Garraio Energiaren Liburu Zuriak 2011 urtean adierazi bezala, potzutik irten eta gurpil gainean (well to wheel) erre arte petrolioak eragiten dituen CO2 isurien %85 kontsumoari dagokio bete-betean eta %15, berriz, ekoizpenari.

Laburbilduz, petrolioa potzuetatik ateratzeko eragiten diren C02 isuriak dira %1-4 inguru; petrolio gordina kontsumorako bihurtzeko findegien isuriak, %8-10 edo; merkatuan zeharreko banaketa, %1; eta, azkenik, ekoizpen hori kontsumitzeko orduan, %85. Beste modu batez esanda, potzutik tangara (well to tank) bitarteko produkzioan %15 guztira, eta tangatik gurpilak (tank to wheel) arteko kontsumoan, %85.