Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Amatiño / Petrarcaren mendia

Petrarcaren mendia

Amatiño 2013/10/13 21:05
Petrarca oinez igo zen Ventoux mendi gainera 1336an. Hona zergatik zenbaitek alpinismoaren aitzindaritzat jotzen duen Arezzoko poeta. Hala ere, geroztik ez dira izan mendigoizaleak tontor 'haizetsua' munduan barrena ezagutarazi dutenak, txirrindulariak baizik. Ventoux gailurra txirrinduzaleen igoerarik mitikoenetakoa da.

Mont Ventoux (1909 m.), “Proventzako erraldoia”, mendaterik erakargarrienetakoa da makinatxo bat txirrinduzalerentzat. Ez da urte guztian zehar egunik txirrindulariren bat do beste bertaraino igotzen ahalegintzen ez denik. Amateurrek bizpahiru ordu behar izaten dituzte behetik gorako 22 kilometroak (batez beste %7,6ko aldatsa) burutzeko. Profesionalek, berriz, 60-90 minutu. Errekorra Iban Mayo igorreztarrak du, erlojupekoan igo zuenetik (Dauphiné Liberé, 2004) 55 minutu eta 51 segundotan.

Hirurogei urtetik gorakook gogoan dugu bertan hil zela Tom Simpson ingeles txirrindularia, 1967ko Tourrean, igo ezinaren ezinez, alkoholez lepo eta anfetaminaz josita. Haren omenezko oroitarriak tontorrean dirau orduandik, fikziorik patetikoenaren lekuko.

Ventoux mendi gailurrera igotzeko hiru lekutatik abiatu daiteke baina ezagunena eta ohikoena Bédoin herrian barrena da. Hiri txiki eta aparta gero Bédoin, non bizikletak nabarmen diren nagusi eta jendea kalez kale dabilen txirrindulari jantzita, dendarik denda pasieran, terrazatan kafea hartzen edo jatetxetan bazkaltzen.

Baina, jakina, ikuskizunaz jabetu nahi duenak behar du autoa goizerdian hartu eta, astiro-astiro, errepidean zehar gorantza abiatu: sinetsi ezin besteko txirrindulariak etenbako errenkadan, banaka zein taldetxoka, nor bere martxan, ibileran, joeran… ahalean edo ezinean. Emakumeak ere, dezente asko gero.

Zer pentsatuko ote luke Petrarca humanistak bururik altxatuko balu!

Mont Ventoux

Bédoinetik ekialderantzako bidea da zailena eta ezagunena

Mont Ventoux 2

Ez da elurra, kareharrizko basamortua baino

Iruzkina gehitu

Erantzuna formulario hau betez utzi dezakezu. Formatua testu arruntarena da. Web eta e-posta helbideak automatikoki klikagarri agertuko dira.

Galdera: Zenbat dira hiru ken lau (idatzi zenbakiz) ?
Erantzuna:
Aurkezpena

Amatiño

Luis Aranberri Mendizabal