Paradoxa
Amatiño
2016/01/25 23:00
Wroclaw eta Donostia hiriak hasi berri dira 2016ko Europako Kultura Hiriburutza ospatzen. Wratislaviarrek Chillida-Lekuko 39 eskulturez ekin diote urteko egitarauari, gurean Chillida-Leku irekitzeko gauza izan ez garen artean. Paradoxa.
Segurutik zentzuzko hainbat arrazoi izango da paradoxa hau ulertarazteko baina, aitortu dezagun, lotsa sentitzeko ere ez da arrazoirik falta.
Jarri gaitezen, bestela, edozein europar arrunten senean eta galdetu diezaiogun geure buruari: “Fidagarri edo sinesgarri al da, Europako Kultura Hiriburuarenak ospatzen ari den urte berean, Chillidaren museorik garrantzitsuenaren ateak irekitzeko ere gai ez den hiria?”
Bolo-bolo dabilenez, Chillida familiak lauzpabost eskaintza omen ditu mahai gainean, munduan zeharreko beste horrenbeste lekutara eramateko Zabalaga baserri inguruko museo osoa.
Nik ez nuke gaiztoegia izan nahi baina, nago, Zabalagak, Miramon inguruan egon beharrean, Artxandan-edo balego, ez lukeela luzaro itxita iraungo.
