Orkatzategi, Arabatik itsasora bitartean

Iparralderantz, itsasora begira, Anboto eta Udalaitz aurrez aurre; hegoaldera, Araotz harana, Aloñatik Aizkorrirainoko mendilerroa eta Elgeako haizerrota saila, auzoko Araban; sortaldean, Txindoki eta gainerako giputz-eremuak; sartaldean, bertatik bertara Kurutzebarri eta, urrutixeago, Gorbeia basajaun bizkaitarra. Barren-barrenean, berriz, mendi-oinetan, Urkuluko urtegia, Suitzako aintziretako baten antzera. Sekulakoa gero, 360 graduren jira-biran, etenik gabeko argazkia.

Araotzetik irtenez gero, bospasei orduko eguerdian egin daiteke, Aretxabaleta eta Oñatiren arteko mugarrietan zehar, Degurixatik (Urbiako naba baino txikerragoa baina dezente lasaiagoa) Aitzuloko leizezuloraino, Santikurutz ermita eta Orkatzategi gaina tarteko.

Betidanik arrakasta handia izan duen ingurua da, nonbait, bertan dirauten tumulu eta trikuharri megalitikoak lagun, berriagoak eta dezente ezagunagoak diren Sandailiko leizea eta ermita magikoak lekuko.

Ezkerretik eskuinera, Kurutzebarri, Gorbeia, Anboto, Udalaitz, Oiz, Karakate... Barrenean itsasoa eta, magalean, Urkuluko urtegia, Aretxabaletan ("Mendien artean" argazkia. Gure 'Kajoitxu' zenarenak ere, bertan)

Orkatzategi tontorra, ezkerreko muturrean, behetik gora, Urkuluko urtegitik. Bigarrena, Ametzueta.

Erdian, Orkatzategi, Santikurutzeko ermitatik. Aurrena, eskuinaldean, Ametzueta.

Santikurutz, txukun asko zaindua