Nahieza
Hainbat astebete geroago arrasatearra eta biok Bergarako auzitegiaren sarreran elkartu ginen kontu kontari, auzi-aretoko atea ireki zen arte: “Pueden entrar!”.
Aurrez aurre epailea eta legegizon bi, toga beltzez jantziak. Elkarrekin eztabaidatzeari ekin zioten, erdara barroko handi-mandian, hiru semaiko hitz galantekin. Mundu irreala, Justizia Jauregiaren atarian laga genuenarekin zer ikusirik ez zuena.
Berrogei urte geroago, herri-administrazioa, hezkuntza eta hedabideak euskaraz landu eta garatu dira baina Justiziaren buruak lehengo lepotik jarraitzen du. Azken bi belaunaldiotako ildoari bizkar ematen dirauen Justizia ez da justua. Baina ez da berrogei urtez denborarik izan ez duelako, nahi izan ez duelako baino.
Nahieza… euren euskara hobetzeko aukera guztiak izan arren, urteak joan eta urteak etorri, batere ahalegindu ez diren euskaldunen berbera.