Megabyte gutxi eta pezeta asko

Erabat ahaztua nuen arren, agiriak gogorarazi dit orduan erosi nituen Olivetti markako ordenadorea (nire bigarrena) eta inprimagailua 396.980,- pezeta kostatu zitzaizkidala, 2.400 euro inguru. Egungo 4.800 euro alegia, azken hogei urteotan Kontsumorako Prezioen Indizea ia-ia bikoiztu egin da-eta (+%97,4).

Batere zalantzarik gabe diru dezente asko gero 20 MBko disko gogorra baino ez zuen ordenadore petralaren truke. Nik ezer gutxi dakit kontu hauetaz baina, oso oker ez banago, nire argazki-makinaren bospasei erretratu aski lirateke memoria hori ahitzeko eta edozein pendrivetxok omen du egun giga bat. Hau da, mila mega, nire orduko 50 ordenadore bezainbat edo.

Baina zergatik gorde ote zuen emazteak nik erositako ordenadorearen leasing hitzarmena? Ba, besteak beste, berak ere sinatu behar izan zuelako. Ni ez nintzaien nonbait fidagarriegi BBVren kontratu-egileei eta nire emazteak sinatu behar izan zuen fidatzaile edo bermatzaile gisa.

Leasing, bermatzaile eta guztiko hitzarmena, 20 MBko ordenadorea erosteko… duela hogeita bat urte baino ez.