Made in Eibar
Egungo gazte belaunaldiak ez dakien arren, duela mende erdi arte baino ez, edozenbat ziren Eibarren fabrikatzen ziren “produktu amaituak”. Alegia, berariazko izen edo marka komertzialez jendaurreko merkatu irekian salgai zeuden “made in Eibar” artikuluak.
Ez, soilik, eskopetak, pistolak, bizikletak, motorrak, josteko makinak edo damaskinatu ezagunak, baita orain zeharo ezezagun eta sinesgaitz suertatu daitezkeenak ere. Adibide gisa, memoria hutsez: telebistak, plantxak, organoak, grapagailuak, zulatzaileak, kortxo-kentzekoak, konpasak, auto-indargetzaileak, ponpak, konpresoreak, berogailuak, galdarak, bulego-altzariak, eskorgak, eskuilak, kateak, puzgailuak, katu mekanikoak, labanak, askak, pertxak, bitxiak, denetariko giltzak, maratilak eta abar luzea.
Eta abar luze horietakoa da, hain zuen, Gasteizko Zaramaga auzoko ileapaindegian dagoen “bizargile-besaulkia”, orain hamarretik hamarretan ilea mozteko baino erabiltzen ez den arren, eta ez bizarrik egiteko.
Ez da, horratik, bizirik eta beharrean diraun bakarra. Sarean barrena sartu besterik ez dago, tarteka-marteka aleren bat edo beste aurkitzeko. Aitor Buendia kazetari eibartarrak horietako bat aurkitu zuen, iaz, Kordoban.
Antigoaletan ere salgai daude han-hemenka. Daniel Acha – Jaso – Sillón barbero Interneten jarri baino ez dago, hainbat baldintza, egoera eta preziotan aurkitu ahal izateko. Besteak beste, 1920 urte ingurukoak omen dira, eta garestiena edo, 3.000 eurokoa.
Denak ere, segurutik sekula gehiago itzuliko ez den industria eibartarraren urrezko garaien lekukoak, dagoeneko ia-ia desagertu direnak. Jo bestela edozein denda, biltegi edo hipermerkatura eta galdetu “made-in-Eibar” produkturik ote duten. Eibar... zer?
Gasteizko Zaramaga auzoko ileapaindegian dagoen "bizargile-besaulkia"
Oinak jartzeko euskarria
