Lurraldeen lehiakortasunak estrategia berriak behar
Helburua, besteak beste, lehen eta behingoz zera izan da: elkarren arteko lankidetza eta Europaren autonomia estrategikoa indartzea, eraberrikuntzaz, zientziaz, teknologiaz eta industriaz
Nazioen eta klusterren arteko estrategia ez da berria, ez behintzat 1990 urtean Michael Porter ekonomialariak The Competitive Advantage of Nations argitaratu zuenetik eta sektorean ospetsu egin zen “diamante" eredua proposatu. Garai hartan ezohiko kontzeptu berriak erakarri zituen eta sekulako aldaketak plazaratu. Alegia, lehiakortasuna ez dela gertatzen gizabanakoen eta enpresen artean soilik, baita nazioen eta lurraldeen artean ere, “berrikuntza nabarmenago burutzen delakoan pertsonen arteko sare indartsuagoak dituzten komunitateetan”.
Teoriatik praktikara, 1990eko hamarkadan zehar klusterren garapena gobernu askoren politika ekonomikoaren ardatz bilakatu zen eta klusterrak herrialderik garatuenetan hedatu, Gurean, Eusko Jaurlaritza eta Nafarroako Gobernua kasu eta euren ardurapean sortutako klusterrak lekuko. Gaur egun 16 kluster daude Euskal Autonomia Erkidegoan eta 9 Nafarroako Foru Komunitatean.
Hiru hamarraldi joan dira Michael Porter irakaslearen lehen euskal jarraitzaileak abian jarri zirenetik. Inor ez da damu eta inork ez ditu ondorio onak zalantzan jartzen. Baina klusterren zikloak –industriarenak bezalaxe— ez dira alferrik pasatzen eta bada uste duenik 1990eko hamarkadako ereduak ez ote duen berrialdiren bat edo beste merezi eta behar. Hemen ez ezik, baita Europa guztian zehar ere.
Bilboko Adierazpena
Leaders Meeting Fit For The Future goi-bileraren bigarren edizioari amaiera emateko, ‘Bilboko Adierazpena’ sinatu da, hots, industria-lehiakortasunaren, berrikuntzaren eta teknologia estrategikoen arloko jarrera politikoaz zein jarduera estrategikoaz.
Parte hartu duten 14 industria-lurraldeek balio-kate estrategiko nagusietan (teknologia garbi eta digitalekin hasi eta bioteknologiarekin eta bizitzaren zientziekin amaitzeraino) betetzen duten funtsezko zeregina aldarrikatu dute.
Europako lurraldeen, estatu kideen eta erakundeen arteko aliantza berriturako deia egin dute, horrela baino lortuko ez delakoan Europa arin eta erabakitzailea, benetako autonomia politikoa izango duena.
---ooOoo---
1) “Etorkizunerako gertu dauden liderren” bigarren bilera. Lehena 2024ean izan zen, Flandriako Anberesen .
2) Auvernia–Rodano-Alpeak, Baden-Würtemberg, Emilia-Romagna. Euskadi, Flandria, Ekialde Handia, Frantzia Garaia, Katalunia, Lombardia, Nafarroa, Sajonia, Valonia eta West Pomerania.
- Matthias Dienpendaele eta Imanol Pradales, Flandriako eta Euskadiko lehendakariak.
