Komertziala eta sinbolikoa ezin al dira bateragarriak izan?
Orain hurrengo, 2011-2012 denboraldian, Athleticek elastiko berdea aukeratu zuen bigarren janzkeratzat, eta hainbatek susmatu zuen, Athleticen asmo horren atzekaldean, “Euskadiren izenaz eta ordezkaritzaz jabetu nahi izana”. Baita eztabaida piztu ere, interes komertziala ala sinbolikoa ote zen.
Gero ikusi zen, ostera, hainbat denboraldi lehenago Realak ere berdez jantzita jokatu izan zuela behin baino gehiagotan, nahiz orduan inork bigarren intentziorik (are gutxiago, maltzurrik) sumatu ez.
Nik, egia esan, ez dakit zehatz-mehatz zergatik 2011-2012 denboraldian Athleticek elastiko gorri-zuri-berdearen aldeko postura egin zuen. Jakin badakit ez zela barne ika-mikarik gabeko erabakia izan, hainbatek –gehiengoak, nonbait— gustuz hartu zuen arren, beste zenbaitek –gutxiengoak, antza—bekozko ilunez ikusi zuen-eta.
Edozein modutan, jakin ere badakit elastiko hura dezente ondo saldu zela arrazoi batez zein bestez eta, ondorioz, 2012-2013 denboraldian ere diseinu eta kolore berberak jarraitu zuela indarrean, bigarren janzkera ofizialtzat. Iaz, ordea, 2013-2014 denboraldian, urdina izan zen bigarren kamiseta eta hona non, berriro ere aurten, orlegia datorren 2014-2015 denboraldirako.
Auskalo zein ote den orlegiaren aldeko arrazoirik nagusiena: komertziala ala sinbolikoa ote? Eta… biak elkarrekin balira? Nork esan du derrigorrez kontrajarriak izan behar dutenik? Erosteko orduan ezin al dira, bihotza eta sakela, sekula, eskutik joan?
2014-2015 denboraldirako bigarrena janzkera.
2011-2012 eta 2012-2013 denboraldietakoa