Ikusgarria, xarmagarria, gomendagarria
Zahar nahiz gazte, andrazko zein gizonezko, zine-aditu edo zale arrunt izan, edonork minutu oro gozatu dezakeen filma harildu eta burutu dute elkarrekin Eric Toledano eta Olivier Nakache zuzendariek, egiazko gertaeretan oinarritua. Hasiera indartsua, amaiera gozoa, pasarte bitxiak, elkarrizketa mamitsuak, etenik gabeko zirikadak eta ironia garratzez zein umore beltzez jositako eztenkadak.
Normalean sekula elkar ikusiko ez luketen bi lagunek --parapente-istripuz tetraplegiaz geratutako aberats paristar jantzia batetik, saiatu arren lanik emango ez diotena aurrez dakien etorkin senegaldar ezjakina bestetik-- drama bana bizi dute, ustekabean elkarrekin topo egin arte.
Komedia errotik komertziala, ikusleen bat-bateko hamaika algararen eragile eta, aldi berean, serioa, argia, bizkorra, salatzailea, gogoetatsua. Berriketabakoa Omar Sy-ren (etorkin senegaldarra) interpretazioa baina apartekoa gero François Cluzet-ena (aberats frantsesa). Bata, erabateko bizipozaren jabe, eta bestea, berriz, gorputz-lotu egon arren, aurpegi soila zein adierazkor izan ahal denaren lekuko.
"Intouchables". Philippe Pozzo di Borgo (François Cluzet) eta Driss (Omar Sy)
