Herria astekaria eta Euskaltzaindiaren arteko lankidetza
Adostua izan den akordioari esker, Euskaltzaindiak bere gain hartu du 1944 urtetik 2028ko abenduaren 31 arte Baionako Herria astekariak argitaratu --eta argitaratuko-- dituen testu guztiak digitaltzea, eta ondare hori erabiltzaileen aukeran jartzea.
Urrutia euskaltzainburuaren esanetan, “Herriak ondu duen altxor linguistiko eta kulturala, kazetaritza egoki eta herritarraren bidez, gizartearen eskura jarriko du” akademiak, eta, Peio Jorajuriak azpimarratu bezala, berriz, “80 urtez gorako historia luzea baliatuko du, Piarres Lafitte, Emil Larre, Jean Haritschelhar, Janbattit Dirassar eta beste hainbatek lagatako ondare paregabeaz”.
Herria kinka larrian
Hain zuzen ere, jarraipena kinka larrian duen altxorra, Herria astekariak 11.000€ galdu baitzituen 2024 urtean eta 28.000€, ostera, 2025ean. Baionako astekariaren zuzendaritzak berak aditzera eman duenez “kinka honek segitzen badu, astekariaren etorkizuna ez da gehiago segurtatua izanen, eta bi lanpostu zuzenean mehatxatuak dira”.
Egoerari aurre egiteko, “diru-bilketa parte-hartzaile baten abiatzea erabaki da” 20.000 € lortzeko helburuaz" (1). Jendearen sustengua ezinbestekoa da eta bakoitzak ahal duen neurrian lagun dezake”.
Horrez gainera harpidetza egiterik ere izango da (2).
---oo0oo---
1. Diru-emaitza egiteko,zuzenean Helloasso plataformaren bitartez biramendua (transferentzia) egin daiteke: www.helloasso.com/associations/edition-basques -herria helbideaz baliatuz. Baita txekez ere, helbide honetara bidali: 875 route de Landagoyen – 64480 Uztaritze.
2. 90 € inguru urtean.
