Hau ez da Alemania
Denak omen du esplikazioren bat. Segurutik esplikazioa du Gipuzkoako familien %8,5aren diru-ahalmenik ezak, baita Debagoienako 20 kilometroko bidegorria argiztatzeko diru publikoaren ahalak ere. Baina, edozein modutan, ezin uka, batzuon pobreziaren eta besteon luxuaren arteko koherentzia faltari ez dariola, itxuraz behintzat, logikarik eredugarriena.
Zalantzarik ez gero, uste baino zailago izan ohi dela gizartearen aniztasunak eta konplexutasunak orekatzea, eta Osintxutik Eskoriatzara bitarteko bidegorriaren gau-distirak nekez berotu ahal duela behar beste dirurik ez dutenen gipuzkoarren argiaren faktura; baina, barrena, onartu beharko paradoxa nabarmen samarra-edo ematen duela.
Zer gerta ere, ez dut uste Alemanian gerta litekeenik familien %8a gutxieneko kalefakziorik gabe bizi ahal izatea. Baina, nik ezagutzen dudan neurrian behintzat, postura egingo nuke Alemanian ez dutela bidegorriak argiztatuko dituen diputaziorik.
Hogei kilometro inguruan, zortziehunen bat argi-puntu bai ote? Bart arratseko argazkia, Bergarako irteeran.
Almen (Eskoriatza) ikastolaren aurreko zelai ederra zeharkatzen du bidegorriak.
