Hamazpi urte ondoko erabakia
1997ko albistea
Ahaztuxea banuen ere, 1997ko urtarrilean aurkeztu nuen nik neuk, artean Industria zinegotzi jeltzale nintzelarik, Toribio Etxebarria kaleko aparkalekuak txandakakoak zein doakoak izatea, bertako dendariek hala eskatua. Baina alkate sozialistak ez zuen ontzat eman gura izan, auskalo berari zuzenean eskatu ez ziotelako edo dendariak ez zirelako, antza, bere artaldekoak.
Geroztik, urteak joan eta urteak etorri, EAJk behin baino gehiagotan gogorarazi arren, Alderdi Sozialistak lehengo lepotik jarraitu izan du, kementsu asko, ezezkotan… orain arte.
Orain, ostera, bai. Ia hemezortzi urteko ausnarketa sakonaren ondotik, norbaitek pentsatu du nonbait, orduko proposamen hura ez zela hain aldrebeskeria handia eta, azkenean, jeltzaleek aurrekontuei ezarritako zuzenketen bitartez, onartu da onartu, 1990eko hamarkadan batere premiarik gabeko burugabekeria omen zena.
Ez da segurutik Eibarko historia aldatuko duen erabakia baina, jakinminez baino ez bada ere, gustatuko litzaidake jakitea zeintzuk ote diren 2014ko dendariei onetsi eta 1997koei ukatu zitzaizkien arrazoiak.
Baina, tira, hobe omen berandu, sekula baino.