Garai zaharrengatik
Robert Burns, Robert Louis Stevenson eta Sir Walter Scott idazle eskoziar ospetsuak dira Edinburgoko The Writers' Museum delakoaren bete-beteko protagonista nagusiak. Ordu erdi inguruan (eta doan) ikustatu daitekeen museo ezkutua, hiru-lau solairuko hiri-jauregi kukua, 1622 urtean eraikia.
Ezkutuan diot, Alderdi Zaharreko (Lawnmarket) Royal Mile ardatz nagusiko espaloitik hamarren bat metrora baino ez den arren, Lady Stair’s Close delako pasartean zehar, barreneko plaza ahaztuan baitago.
Ez dut nik hemen jakinaraziko irakurle arruntak Interneten aurki ez dezakeenik baina, alferrontzien mesedetan, labur asko adierazterik bada, Burns (1759-1796) eskoziar poetarik poetena dela; Scott (1771-1832) Ivanhoe (2), Rob Roy eta Waverley nobelen idazlea, eta Stevenson Altxor Uhartea eta Jekyll doktorearen eta Hyde jaunaren kasu bitxia eleberrien egilea.
Bisitariak aurkituko ditu, bertatik bertara, esku-eskura, Burnsen idazmahaia, Scotten lehen nobelak inprimatu zireneko moldiztegia eta Stevensonen erretzeko pipa eta arrantzako kanabera. Eta, jakina, arasak, liburuak, eskuizkribuak, erretratuak, argazkiak, etxeko zapatilak, umetako zaldi kulunkaria, inoren opariak, oroigarriak, bestelako pitxiak eta denetariko gauzakiak.
Ez da, ordea, hor amaitzen bestela ere bisitarik merezi izango lukeen eraikina. Museoak hainbat mende luzetan izan diren 20 idazle eskoziar hautaturen berri ere jasotzen du, ingelesez, eskozieraz, gaelikoz nahiz latinez idatzi (3).
2) Irakurri ez ezik, 1952tik aurrera behin baino gehiagotan ikusi ahal izan genuen Ivanhoe film mitikoa. Ingelesez "Ai-van-jo" omen zen, baina guk "Ibanoe" esaten genuen.
3) "The writers, ranging in date from John Barbour in the 14th century to Sorley MacLean who died in 1996, represent Scotland's main literary languages --Scots, Latin, Gaelic and English."
.