Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Amatiño / Futbol-babesletza maldan behera

Amatiño

Futbol-babesletza maldan behera

Amatiño 2011/08/09 11:55
Krisia futbol-taldeen elastikoetara ere heldu da. Azken unean kontrako erabakirik ez badago behintzat, Valentzia, Vila-real, Sevilla eta Atlético madrildarraren jokalariak kamiseta “garbi-garbiekin” zelairatuko dira aurtengo denboraldiaren lehen partida-egunean. Hau da, euren helburu nagusitzat Europan jokatzea duten lau talderik ontxoenek ez dute babeslerik lortu.

Azken urteotan, hiru miliotik bostera bitartean jaso ahal izan dituzte goi mailako lau talde horiek denboraldiko, hainbat iragarki bularrean eramateagatik. Baina, krisia krisi, merkatuak maldan behera egin du nonbait eta, oraintsu arte balio edo merezi zuena, erabat garestitzat jotzen da orain.

Valentziak ez du lortu Suediako Unibet apostu-etxearekin azken hiru urteotan indarrean izan duen hitzarmenari eusterik eta zuritan atera beharko du. Antzerako zerbait gertatu da Sevillan, non Filipinetako 12bet apostu-etxeak ere hanka egin duen.

Beste horrenbeste, gertatuko zaio Vila-reali, aurrerantzean ez baititu jasoko azken bost urteotan Castelloko Aireportuak (Diputazioak) denboraldiko ordaindu izan dizkion hiru milioiak. Eta are gutxiago gero Madrilgo Atléticok, agur esan beharko die-eta Hego Koreako KIA auto-markak azken sei urteotan denboraldi bakoitzeko luzatu izan dizkion bost milioi euroei. Gauzak honela, aberatsenak eta xumeenak baino ez dira itxura denez geratzen. Elitean, Bartzelona eta Real Madrid. Apalen artean, Athletic eta Real.

Mailarik gorenean, Qatar Foundation-ek  30 milioi euro ordainduko omen dizkio Bartzelonari  eta Bwin apostu-etxeak ostera, 23 milioi Real Madridi. Apal samarren artean, Muskizko findegiak  2,1 milioi Athletic-i Petronor jartzeagatik eta ozta-ozta 2 milioi Telefonicak Zaragozari. Valentziako Diputazioak, berriz, 1,7 milioi Levanteri eta Gipuzkoako Diputazioak 1,2 milioi Real Sociedad-i “Gipuzkoa, euskararekin bat” adierazteagatik.

Bestalde,  hurrengo denboraldian Landabengo (Iruñea) Volkswagen Osasunaren babesle nagusia izango ote den aipatzen ari da egunotan Nafarroako komunikabideetan. 1,20 milioi euro bezainbateko ordaina izango ote den azaldu ere azaldu da.

Erika, San José, Susaeta eta Llorente

Xabi Prieto

Oraingoz, komunikabideen zurrumurrua edo guraria baino ez

  

Amatiño
Amatiño dio:
2011/08/09 22:08

Ez nauk zuzenean entzuteko denboraz heldu, baina sistemak aurrekoa berreskuratzeko aukera ematen dik, jakina.

Hire blogean erantzun deuat.

Eskerrik asko.

markos zapiain
markos zapiain dio:
2011/08/09 20:37

Amatiño, ez du zerikusirik zure testu honekin, baina orgasmoari buruzkoa orain duzu zuzenean (19:00-20:00) hemen: http://www.franceculture.com/player

Trebi
Trebi dio:
2011/09/05 01:42

Eta nire ustez erakunde publikoek ez zuten futbola horrelaxe finantziatu behar. Igual dit Gipuzkoako Diputazioan nor dagoen. Ez nire zergetatik. Baietzan alde dagoenak ondo azaldu beharko dit.

Amatiño
Amatiño dio:
2011/09/05 12:04

Nik ez dakit zergatik Gipuzkoako Aldundiak diruz laguntzen dion Realari, baina hainbat arrazoi sumatu ditzaket, Realzale amorratua ez izan arren:

  1. Reala izango da segurutik Gipuzkoako enpresarik handienetakoa BEZaren arabera. Aldundiari berari komeni zaio maila horri eustea, orain arteko diru-sarrerak (eta zure zergei errentagarritasuna) segurtatzeko.
  2. Reala izango da, seguru asko, urtean zehar Donostiari turistarik gehien bermatzen dizkioten operatzaileetakoa.
  3. Realak "Gipuzkoa" jartzen du Huesca, Jaen, Segovia, Avila, Leon eta beste hainbat probintzia sekula agertzen ez diren mapan.
  4. Reala izan daiteke gipuzkoarrok gehien elkartarazten dituen eragile gipuzkoarra. Eibartarrok ere giputzagoak gara Realak lehen mailan irauten asmatu duenetik.
  5. Reala eta euskara elkarrekin irudikatzea onuragarri da, euskaldunen artean ezezik, baita euskaraz ez dakiten gipuzkoarren artean ere.
  6. Gipuzkoako komunikabide guztiei komeni zaie Reala lehen mailan egotea. Gehiago saltzen dute. Beraz, ez dute Aldundiaren dirulaguntza sekula txarretsiko.
  7. Behar bada zuk ez duzu gustuko izango, baina erabaki guztiz demokratikoa izateaz gainera, ez dut uste ezein alderdik --orain arte behintzat-- kontra egin duenik.
Amatiño
Amatiño dio:
2011/08/24 13:22

Azken datuen arabera, futbol-babesletzaren diru-kopuruak honako hauek izango omen dira:

Barcelona (Qatar Foundation), 30; Real Madrid (bwin), 25+5; Athletic (Petronor), 2; Sporting (Gijón/Asturias), 2; Levante (Comunitat Valenciana), 1,5; Real Sociedad (Gipuzkoako Aldundia), 1,2; Getafe (Burger King), 1; Betis (CIRSA), 1; Mallorca (Bet-at-home), 0,8; Racing (Chorizo Palacios), 0,4; Granada (CajaGranada), ez da jakinerazi.

Babesletzarik gabe, Valencia, Villarreal, Atlético, Sevilla, Zaragoza, Osasuna, Rayo Vallecano eta Espanyol. Malagak, berriz, ordaindu egingo dio Unescori.

Iruzkina gehitu

Erantzuna formulario hau betez utzi dezakezu. Formatua testu arruntarena da. Web eta e-posta helbideak automatikoki klikagarri agertuko dira.

Galdera: Idatzi zortzi zenbakiak erabiliz
Erantzuna: