Frantziaren eta Italiaren pare-edo, baina Alemaniaren bikoitz
Amatiño
2019/05/14 14:10
Ontzat eman beharrekoak-edo, azken hiru hilabeteko langabeziaren euskal datuak, espainiar saltsaren baitan, behintzat. Ez behar bezain onak, Europar Batasunakoekin (%6,5) alderatuz gero; homologagarriak, Frantziakoak (%8,8) eta Italiakoak (%10,2) kontutan hartuta; eta, nabarmen eskasak, Alemaniakoa (%4,9) helburutzat joko bagenu.
Langabeziaren datuak ezer gutxi aldatu dira 2019ko lehen hiruhilekoan, 2018ko Gabon Zaharretakoekin alderatuz gero. Agian,salbuespen bakarra Nafarroa da, %9,9tik %8,2ra bitarteko jauzia ez baita, digitu bakarreko kopuruetan gehienbat, gauerdiko ahuntzaren eztula.
Mapa zeharo adierazgarria da. Batetik, Euskal Autonomia Erkidegoa eta Nafarroa dira ehuneko hamarretik beherako datua azaltzen duten bakarrak. Bestetik, ohi denez, zenbat hegoalderago, hainbat langabezia gehiago.
