Familien eta enpresen estres-testa
Barclays Capital txostenak taula soil bezain bakun batean laburbildu zituen, iaz, zertan zen Europar Batasuneko zazpi herrialde adieragarriren BPGren araberako zor publikoa eta pribatua. Eta espainiar estatuari zegozkion datuetan behintzat, administrazio publikoen zein bankuen zorra, familiena eta enpresena baino dezente murritzagoa zen. Beste modu batez esanda, badirudi Espainian estres-testak gaindituko ez lituzketenak familiak eta enpresak liratekeela, ez erakundeak eta bankuak.
Datuon arabera, ulergarri dateke Greziako administrazio publikoak barrena jotzeko duen arriskua eta nabarmen Alemaniako zein Frantziako familien eta enpresen egoera ona. Alegia, finantza-ekonomia oso garrantzitsua izango da baina, espainiarren zein britainiarren benetako ekonomia erabat zorpetua dagoen artean, alemaniarrena eta frantziarrena eroso samar ari da.
Tira, gure esparruko bankuek --zer esanik ez euskal kutxek-- erresistentzia-azterketa gainditu dute. Bapo. Euren osasuna ona omen da. Baina, ba al dago familien eta enpresen erresistentzia neurtzeko azterketarik? Zein estres-testek bahetuko du euren osasuna?
Zor publikoa eta pribatua, Barne Produktu Gordinaren ehunekotan (Barclays Capital, 2010)