Familia artean

Salvador bikoteak ez du honezkero aurkezpenik behar. Iñaki osaba, egun Euskal Herrian dugun musikagilerik ezagunenetakoa da, jazz-musikari, irakasle, konposatzaile eta moldagile aparta den aldetik. Eta ez da, gero, bart gaueko profesionala, Mikel Laboaren piano-jotzailea ere izan zen-eta hogeitaka urtetan. Horrez gainera, batere zalantzarik gabe, inprobisatzailerik iaio eta jorienetakoa. Benetan aspergaitza.

Olatz iloba, berriz, azken bost urteotan plazaratu den emakume kantautore andana berriaren ordezkari nabarmena. Belaunaldi berria, bai, baina honezkero gogotik finkatua. Biak, anaia eta alaba gisa, Eduardo Salvador baxu-jotzailearekin batera, “betidanik” musika sentitu, bizi eta gozatu duen familiaren senitartekoak.

Familia artean deritzan egitasmoaren formula arrakastatsua Iñakiren eta Olatzen arteko elkarren osagarritasunean datza. Osabak eskaintzen du berezko maisutasunaren segurtasuna, etenik gabeko inprobisazioaren lilura eta bat-bateko 'showman' eta plaza-gizonaren bizkortasuna. Baita --kostata, hala moduz eta umorez-- nagusitan euskaraz ikasi behar izan duen euskaldunberriaren jarrera eredugarria ere. Olatzek, ostera, ume-umetatik musika-giroan hazia eta hezia izan denaren lekukotasuna, neskatila zaurgarriaren indarra eta, bere jakineko errepertorio ezaguna tarteko, urraspide propioa jorratu nahi duen emakumearen adore freskoa.

Dena giro hurbil, alaitsu, umoretsu eta tenore emankorrean, non partaidetza eta lankidetza-borondatea ez diren sekula xuxurlatu ere egiten, baina bai, ordea, formulatu  beharrik gabe bilbatzen eta taularatzen.

Hondarribiko lehen aurkezpenaren ondotik, hurrengo bi hilabeteetan izango dira, ildo beretik, gainerako sei ekitaldiak Zarautzen (12-22), Berrizen (12-29), Andoainen (1-4), Ordizian (1-7), Villabonan (1-12) eta Azkoitian (1-13).

.

Iñaki eta Olatz Salvador, Hondarribiko Itsas Etxean.