Ezinezkoaren alde
Ameriketarakoak (1) ekarri zuen lehenik lur berrien mitoa (2), hartan oinarritu zen “American Dream” leloa, eta amerikar ametsaren globalizazioak erakarri du gero “nothing is imposible” delakoa, dena posible dela alegia. Baina denok dakigu, ordea, ez dena egia.
Merkatuaren oparotasuna ez da amama, ez da pagotxa. Inoiz baino handiago da egungo aukera-maukera, bai, baina euskal esaera zaharrak dioenez, “aukeraren maukera, azkenean okerra” (3). Edo, beste modu batez esanda, dena posible omen den arren, zein gutxi egin dezakegun gero hainbat egoera konpontzeko eta gainditzeko. Norberaren erraietako esperientziaz jabetu besterik ez dago.
Oraintsu arteko gizartean nagusitu den predikuaren kontra, Iñigo Martinezek uste du ezinezkoa baieztatzen duen garaia heldu dela, eta orobat burutu du Ezinezkoaren alde saiakera, zeinean ezinezkorik badela argudiatu ez ezik, ezinezkoak eragin ditzakeen hutsuneak aztertzera dator eta hutsuneok ez dutela zertan gabezia izan proposatu.
Are gehiago, hutsuneak zabaltzea da liburuaren xedea, hogei inguru ataletan, hasiera eta amaiera tarteko, hots: arreta, araua, bizitza, adina, estatistika, etorkizuna, jakituria, irakurketa, intimitatea, gorputza, terapia, desirak asetzea, lotsagabetasuna, komunitatea, jabetza, maitasuna eta hitzak. Denak, bata bestearen ondotik, elkarrekin kateatuak, paradoxa bada ere amaierak hasierara daramalarik irakurlea.
Iñigo Martinez, Filosofian lizentziatua ez ezik, irakaslea ere izan bada. Eta sumatu egiten zaio, idazteko moduan, didaktismoan, ulergarritasunean, hainbat erretorika-jokoren moldeetan eta irakurlea inplikatu nahian. Berez astuna izan zitekeen gaia erabat arintzen eta interesa sortarazten maisu da filosofia-irakaslea.
---ooOoo---
1) "Ameriketara joan nintzen xentimorik gabe, handik etorri nintzen, maitea, bost milioen jabe. Txin, txin, txin, txin, diruaren hotsa, harexek ematen dit, maitea, bihotzean poza." Kanta herrikoia.
2) Ubera beretik etorri zen 'Far west'en mitoa, besteak beste.
3) Esaera zahar hau burutu zuen gizarteak ez zekikeen, artean, inoiz 'Black Friday'rik izango zenik, baina bai gero aurretiaz asmatu ere!