Ez eroria, are gutxiago, amildua
Eñaut Elorrieta
Gipuzkoako Diputazioaren eta Donostia Kulturaren eraginez, Frantxis Lopez Landatxeren hariaz, Fernando Bernuesen arte-zuzendaritzaz, Karlos Gimenezen musika-zuzendaritzaz eta Nagore Plazaolaren ekoizpen-arduraz, agurra eskaini zitzaion gure Xabier Lete zen eta denari. Behingo eta sekulako. “Merezi zian eta zor zitzaioan” esan zidan, ahopean, alboan nuen laurogeita hiru urteko zarauztarrak.
Maite Arregi, Karlos Gimenez, Joana Ortega, Fredi Pelaez eta Iñaki Salvador bost pianotan. Euren doinu-ildoetatik, bertsoz eta poesiaz, Itxaro Borda, Harkaitz Cano, Igor Estankona, Mireia Gabilondo, Aintzane Galardi, Luis Garde, Jon Gerediaga, Tere Irastortza, Karmele Jaio, Mariasun Landa, Anjel Lertxundi, Karlos Linazasoro, Miren Agur Meabe eta Juanjo Olasagasti.
Kantaketan, ostera, Iñaki Beraetxe, Pier Paul Berzaitz, Eñaut Elorrieta, Ane Gabarain, Pascal Gaigne, Txema Garces, Oihana Lekuona, Mikel Markez, Alaia Martin, Jon Martin, Jabier Muguruza, Irati Odriozola, Petti, Pello Ramirez, Olatz Salbador, Asier Serrano zein, jakina, Antton Valverde. Eta, dantzan, Juan Antonio Urbeltz, Argia taldekideekin batera.
Guztiak ere, Xabierren heriotzaren hamargarren urteurrena dela-eta. Hamar urte, bai, egun batean hil zela. Xabierrek berak denboraz iragarri bezala, honezkero izarren hauts bihurtua izango dugu agian, baina ez dirudi hutsean erori zenik, are gutxiago ezerezean amildua.
- Bost piano-jotzaileak, elkarrekin agertokian. Argazki-eskuinean, Ane Gabarain, ekitear.
- Iñaki Salvador eta Petti
- Juan Antonio Urbeltz eta Argiako hainbat taldekide
- Karlos Gimenez lagun, Mireia Gabilondo aktore eta zinema-zuzendariak irakurri zuen Bernardo Atxagaren testua
Argazkiak: El Diario Vasco