Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Amatiño / Espelunguère

Amatiño

Espelunguère

Amatiño 2012/01/21 19:30
Pirinioetako Parke Nazioanalean barrena batere mendizale ez diren lagunekin abiatzeko lekurik aproposenetako bat Espelunguère deritzan naba da. Parkinetik, hamar minutuko aldats gora baino ez dago goiko haran lauraino eta bidean, gainera, “Cascade d’Espelunguère” deitu ur-jauzia bertatik bertara ikusteko aukera. Bada gero makinatxo bat toki zatarragorik munduan.

Somporteko tunelpean Biarno aldetik sartu aurretik, eskuineko Forges d’Abel seinaleari jaramon egin, hurrengo bidegurutzean, berriz ezkerretara jo. Cascade d´Espelunguère jartzen du eta bizpahiru kilometrotan barreneraino igo, igaro ezinezko langa aurkitu arte.

Parkinetik (1.330 m.) bertatik ateratzen da Sansanet aldera mendi-bidea, goitik behera datorren  lats zaratatsuaren (adi) ezker ibarretik. Berehalakoan ur-jauzia (merezi du errekazuloetan sartzeak) eta hamar minutu geroago goi-lautada ederra, hainbat gailurretako zirkuaren magalean.

Handik Estaners aintziraraino (1.754 m.) ordubete inguru baino ez. Bidea ez  da Arantzazutik Urbiarainokoa baino zailagoa. Hala ere, hobe, lagunak mendizaleak ez badira behintzat, udaberrirako uztea.

Hiru orduko joan-etorria egin dut gaur eta ez dut arimarik ikusi. Naba-erdian dagoen aterpea irekia eta zaindua. Telefono-estaldurak ez du hutsik egin.

Parkinetik geldoa etzanda

Behetik gorako lehen irudia

Jauzia

Zipriztin eta guztiko argazkia

Zuloa

Goreneko erreka-zulo ainubea eta goitik beherako lehen jauzia

Erreka izoztua

Gorago, berriz, hotz galanta ur-isuri bizkorraren geruza izozteko lain da

Arana

Espelunguère naba osoa, Estaners iboitik. 300 metrotik gorako malda

Gari Araolaza
Gari Araolaza dio:
2012/03/19 00:03

Artikulu hau buruan, mobiletik irakurrita gaur izan gara Espelunguèreko ur jauzian. Polita lekua, hurrengoan Estanersera igotzeko gogoarekin gelditu naiz!

Etxera iritsi eta tokira iristeko mapa prestatzeko intentzioz etorri naiz, baina hara, norbaitek lan ederra egin du gure aurretik: Espelunguère

Zure eskularruen pistarik ez dugu aurkitu. ;-)

Gari Araolaza
Gari Araolaza dio:
2012/03/19 01:03

Elur oso gutxi, pentsa kirol zapatiletan joan gara haraino. Hala ere elur pixka bat bota digu han ibili garen tartean, baina gauden garaietan ez dut uste askorik eutsiko duenik. Atzo Somporten ibili ginen fondoko pistan eta eguerdi aldera pistako tarte batzuetan elurrik ez zegoen, lokatzetan ibili behar. Badoa denboraldia bukatzen.

Amatiño
Amatiño dio:
2012/01/24 00:47

Argazkiak ateratzeko eskularruak kendu eta, zokoren baten utzi nituen zeharo ahaztuta. Joango bazina eta aurkituko bazenitu... nireak dira.

Amatiño
Amatiño dio:
2012/03/19 00:44

Zelan zegoen elurrez naba?

Gari Araolaza
Gari Araolaza dio:
2012/01/23 12:02

Ederra! Hurrengoan eskiatu ezin dugunerako apuntatuta! Zu ez zinen konturatu, ni ere justu-justuan, baina Irurtzun inguruan elkarrekin joan ginen autopistan metro batzuetan.

Iruzkina gehitu

Erantzuna formulario hau betez utzi dezakezu. Formatua testu arruntarena da. Web eta e-posta helbideak automatikoki klikagarri agertuko dira.

Galdera: Zenbat dira hiru ken lau (idatzi zenbakiz) ?
Erantzuna: