Eskozia, Europa berriaren adierazgarri

Azken bolada honetan nagusitu den joeraren bidetik, historiak gero eta eragin gutxiago izango du europar eraikuntzan, eta ekonomiak zein politikak, ostera, gero eta gehiago.

Indartuko bada, Europak barne-solidaritatea areagotu beharko du eta, horretarako, armada elkartu, atzerri-politika bateratu, banku eta finantza-sistema berdindu, batasun-sentipena suspertu eta estrategia komuna bideratu. Hau guztia lehenetsi beharko du, historia bigarren mailan utziz.

Historia alboratze honek estatuen arteko iragan-gatazkak leunduko ditu eta europarren arteko anaitasuna indartu. Edo, beste modu batez esanda, historiaren erlatibismoak, elkarrekiko tolerantziak, barne-arau lar esturik ezak eta behetik gorako europar gizartearen eraikuntzak erakarriko dute Europa berria, non, esan bezala, historiak, jatorriak eta sustraiek gero eta gutxiago eragingo duten eta ekonomiak eta politikak, aldiz, gero eta gehiago.

Eta, hain zuzen, bihar erabaki bat edo beste hartu beharko duen Eskoziak, sortzear dagoen Europa berri horren norabidea adierazi du dagoeneko, hautestontziak ireki beharrik gabe.

 **Acrotiri-Dhekelia, Ipar Txipre, Gibraltar eta Guernsey kontatu gabe. Ezta Turkia ere.