Emakume ikustezinak
Filmak film, izatez dezente ikusgarriagoa eta entretenigarriagoa da Charles Dickensen ezkutuko maitale politaren historia, baina idazle izan nahi duen sasikume itsusiaren kontakizun latzak badu edozein erromantizismok ez duen erakarpen bortitza.
Ellen Terman (1812-1870) nahiz Violette Leduc (1907-1972), biak ere, zein baino zein ikustezinak dira gizonezkoek euren neurrira egituratutako gizartean. Baina, batetik, nabarmena gero bien artean igarotako mendea ez zela alferrekoa izan; eta, bestetik, gordinak benetan idazle frantsesaren bakardadea eta malura.
The invisible woman filmak (Ralph Fiennes) bere onean, erritmoa du hasiera beretik, komertziala da, konbentzionala eta “polita”. Martin Provost zuzendariaren Violette, aldiz, lar geldoa eta astuna da aurrenengo ordu erdi luzean, eta gero eta biziagoa eta zorrotzagoa Simone de Beauvoir ezagutu ostean eta aurrera egin ahala.
Ikuskizun batean nahiz bestean emakumeak arrunt nagusi aretoko ikusentzuleen artean. Hala ere, bietarik bat bakarra ikustekotan, hobe, zalantzarik gabe, “zatarraren” aldeko apostua egitea.
Eta, beste aholku bat: aretoan sartu aurretik komeni, behar bada, Simone de Beauvoir, Jean-Paul Sartre, Jean Cocteau, Albert Camus eta (batez ere) Jean Genet idazleen biografiak gogoratzea.
