Ezjakin hutsak
Amatiño
2011/09/23 23:21
Harrigarria eta ulertezina omen da RTVEren Administrazio Kontseiluak herenegun hartu zuen erabakia, TVEren zein RNEren albiste-erredakzioetan esku hartzeko, gaiak proposatzeko eta informazioa aurreikusteko. Harrigarria eta ulertezina izango da, bai, kazetaritzaren ikuspegitik, baina ez nonbait zenbait alderdi eta sindikaturen ordezkarien iritziz, hartutako erabakia batere premiarik eta askatasun osoz hartu baitzuten.
Erabaki honen atzekaldean, sustraian, kultura demokratikorik eza dago, ordezkaritza politikoaren jauntxokeria eta aginpideen arteko nahaspila. Astakeria hori erabaki duten ordezkariak, besteak beste, gizarajo hutsak dira. Zenbaitek esango du gaiztoak direla, maltzurrak, agintzaileak, nahasleak, ezgaiak, kontrolatzaileak… Baina, hau guztia ukatzeke, lehen eta behingoz ezjakinak dira. Ezjakin hutsak. Ezjakin huts arriskutsuak. Ez dakite zertan ari diren ere.