Eguzkiaren mirari bi
Amatiño
2013/07/07 00:10
“Ikusi ala ez ikusi, zeruan dago eguzki” dio euskal atsotitzak. Eta, esaera zaharraren eskarmentua omen denez gero, ez dugu sekula zalantzan jarri, azken hilabeteotako eguraldi eskasak sinesteko arrazoi handirik eman ez digun arren. Baina tira, azkenean, hona eguzkia begi bistan. Aurrerantzeko astebeteetan fede-kontua baino zertxobait gehiago izango al da!
Aspaldiko partez suspertu zaigun eguraldi eguzkitsuak mirari txiki bi eragin ditu balkoian, biak ere estreinako.
Batetik, geranioarteko perretxikoak, ala onddoak ote? Edozenbat egunetako hezetasunaren ondotik eguzkiaren beroak ernaldarazi ditu, nonbait, simaurretan lotan zeuden esporak.
Bestetik, horra, argazkian, (nire) aurtengo lehen pasiolorea. Izatez udako zein udazkeneko lore-mota da baina, aurten, dena etorri dator berandutxo samar.
