Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Amatiño / Herensugetan

Herensugetan

Amatiño 2012/09/11 00:05
Gorkak dragoiak ikusten omen zituen han-hemenka. Baina semeak diotsa dragoiak ez direla existitzen (sic) eta emakumeak, berriz, dragoiak, inon egotekotan, Gorkaren buruan baino ez zeudela. Horra azken berrogeita hamar urteotako historia, dragoirik gabeko dragoi-historia. Norberak esan eta norberak sinetsi.
Herensugetan

Gorka (Asier Hormaza)

Gorkaren dragoi-historia denera berandu iritsi zen poli-miliaren historia da. Berandu, hainbat ekintzatara; berandu, Gernikako Estatutua onartzera; berandu, bere burua gizarteratzera; eta berandu –baina ez beranduegi, agian— bere semeari ETAkoa izana kontatzera. Eta, bere baitan, nolabaiteko erru-aitortza: “oraingoek ez dute uzterik asmatzen guk lehenago uzten asmatu ez genuelako”.

Dragoi-ehiztaria ezin susmo eskasagoz hasten da, aurrenengo sekuentzietan, Gorkaren semeak (Pablo Amigo) nolabaiteko tankera artifizialez eta erabateko sinesgarritasunik ezaz hizketari ekiten dionean. Baina, handik aurrera, lehen etsipena gainditu ostean, filmak hobera egiten du emeki-emeki eta sekula euskaraz egin den ekoizpenik garestiena dela frogatzen ahalegintzen da, Angel Amigo eta Patxi Barco dragoi-parearen eskutik.

Politto Asier Hormaza (Gorka), hobeto Itziar Ituño (Maddalen) eta labur baina nabarmen ondo gero, Xavier Agirre (Larraun). Entretenigarria, ez da gutxi, berrogeita hamar urtetik gorakoontzat behintzat.

Perturren aztarrenak, likidazionismoa eta gainerakoak tarteko, miliek eta poli-miliek izango dute zertaz eztabaidatu film honen inguruan. Nik esango nuke, ordea,  batzuk beste batzuk baino beranduago ibili direla. Baina, hori bai, denak berandu, San Jurgirenak egiten, herensugetan.

Iruzkina gehitu

Erantzuna formulario hau betez utzi dezakezu. Formatua testu arruntarena da. Web eta e-posta helbideak automatikoki klikagarri agertuko dira.

Galdera: Zenbat dira hiru ken lau (idatzi zenbakiz) ?
Erantzuna:
Aurkezpena

Amatiño

Luis Aranberri Mendizabal