Donostian sartu beharrik gabeko Donostia
Ehuneko ehun, porlana edo galipota
Itzuli polita, gero, orain hurrengo egindakoa. Donostialdeko inguru-minguruan, Donostian sartu beharrik gabe. Decathloneko parkinean autoa utzi eta, Añorga (Cincuentenario), Lugaritz, Aiete, Galarreta, Jauregi, Santa Barbara (Urnieta), Lasarte, Zubieta eta Urdaiagatik (Txokoalde) zehar, Aginagaraino. Aginagatik (Arratzain) berriz, autopistaren gainetik eta Mendizorrotzen barrenetik, Igeldora heldu. Behin Igeldon, Orkolagan zehar, Murgil albotik Aritzetara jaitsi, autopista azpitik pasa ondoren, eta, maldan behera, berriro ere Decathloneko parkinera. Guztira, jira eta buelta, ia berrogeita hamar kilometro; ezinbesteko geldialditxoak eta guzti, lau ordu luze.
Ezer nabarmentzekotan, polita Jauregi aldea, zoragarria Zubietatik Txokoaldeko (Aginaga) zubirainoko ibarra, benetan ganorazko aldatsa Mendizorrotz barrenetik Igeldora bidean eta sekulako ikuspegia, gero, eguzkialdera, Jaizkibel, Larrun, Aiako Harria, Oindi, Adarra eta Andatzara begira.
Bada goiza pasatzeko modu aspergarriagorik.
- Niretzat, behintzat, inoiz aurretik urratu gabeko bidexka-sorta.
- Ez da Mosela, ez da Rhina... Oria da.
- Usoa zelatan, Oria ibaiko zubi-gainean.
- Igeldora bidean, sekulako aldapa latza. Gerizpetan, ordea.
- Txorizo-mutur egosia, hamaiketakoan.
