Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Amatiño / Dantza, Euskal Arte Nazionala

Dantza, Euskal Arte Nazionala

Amatiño 2021/05/30 23:10
Berrogeita hiru urte dira Luis Iriondok (Dantzak*, 1978) estreinako iradoki zuela dantza ez ote den Euskal Arte Nazionala, eta 74, berriz, Pirmin Treku** zarauztarra (Fermin Aldabaldetreku***, 1930-2006) 17 urtez hasi zela dantzan Londresko The Royal Ballet-en, non lehen dantzaria izatera iritsi zen. Biak izan ditut gogoan asteburu honetan, XXIV. Nazioarteko Dantza Eguna eta Iker Karrerari emandako 2021 Dantza Saria tarteko.
Dantza, Euskal Arte Nazionala

Luisma Laboa

Ez dut nik esango dantza Euskal Arte Nazionala ez denik, baina, izatekotan, azpimarratu beharko euskal emakumeen gustuko Arte Nazionala baino ez dela, hamarretik bederatzi (edo gehiago) andrazkoak baitziren atzo Donostiako Victoria Eugenia antzokia bete zuten ikusentzuleak.

Eraz eta moldez, begiz eta belarriz, sekulako ikuskizun atsegin eta artistikoa hamarren bat taldek eta berrogeitaka dantzarik eskaini ziguten programa anitza, hainbat dantza-tankeraz, alegia: neoklasikoa, garaikidea, neotradizionala, klakea zein estilizatua.

Besteak beste, kanpoko talderik eta dantzaririk ere bazen arren, erdiak inguru behintzat euskal jatorrikoak zirenez gero, programak frogatu zigun euskal dantzaren goi-maila, dantzarien ukaezinezko trebetasunaz ez ezik, baita sorkuntza, irakaskuntza eta koreografiaren aldeko herronkaz ere.

Ezer nabarmentzekotan, aipagarri Iker Karrera berak burutu berri duen Not Pleasure delakoaren aurkezpen laburra, non Belén Lerroux, Raymond Naval, Pablo Costas eta César Louzán dantzariek, hitzez nekez azaldu daitekeen eragin zirraragarria suspertarazteko gai izan ziren taula gainean.

Hain zuzen ere, taula gaineko ekitaldien arrakasta xehetasun txikerretan sumatzen omen da, aurkezletzan, esaterako. Are gehiago Euskal Herrian, non benetan ez den batere ohikoa euskaraz zein erdaraz etenik gabe eta naturaltasunez funtzioa betetzea. Atzo, ordea, Luisma Laboak gogotik eta maisuki bete zuen eginkizuna. Zorionak.

Dantzari guztiak
Hamar talde eta berrogeitaka dantzari, bart, Donostiako Victoria Eugenia antzokian.

Dantzari taldea
Belén Lerroux, Raymond Naval, Pablo Costas eta César Louzán, Iker Karrerarekin (sorbaldaz).

 

 

*DANTZAK. Juan Antonio Urbeltz. Jakin, 1978

**Pirmin Treku, dantzari baten ibilaldiak. Argia. Oier Araolaza

***Fermin Aldabaldetreku. Auñamendi.

Markos Zapiain
Markos Zapiain dio:
2021/06/03 12:20
Harrigarria, Pirmin Trekuk airean hartu izana dantza uzteko erabakia.
 
Hogeita hamar urte zituela, lesio bat izan zuen belaunean. Tratamenduan jarri eta jarraitzera bultzatu zuten; esaten zioten hamar urte on gehiago zeuzkala aurretik dantzan ederto egiteko.
 
Ordea, arratsalde euritsu batean, oholtzan jendaurrean zela, pauso batean jauzi gora eta airean zela lur hartzeko beldurra sentitu zuen, belauneko zauriaren erruz.

Orduantxe hartu zuen dantza uzteko erabakia. Ez zuen erdipurdikoa izan nahi.

Amets Arzalluzi kontatu zion, Argiako elkarrizketa honetan:

https://dantzan.eus/hemerot[…]zkoa-da-baleta-ez-gustatzea
Iruzkina gehitu

Erantzuna formulario hau betez utzi dezakezu. Formatua testu arruntarena da. Web eta e-posta helbideak automatikoki klikagarri agertuko dira.

Galdera: Zenbat dira hogei ken bi? (idatzi zenbakiz)
Erantzuna:
Aurkezpena

Amatiño

Luis Aranberri Mendizabal