Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Amatiño / CDak eta DVDak, zaharra berri

CDak eta DVDak, zaharra berri

Amatiño 2020/04/17 09:00
DVD berri bi jaso ditu azken bolada honetan. Batetik, Debako Udalak herritarren artean banatutako “Debako Euskararen Historia Soziala” deritzona. Bestetik, berriz, Bilboko Chávarri jauregiaren 125 urteurrena dela-eta, Espainiako Gobernuaren Euskadiko Ordezkaritzak burututakoa. Ezin iritzirik eman, ezin izan baititut kusi, horrelakorik behatzeko tresna aproposik ez dudanez gero.

Hiru urte bai, auto berria erosi eta, nire CD maiteak non sartuko asmatu ezinik, saltzaileari deitu niola laguntza eske. Hizketan hasi orduko konturatu nintzen, adinez nire semea izan zitekeenaren hitzak neurtu nahiaz. Berehala antzeman nion zelan amaituko zen erantzuna, alegia, auto berriak ez zekarrela CDrik, beste tekonologia berriagoren baten mesedetan; baina, aldi berean, sumatu ere sumatu nion, ahalik eta hitzik goxoenez adierazi nahi zidala, lar mintzeke, ni eskatzen ari nintzaiona mundu zaharkituaren aztarren galdua baino ez zela.

Gogoan dut, ulertzeko gauza izango ote nintzen zalantzan, nolabaiteko didaktismo on hutsari atxikia, ziostala: “Badakizu, lehenik diskoak izan ziren, gero kasetak, ondoren CDak, orain, berriz, UBSak… ”. Eta erantzun nion, zaharraren haserre zakarraz: “Barkatu, baina ez dira kate berekoak, diskoak, kasetak eta CDak musika eta guzti erosten genituen, UBSak, ostera, ez. Non erosiko ditut nik nire gustuko musika eta guztiko UBSak?” Eta, berak, jango ote nuen beldur-edo, apal-apal: “Ez, erosi ez, zuk grabatu beharko dituzu…” Eta naizen honek:  “Grabatu… horrez gainera, grabatu… niiik?"

Kontua da, ordea, orduantxe jabetu nintzela, estreinako, CDen zein DVDen etorkizun latzaz. Baina, Debako Udala eta Espainiako Gobernuaren Ordezkaritza bat datozenean DVDen baliotasuna aldarrikatzen, ez dakit ba zer ulertu behar ote dudan, ez dakit zer mezu ari zaizkidan bidaltzen, ez dakit etorkizuna erresetatzeari ekin behar al diodan ala, oraindik ere, etxean ez dudan beste tramankuluren bat erosi behar ote dudan. Baina, ez al zituen bat teknologiaren haize berriak eraman?

Chavarri
Bilboko Chavarri jauregiak, 125 urte
Iruzkina gehitu

Erantzuna formulario hau betez utzi dezakezu. Formatua testu arruntarena da. Web eta e-posta helbideak automatikoki klikagarri agertuko dira.

Galdera: Zenbat dira hogei ken bi? (idatzi zenbakiz)
Erantzuna:
Aurkezpena

Amatiño

Luis Aranberri Mendizabal