Berrogeita hamar urte
Amatiño
2013/02/08 23:00
Berrogeita hamar urte ez dira gero artaleak. Berrogeita hamar urte dira, ordea, Oronozko ikastetxean bildutako lagun-taldea koko-moko jantzi ginela. Estreinako-edo jantzi, nik gogoan dudanez 1963an ez zen-eta batere ohikoa mozorrotzea. Are gehiago, diktadura-garaian ez zen ezelango aratusterik, debekatua zegoen mozorrotzea eta, Tolosako “Udaberri Jaietan” izan ezik, gerra osteko gazteen artean inor gutxik zekien zer arraio ziren kale-ihauteriak.
Tartean bost eibartar bai, behintzat. Upel barruan dagoena Felix del Teso “Karakas”. Goialdean, erdi inguruan, tanganillo beltzez eta txapelaz, Fidel Jauregibarria. Eskuineko boxeolaria, Ramon Idigoras “Itxi”. Aldameneko bizarduna, betaurreko beltzez, Mikel Larrañaga, Eibarko alkatea izatera heldu zena; eta, esan gabe doa, bosgarren eibartarren bat ere bada, hor nonbait galdua (Oronoz, 1963).