Basque Culinary Center-en “hamaiketakoak”
Azken urteotan ekindako gastronomiaren ildoa sakontzen jarraitu du, aurten ere, arrakasta handiz amaitu berri den Jazzaldiak. Ez dut nik esango egunotan Donostiaratu izaten den jende guztia jazzale sutsua ez denik baina bai, ordea, Trinidade plazako giroak, Zurriola inguruko hego-haizeak eta han-hemenkako garagardo-zurrutak dezente erakartzen dutela. Galdetu, bestela, Heineken markari.
Edateak ez ezik, jateak ere ez dakar, antza, kalterik, alderantziz baizik. Aurtengo jazzaldiak “garagardo-potea” indarrean jarri du hirurogeita bost tabernatan eta nolabaiteko mokadu aproposen bat edo beste lau jatetxetan ezarri.
Horrez gainera, piano-kontzertu eta guztiko cokctaila Mugaritz jatetxean eta lau otordu Basque Culinary Center-en egoitzan. Bi, bazkalordutan (50€), Iñaki Salvadorren partaidetzaz, eta beste bi, doan, eguerdi aurretik, hamaiketako edo gisa (12:30 p.m.). Aurrena larunbat goizean izan zen, Matija Dedic (pianoa), Gonzalo Tejada (baxua) eta Carlos Falanga (bateria) hirukotearekin; eta atzo, berriz, Secret Chiefs 3 bandako kapusaidunekin.
Benetan apartekoa gero Basque Culinary Center-ek entzule bakoitzari banan-banan eskainitako zizka-mizka kaxatxo txukuna, bertako gastronomia-fakultatearen instalazioak ezagutzeko abaguneaz, aurrenik, eta jazz (?)-kontzertua entzuteko aukeraz, ostean. Eta, dena, musu truk.
Jazzaldiaren aitzakiaz, oraindik ere bada maukatxoren bat edo beste, lantzean behin baino ez bada ere.
Datorren urtea arte.
Secret Chiefs 3 taldea, BCCren egoitzan. Erdian, Trey Spruance, mito samarra.