Auguas Tuertas

Somportepeko Espelunguère (1.350 m.) parkinetik hasi eta, goiko naban zehar, Aragoien eta Biarnoren arteko Escalé (1.639 m.) ataka estua gainditu ostean, maldan behera.

GR11 bidezidorretik jarraitu, Auguas Tuertas (ur bihurrituak) eta Guarrinza haranetan barrena, Ozako oihaneraino, Echo ibarrean.

Bost ordu t´erdi inguru, emeki-emeki, tapa-tapa, mantso asko, mendian egin ohi diren egin beharreko guztiekin. 

Leku ederra, ederrik bada. 

Escalé mugako ataka, Biarno aldetik ikusita. Atzekaldean, Aragoiko lehen larreak. Oso aspaldiko pasabidea ematen du, lau mendizaleen oinetan sumatzen den  galtzada ez baita, inondik ere, naturala. 

Barrenean, "Auguas Tuertas" (ur bihurrituak), maldan behera, haranean zehar, Aragoi-Subordan errekak egiten dituen etengabeko jira-birak tarteko. 

Mendi-magalean, berriz, berrogeitaka sai,  egonean. Auskalo zeren zain ote dauden... Denak elkarrekin aztoratuz gero ez dira batere gozoak izango!

Aragoi-Subordan erreka, Guarrinza aldetik ikusita. Jira eta buelta, maldan beherako biderik aurkituko ez balu bezala. 

Barrenean, "Acher" mendilerroa. Aurrez aurre, Neolitiko Aroko "Achar" trikuharria.  Duela bost mila urteko artzainak ere ez ziren, antza, batere makalak leku aproposak aukeratzen!

Eskuinetik ezkerrera: Somport, Estanés iboiaren iparraldea (Espainia eta Frantziaren arteko muga), Aguas Tuertas, Aragoi-Subordan erreka eta Ozako Oihana.