Argerich, "ollon popii"
Martha Argerich
Aitaren arbasoak katalanak eta ama, berriz, Ukraniatik ihesik atera behar izan zuen juduetakoa, lau urterekin (1945), Buenos Airesko Astral Antzerkian, estreinako jo zuen jendaurrean. Geroztik ez dio ikasterari, lantzeari eta taulara igotzeari utzi. Ezta Ameriketako zein Europako denetariko sariak eta ohoreak jasotzeari ere.
Bach, Liszt, Chopin, Ravel, Prokófiev edo Rachmaninov konpositoreen interpreterik fidagarrienetakoa, 2007an Donostiako Musika Hamabostaldian parte hartu zuen eta, 12 urte geroago, berriro izan da, Kursaal Eszena programaren baitan.
Larunbatean ikusi ahal izan zenez, jendeak ez du ahaztu pianoaren dama. Ezta, seguru asko, ahaztuko ere.
Gozamen hutsa. Ondarroan esaten dutenez, "ollon popii". Hau da, oiloaren popa. Oilo-ipurdia, alegia.